Ifisus 2:4 - Udél Dwata: Gna Kesfasad ne Lomi Kesfasad

⁴ Okóm yóm Dwata, tey kkoduhen tekuy, ne tey kbong nawahen tekuy.

Ifisus 2:4 Referans Kwoze

1 Pitér 1:3

Hol dóyón tekuy dé Dwata. Du se kun Dwata yóm gónó tekuy mogot Jisas Krays, ne bud Maen snéen. Tódô lemwót bè yóm tey kkodu Dwata tekuy, wen yóm lomi klowil blayen tekuy hlanen bè yóm tehe klowilen ke Jisas Krays gu lem hatay. Ne yó se yóm hendón tekuy yóm klowilen tekuy hulin kdaw snéen.

Ifisus 1:7

Lemwót bè yóm tehe fen katay Krays bélê tekuy, yó se gónó Dwata lemwà tekuy, duhen yó se yóm kmò kehlifóten yóm salà tekuy. Tey bong yóm któbóngen tekuy yó.

Kem Lingón 86:15

Okóm yóm uu, Dwata, teyi kmodu, ne tey minggel nawahem, là mahili lembut. Yóm kbong nawahem kum, là kóen monol, ne teyi teneb bélê me.

Sulat Pol Ebè Yó Kem Tau Hemtahu Bè Rom 5:8

Okóm ke Dwata kun, deng hegfanen yóm tey kbong nawahen tekuy bè yóm tehe le khógówen ke Krays edini, mò fen matay bélê tekuy igò tekuy tolo gemsalà.

Ifisus 2:7

Yó gónón mò du nim ni mò gónón hegfan du bè kdéen tau yóm tey któbóngen tekuy, ne yóm tey nawahen ebélê tekuy hlanen bè Krays Jisas.

Kem Lingón 145:8

Yóm Dwata gónó tekuy mogot, tey kbong nawahen tau, ne tey knoduhen lu. Là kóen mahil lembut, ne là kóen monol yóm kbong nawahen tau.

Sulat Pol Ebè Yó Kem Tau Hemtahu Bè Rom 10:12

Yóm Udél Dwata yó, laen kô dù tau ke là gomongen lemen, abay se laen kô gónó le stólóng yó kem Ju bè yó kem tau là Ju le. Tek sotu se yóm gónóhen mogot yóm kdéen tau, duhen Jisas Krays. Kihu tau tmaba béléen, sal sket gel tnóbóngen lu.

1 Timuti 1:14

Okóm tey któbóngen dou yóm gónó tekuy mogot, tódô henbalingen ou tau hemtahu, ne blayen do yóm kbong nawahu kem dumuhu. Yó se nefeten yóm deng kessotu tekuy bè Krays Jisas.

Jirimaya 31:3

Ó kem dou tau, laen kô dù sónen yóm kbong nawahu kuy. Yó gónóm mon, tódô senflósu hegfan du bélê ye yóm là konol yóm kbong nawaw kuy.

Kem Lingón 86:5

Tey kehyuhem, Dwata, ne mahil béléem hmifót salà, ne tey kbong nawam kul yó kem tau htóbóng béléem.

2 Timuti 1:9

Deng lenwà Dwata tu gu lem hatay, ne tnabahen tu anì baling te kun tau. Sundu ke bè yóm hyu deng nmò te gónón lemwà kut, kaem tódô lemwót bè yóm kun kóyô tmóbóng kut. Yóm któbóngen kut yó, hlanen bè Krays Jisas gu laanen là deng dmimun du nim benwu ni.

Ifisus 3:8

Ou se yóm hol glaan bè yóm kdéen tau Dwata, okóm deng mom sigang Dwata tahu nim tey hyu hmoen dou ni, duhen yóm kwitu du elem blóng yó kem tau là Ju le. Yó hol lemen nim Tulón Hyu ni, duhen yóm tey kehyuhen yóm tóbóng Krays, yóm kehyu là gbek tekuy hmingón du.

Sulat Pol Ebè Yó Kem Tau Hemtahu Bè Rom 9:23

Yó gónón mò du nim ni mò gónón hegfan yóm tey alì kehyu kmoen ebélê tekuy kem tau deng knoduhen, kem tau deng eles néléken mò angat megdóyón béléen.

Sulat Pol Ebè Yó Kem Tau Hemtahu Bè Rom 2:4

Déke yó hendemem là kô tnafaken kóm, abay se tey hyu nawa Dwata, là mahilen tmakas, ne tey manay nawahen. Là kô yó du. Igò yó gónó Dwata hemyu kmoen ebéléem anì wen lanen mit kóm hegsel.

Nihimaya 9:17

Là móyô le hmungol, gotu klifót le yó kem dê hentaw ton deng tehe nmoem lem blóng le. Deng kenbê le uu, deng le mom mélék tau mò malak kul mulék ghesek bè Idyip. Okóm uu se yóm Dwata hulung hmifót, tey minggel nawam ne tey bong nawam yó kem tauhem, là kói mahil lembut. Tey kkoduhem kul yó kem tauhem, là kô nam e tódô bayà kul.

2 Tisalunika 2:13

Okóm kuy, kem dumu me setwoli, kem tau kenbong nawa yóm gónó tekuy mogot, là gbek me du ke là gel dóyón me ke Dwata lemwót bélê ye. Abay se tehe yu ekni bè hol kbut yóm benwu, deng eles nélék Dwata yu ne anì lenwaen yu gu lem hatay. Yó kmò kehewaen kuy, hlanen bè kun kfasang yóm Tulusen mò hembaling kuy kun tau hol mólós, ne bud hlanen snéen bè yóm deng kehtahu ye yóm ktahuhen.

Kun Snulat Luk 1:78

Tey kkoduhen tekuy Dwata. Angat heknasen yóm kifu anì ton tekuy yóm lan tekuy gewà gu lem hatay.

Juna 4:2

Ne yó gónón mni bè Dwata, monen, “Ó Dwata, tahu se yóm tehe monu gu laanu là deng lemwót bè yóm tehe kdókem do. Yó tehe monu, là kô genbaem du Ninibi. Yó se tehe tô gónóhu mógów ebè Spén. Deng eles tngónu yóm tey kbong nawahem tau ne yóm tey kkoduhem kul. Deng tngónu snéen yóm tey khanayem nawahem ne yóm tey kehyuhem bè tau. Mahil béléem gel hmifót kul senta ke tnafakem lu.

Danyél 9:9

Okóm uu se yóm sana kum Dwata hol gónó mogot, teyi kmodu ne mahili hmifót balù yóm deng gel katù me kóm.

Kem Lingón 51:1

Ó Dwata, lemwót bè yóm là konol nawahem ebéléu, hol knoduhem ou. Lemwót bè yóm alì kkoduhem dou, hol kóhem béléu yó kem salau.

Kehewà 33:19

Mon Dwata se, “Hotu hiwesu bè soluhem yóm tey klinggelu ne heglalagu bè soluhem yóm dou boluy, yakà ou du se yóm sana Dwata hol gónó mogot. Tendo gel hegfanu bè yó kem tau deng néléku yóm tey kkoduhu kul.

Isaya 63:7

Angat tulónu yóm là kilihen yóm kbong nawa Dwata tekuy. Tey kdóyónu du lemwót bè yóm deng nmoen bélê tekuy. Tey któbóng Dwata yó kem tau Israél lemwót bè yóm alì kkoduhen kul ne yóm là kilihen yóm kbong nawahen kul.