Ifisus 3:21 - Udél Dwata: Gna Kesfasad ne Lomi Kesfasad

²¹ Yake hol megdóyón dé Dwata lemwót bélê tekuy kem tau hemtahu béléen, ne bud megdóyón snéen lemwót bè Krays Jisas. Yóm kegdóyónen yó, yake béen abay wen sónen.

Ifisus 3:21 Referans Kwoze

Sulat Jud 1:25

Yó gónóm mon, bê tekuy nmò sónen yóm tendo kdóyón tekuy ke Dwata. Sónen du se tahu Dwata. Deng hewaen tekuy gu lem hatay hlanen bè yóm gónó tekuy mogot Jisas Krays. Du se yóm hol dandónen geta, yóm kmamal yóm klamangen. Tek són du yóm hol mfasang bè kdéen, ne yóm alì wen kwalisen. Sana kem gnô kun ne ni kem ni hnikót là deng dlimunen du he yóm benwu, ne laen kô tul konolen efet nim kmoen ni, ne laen kô tul sónen snéen.

Sulat Pol Ebè Yó Kem Tau Hemtahu Bè Rom 11:36

Abay se kdéen ton, gotu dlimun Dwata. Ke là wen du, laen kô dù mowil. Ne yóm kentihen deng dlimunen yó mò hol gónón megdóyón. Bê tekuy lensón yóm kdóyón tekuy du.

2 Pitér 3:18

Yó dé hyu bélê ye ke hol tendo temnù yóm ketngón ye yóm gónó tekuy mogot Jisas Krays, yóm deng lemwà tekuy gu lem hatay, ne ke hol temnù yóm keskél ye béléen. Hol bê tekuy abay nmò sónen yóm kdóyón tekuy du.

1 Pitér 5:11

Ne laen kô dù sónen snéen yóm kfasangen mogot tau.

Isaya 6:3

Yó nmò le gel le staba, mon le, “Hol tahu laen kô dù belenen yóm Dwata yóm Dwata laen dù là gbeken du yóm hol gónó mogot. Hol tahu laen kô dù belenen bà udì. Tódô lenngeben klamangen benwu yóm alì kegetahen.”

1 Tutul Israél 29:11

Uu se, Dwata, yóm hol geta, laen dù là gbekem du. Bud uu se yóm alì knóón, yóm gel gemmò bè kem hmohon kóm. Uu se yóm hol dandónen geta. Yóm kdê nô bè longit ne te tonok hono kóm funen, Dwata. Uu se kmamal yóm klamangen. Bud uu se yóm hol dandónen geta senta yóm kdéen.

Kem Lingón 72:19

Hol bê tekuy lensón yóm kdóyón tekuy du, abay se tey minggel boluyen. Yake gfan bè klamangen benwu yóm tey klinggelen. Dwata he hol dmohò du nim ni!

Flipay 4:20

Hol bê tekuy abay nmò sónen yóm kdóyón tekuy ke Dwata yóm Mà tekuy.

Sulat Pol Ebè Yó Kem Tau Hemtahu Bè Rom 16:27

Tek són du yóm hol tahu Dwata, ne tódô gotu tngónen kdéen. Bê tekuy nmò sónen yóm kdóyón tekuy du hlan tekuy bè Jisas Krays.

1 Pitér 2:5

Ne kdê ye yó kem tau deng hlowilen, lómón ke botu ye snéen kuy. Yu se yó kem botu wen mu Dwata du bè yóm gónô hdaen mò gónóhen gel nô. Ne bè yóm gónóen yó, hol lómón ke yu se yóm tau fen gel demsù ebéléen. Yó henged kuy dsù, duhen yóm kimón ye ke Dwata ne yóm gel kdóyón ye du, hlan ye bè yóm deng nmò Jisas bélê ye. Ni se yóm dsù hol henmóyô Dwata.

Isaya 42:12

Yó kem tau nô bè yó kem benwu mayuk, yake hol megdóyón bélê ye Dwata ne hol dóyón ye se kuy yóm tey kegetahen.

Flipay 2:11

Ne kdê le se angat gotu mon du, “Jisas Krays se yóm hol gónó mogot bè klamangen.” Ne bè yóm kmon le du yóm yó, yó se gónó Dwata yóm Mà tekuy hol megdóyón.

Glasya 1:5

Hol bê tekuy abay nmò sónen yóm tendo kdóyón tekuy ke Dwata.

2 Timuti 4:18

Ne angat bud lenwaen ou he yóm gónó tekuy mogot ke wen bud tô dumu gfau, ne hlós nwiten o ebè tum kun benwu nogot bè longit. Bê te abay lensón yóm kut kdóyón du.

Flipay 1:11

Sotu bud hnihu anì hol hyu yóm kmò ye lemwót bè yóm gel któbóng Jisas Krays kuy. Ne bè yó se hol gónó Dwata megdóyón bélê ye.

Ifisus 1:6

Hol dóyón tekuy dé Dwata lemwót bè yóm tey któbóngen tekuy hlanen bè Krays, yóm hol kun Ngà kenbong nawa. Yóm tóbóng yó, là kô benli du.

Kun Snulat Luk 2:14

“Hol dóyón tekuy yóm Dwata nô bè yóm hol són longit geta. Ne hol wen kenek nawa kem tau te tonok, yó kem tau gel hefligal ke Dwata.”

Kem Lingón 115:1

Olon uu, Dwata, olon uu yóm knóón hol sendóyón, là yóm kum. Yó gónó me hol dmóyón kóm lemwót bè yóm klaen dù sónen yóm là konolen yóm kbong nawahem kum, ne yóm ktenebem bélê me.

Ifisus 2:7

Yó gónón mò du nim ni mò gónón hegfan du bè kdéen tau yóm tey któbóngen tekuy, ne yóm tey nawahen ebélê tekuy hlanen bè Krays Jisas.

Matyu 6:13

Béem bayà mi ebè yóm tilów mgel, bede hol kenlungem mi bè Seitan.’

Ifisus 4:1

Duhen ni, wen hlolou kuy, ou se yóm tau deng geblanggù lanu mò du yóm hmoen dou yóm gónó tekuy mogot. Bê kwit ye ktau ye, hol nmò ye sen yóm nmò seklóón ebè yó kem tau deng tnaba Dwata.