Ifisus 3:14 - Udél Dwata: Gna Kesfasad ne Lomi Kesfasad

¹⁴ Duhen yó, botonge mtud bukol bè solu yóm Mà tekuy.

Ifisus 3:14 Referans Kwoze

Kem Lingón 95:6

Géhél ye ne, mtud kuy bukol bè soluhen, ne tmaba kuy ebéléen. Du se yóm hol gónó tekuy mogot, yóm tehe mifil tekuy.

Flipay 2:10

Duhen yó, lemwót bè yóm kadat le du yóm boluy Jisas, angat le gotu mtud bukol bè soluhen yóm kdéen nô bè longit, ne kdéen nô talak tonok, ne kdéen nô laan tonok, gotu le angat mtud bukol béléen.

Kul Nmò 21:5

Okóm timbow deng hto yóm buteng me lemwót, tódô me bud lemwót. Glok le gotu mung kum ebè kilil mohin yó kem tau hemtahu bè yó, balù yó kem tuha libun le ne yó kem ngà le. Ne gotu me mtud bukol bè kilil mohin, mni me bè Dwata.

Ifisus 1:3

Hol tendo gel dóyón tekuy dé Dwata. Du se kun Dwata ne kun Mà yóm gónó tekuy mogot Jisas Krays. Lemwót bè yóm deng kessotu tekuy bè Krays, yó gónón alì tmóbóng tekuy, botong blayen tekuy kdê yó kem hyu lemwót gu bè longit.

Danyél 6:10

Timbow tngón Danyél yóm deng kefema Daryus du yóm udin yó, tódô mulék ebè gónóen ne husek elem yóm sotu dfélen nô ta, uma kóm smolu ebè Jirusalim yóm tembó bengen ne tódô mtud bukol bè yó mni ebè Dwata. Ni se yóm sana kun gel nmò na tlu duléken sendaw mni bè Dwata, mung du yóm tey kdóyónen du.

Isaya 45:23

Sok wen gel fasadu hol dohò se yó, laen kô gembek temles du. Yóm fasadu kuy yó, là kóen bud mulék elem baku. Yó fasadu, angat kdéen tau gotu mtud bukol bè soluhu, mung du yóm safà le béléu anì són ou yóm gónó le mogot.

Kul Nmò 20:36

Timbow deng kudél Pol, ominen mtud bukolen dalang se yóm kdê le bè yó, ne mni bélê le bè Dwata.

Kun Snulat Luk 22:41

Kewót Jisas bè yó, hetsik, ne hóyów tnudà yóm klayuken bélê le. Yó nmoen, tuden bukolen bè tonok, ne mni bè Dwata.

1 Bok Kem Tau Hol Geta 19:18

Okóm angat hlowilu yóm hitu libu kem tau bè Israél, yó kem tau là gel le mtud bukol bè Baal, ne là gel nelek le du.”

1 Bok Kem Tau Hol Geta 8:54

Timbow deng kni Selumun bè Dwata, ominen mdà bè solu yóm gónó le gel demsù ebè Dwata, bè yóm deng gónón mtud bukolen bè yóm knihen ebè Dwata yó koni igoen hdà du eta bè longit sigelen.

2 Tutul Israél 6:13

Wen gónó le gel hegewà sok wen kestifun hmoen bè tembaga deng hdaen bè yó, mukas lewu mitru klamangen ne mukas sotu mitru kegetahen. Suen bè gónón sóól lósól yóm Gónô Dwata. Ominen motun etahen ne mdà bè yó, ne ominen mtud bukolen bè solu yóm kdéen tau Israél, nbólen eta bè longit hólólen.

Kul Nmò 9:40

Na gotu hefewà Pitér lu yó kem libun yó. Ominen mtud bukolen, ne mni bè Dwata. Deng knihen, tódô beklil ebè yóm matay, monen mò du, “Ó Tabita, btiki ne.” Tahu se, tódô kendel henmungen mukat yóm libun yó. Bè yóm ktonen ke Pitér, ominen tódô hboluk myón.

Kul Nmò 7:60

Tuden bukolen ne bud hgelen udélen, monen, “Ó Mà bè Longit, béem dog snolò bélê le ne yóm salà nmò le ni.” Kogol yóm kmonen du yó, ominen milot nawahen.

Ifisus 3:15

Du se gónó le menmà yóm kdéen tau hemtahu deng nô bè longit dalang se yó kem tolo nô te tonok.