Ifisus 2:20 - Udél Dwata: Gna Kesfasad ne Lomi Kesfasad

²⁰ Bè yóm deng kehtahu ye, lómón ke deng ye baling ngom bè yóm gónô hdà Dwata. Yó heheken yóm gónô yó, duhen yó kem aposol ne yó kem tehe tugoden. Bede yó hol tud blóngónen, duhen Krays Jisas.

Ifisus 2:20 Referans Kwoze

Isaya 28:16

Ne ni se udél yóm Dwata hol dandónen geta gónó tekuy mogot, monen, “Wen yó kem botu alì mbegel mò gónón myón yóm beng deng suu bè Sayun mò hol hembegel du yóm Gónô angat hdau bè yó. Wen sotu botu suu bè yó mò hdengen ne wen snulatu du yóm monen, ‘Yóm tau mbegel kehtahuhen, hanayen nawahen.’

Matyu 16:18

Ni tódô tulónu kóm, lemwót bè yóm udélem yó gónóhu moluy kóm Pitér, yó lanen botu. Ne bè nim botu ni gónóhu mbut hbegel yóm kehtahu le béléu yóm kdéen tau hemtahu bè klamangen benwu. Balù yóm hatay, là kô gatuen kul.

Kem Lingón 118:22

Yóm botu tehe senkbê yó kem tau hdà gónô, ofo kul ke botu laen dù muhen, anì monem, hol botu bong muhen bè kdéen mò hembegel yóm gónô hdà le.

Deng Hegfan 21:14

Wen sfolò lewu kay botu gónó le hemyón du yóm beng hilol yóm syudad yó mò hembegel du. Bè ket kay yóm botu yó, wen boluy snulat le lemwót bè yó kem sfolò lewu tau tehe nélék yóm Ngà Ubiha mò hógówen.

1 Kurin 12:28

Bè yóm kdê tekuy deng hemtahu, wen yóm hmò Dwata tekuy, yóm ket tekuy na sotu. Yóm hol tanayen, néléken yó kem tau mò gel hógówen. Gewuhen, wen se kem tau néléken mò gel tugoden. Getluhen, wen se tau néléken mò gel tmolok yóm kun udél. Ne wen se benlayen kegbek mò du yóm hentaw ton. Ne wen se benlayen ktued hkó des, ne tólóng se benlayen khulung tmóbóng kem dumun. Ne wen se benlayen khulung malak kem dumun. Ne tólóng se benlayen khulung tódô mudél ebéléen bè tólóng udél là deng kun tngón du.

Matyu 21:42

Omin Jisas bud mon du mò kul, “Tahu se yóm mon ye. Deng gesfala ye kô kuy yóm tehe mon Dwata bè Sulaten, ‘Wen botu deng senkbê yó kem tau hdà gónô, ofo kul ke laen dù muhen. Anì monem, yó se yóm hol tahu botu mò hembegel du yóm gónô hdà le. Yó se yóm deng nmò Dwata, ne tey kehtaw tekuy du yóm nmoen yó.’

Glasya 2:9

Yó kem tau fen gel malak bè yó, le Jim ne Pitér ne Jan, dilô le se kul yóm deng kwen sigang Dwata tahu. Omin le mkem lem hólól me lewu me Barnabas mò ilô yóm deng kessotu me bè yóm kmò me nmò bè Krays. Ne deng gotu senkotuk me snéen yóm kehlós me tmolok lem blóng yó kem là Ju le lewu me Barnabas, ne lu se fen tmolok lem blóng yó kem Ju.

Kem Udél Hlalak Tehe Selumun 9:1

Yóm khulung hedem lómón ke tau hemdà gónô ne hitu heheken du.

Sikaraya 10:4

Bè Juda se gónón tembong yó kem tau mogot benwu, ne yó kem dumu tau gel malak, dalang se yó kem kmandér bè yó kem sendalù, kem tau mò malak yó kem dou tau.

Ifisus 3:5

Tehe yu ekni, là kô tngón kem tau gnan du yóm bunihen yó. Okóm nim kmoen ni, deng hegfan Dwata bè yó kem aposol ne bè yó kem tau gel tugoden, hlanen bè Tulusen.

Kulasi 2:7

Henlel ye dé hdolil béléen, bê ye abay skó du anì baling mbegel yóm kehtahu ye lómón yóm tehe tolok le kuy. Ne tódô senflós ye dmóyón ke Dwata.

1 Pitér 2:6

Yakà wen yóm monen bè Sulat Dwata, yóm monen, “Wen botu alì mebtes deng tehe eles néléku. Yó se yóm botu alì bong muhen bè yóm gónô hdau bè Sayun. Deng suu bè yó ne. Ke wen tau hemtahu béléen, là kô wen gónón gsel béléen.”