Husiya 11:8 - Udél Dwata: Gna Kesfasad ne Lomi Kesfasad

⁸ Ó kem tau Israél, mò tô keblayu kuy elem hólól yó kem hohon ye du? Mò tô kbayau kuy bélê le du? Là gbeku du ke sulék genlau yu lómón yóm tehe keglau yóm lewu kem benwu Adma ne Sibuim. Lebà nawaw ke yó tô nmou. Tey mget yóm kbong nawaw kuy.

Husiya 11:8 Referans Kwoze

Jirimaya 31:20

Yó bud udél Dwata, monen, “Ó Israél, uu se yóm ngà kenbong nawahu yóm hol gónón nô nawahu. Là gbeku du ke là tehe tnafaku kóm, okóm là kô kó nawahu kóm. Són uu yóm tendo nô bè nawahu ne tey kkoduhu kóm.

Matyu 23:37

“Yu kem tau menwu bè syudad Jirusalim, sal gel hnatay ye yó kem tau tugod Dwata, ne hnatay sentudà ye botu yó kem tau hógów Dwata ebélê ye. Deng hilu duléku ne tô móyô sembung kuy, lómó tô kmou kuy, lómón yóm mlon gel kenleken elaan hafaken yó kem ngaen, okóm là kô ye dog móyô.

Husiya 6:4

Okóm yó udél Dwata ebélê le, monen, “Ó kem tau Israél ne kem tau Juda, tedu se kmou kuy du? Tódô gel kmanas yóm kbong nawa ye do lómón ke lobun te tonok, ke hlafus tódô kmanas ne lómón ke amù, tódô kmanas bè nóng kdaw.

Dwata 32:36

Angat lenwà Dwata yó kem tauhen ke tonen yóm klaen dù bud kgis le. Knoduhen yó kem tau mimón du ne tonen là holen bud wen dù tebel bélê le. Yakà deng le gotu meglà, kem tau hesek ne kem tau là hesek le.

Sulat Jud 1:7

Ne hentulón ye nawa yó kem tau tehe menwu bè yó kem syudad Sodom ne Gomora ne yó kem benwu hmilol kul. Tódô nmò le yóm tehe kul nmò yó kem hógów Dwata monu yó koni bè yóm kmò le samuk. Là són du bè kem libun gónó le mò du, balù bè kem kul dumu logi snéen sana kmò le du. Yó kmò Dwata kul, gotu tnafaken lu bè yóm ofi laen kô dù sónen. Ni se yóm eles hetngónen bélê tekuy anì là nmò tekuy du yóm sidek.

2 Pitér 2:6

Tehe yu ekni, tódô tnafak Dwata yó kem tau menwu bè yó kem syudad Sodom ne Gomora lemwót bè yóm tey kegsalà le. Yó nmò Dwata, tódô ntemen lu. Yó gónón gemlà kul mò ton yó kem dumu tau yóm gónón e kól yóm tau laen dù klikoen ke Dwata.

Amus 4:11

“Deng wen genlau bè yó kem syudad ye lómón yóm tehe ksulék keglau yóm benwu Sodom ne Gumura. Yó kem dù mowil bélê ye, hol lómón ke yóm koyu deng ken ofi dolihen bè yóm keskot le du lem ofi. Ewenem sana là kóyô ye semfulék ebéléu,” mon Dwata.

2 Bok Kem Tau Hol Geta 13:23

Okóm yóm Dwata, tey kkoduhen kul yó kem tau Israél, ne yó gónó le là gotu meglà. Knoduhen lu lemwót bè yóm deng kesfasad le Dwata Abraham ne Isak ne Jakub. Efet ni kmoen ni, là kô sulék genlaen kul yó kem tauhen, ne là se kô tebelen kul.

2 Samwél 24:16

Okóm timbow tô genlà yóm hógów Dwata mit hatay yóm syudad Jirusalim, bud mayuk nawa Dwata kul bè yóm alì kehsideken yó kem tau, Yó monen bè yóm hógówen, “Geblaen yó ne, béem bud henlós.” Bè yóm kudél Dwata ebè yóm hógówen yó, lemwót yóm hógów Dwata yó tódô nô bè yóm gónón gel kmusu Arauna yóm tau Jibusayt.

Tekang Kbuten 14:8

Duhen yó, bè yóm kungol le du yóm yó, yóm limu kem tau hol geta lemwót bè Sodom ne Gomora ne bè Adma ne Sibuyim ne Bila, yó nmò le gotu sentifun le yó kem sendalù le bè Datal Sidim anì bè yó gónó le semlong

Deng Hegfan 18:18

ya tey kkik le du igò le temngel yóm tey kebel lemwót gu bè yóm ofi sulék mken du, mon le, “Laen kô dumu syudad bong mkay senta yóm syudad yó.”

Deng Hegfan 11:8

Ne yóm lówó le, tódô tebelen bè yóm lan bong bè syudad Jirusalim. Yó se yóm syudad gónó le tehe tmutuk bè kros yóm gónó le mogot. Wen gel boluy le du yóm syudad yó, duhen Sodom ne Idyip. Yóm boluy yó, wen hnigaden.

Sifanaya 2:9

Yó gónóm mon, lemwót bè yóm là katayu, yó gónón dohò yóm udél deng monu, Angat genlau yó kem tau Muab ne yó kem tau Amun, lómón yóm tehe tódô sulék keglau yó kem tau bè yóm benwu Sodom ne Gmura. Yó angat kmou yóm kul tonok ni kem tau genlau ni, angat tódô tfeng tahen bnes semnual ne angat baling hono sol gónó le ma kahì, tonok laen dù bud muhen kól bè laen dù tul sónen. Yó kem dou tau dù tebel, angat wen megef yó kem kimu le ne gotu nwa le yó kem tonok le.”

Amus 7:6

Tahu se, là hendohò Dwata du, monen, “Là dohoen snéen yóm deng tonem yó,” udél yóm Dwata hol dandónen geta.

Amus 7:3

Tahu se, là hdohò Dwata du, monen, “Là dohoen yóm deng tonem yó.”

Jirimaya 9:7

Duhen yó, ni se udél yóm Dwata laen dù là gbeken du, monen, “Lemwót bè yóm nmò le ni, gotu hnou lu, lómón yóm gel kehnò le bala tók anì mkó yóm kê faken. Laen dù dumu lanu hkó du yó kem salà le.

Jirimaya 3:12

Yó gónóm mon lemwóti ne, hol heglalagem bè yó kem tau Israél bè yóm kul benwu fi bwak, monem mò kul, ‘Ni se udél yóm sana kuy Dwata hol gónó mogot, Ó kem tau Israél, kem tau laen dù bud kehtahu le, bud ye semfulék ebéléu dé yakà tey kkoduhu kuy. Là bud lenbutu kuy ne.

Isaya 63:15

Ó Dwata, hol knudungem mi gu dyó bè yóm gónóhem nô bè longit. Tngón me yóm klaen dù belenem ne yóm tey kegetahem. Gónón nô se yóm alì kehedemem kum du? Ne yóm kfasangem, gónón nô de? Gónóhen nô se yóm kbong nawahem kum ne yóm kkoduhem kum? Hol béem tódô bayà mi sen.

Kem Lingón 106:45

Hentulónen nawa yóm tehe senfasad le, lemwót bè yóm là konolen yóm kbong nawahen kul, yó gónón temles hendemen.

1 Bok Kem Tau Hol Geta 3:26

Okóm yóm hol tahu kun yê yóm ngà mowil yó, tey kbong nawahen du yóm ngaen. Yó monen bè yóm tau hol geta, “Bê, Amo, béem hnatay dou, tódô blayem du ne.” Okóm mom yó mon yóm sotu libun, “Yó ne, tódô sendolihem bélê me anì laen dù mtukul mfun du.”

Jirimaya 18:8

okóm ke yó nmò yó kem tau bè yóm benwu yó, knogol le yó kem sidek gel nmò le, là kô hendohou du yóm deng monu yó, là kô genbau du yóm benwu yó.

Jirimaya 42:10

‘Tódô ye henek bè nim benwu ni. Ke ni se nmò ye bud hdau yu, là kô naw e bud hebtang kuy. Lómón ke bud huluhu yu ne là kô naw e bud kendut kuy. Là gbeku du ke là tnafaku kuy lemwót bè yóm là kimón ye. Bede bud sidek kegnómu du bè yóm alì keglayam ye.

Isikél 33:11

Okóm ni se udél yóm sana Dwata hol dandónen geta, monen mò kuy, ‘Yóm tulónu kuy ni, safau bélê ye hlanu bè yóm là katayu. Là kóe hligal du ke matay yóm sotu tau igoen tolo nô tahen yó kem salaen. Hyu nawaw ke tenfloken yóm kmoen sidek anì mowil. Ó kem tau Israél, tenflok ye ne yó kem sidek gel nmò ye. Moen de ke móyô ye kendel matay?’

Mika 5:3

Yó kem tau Israél, angat tódô bayà Dwata lu elem hólól yó kem hohon le efet kól bè yóm kdaw wen libun kmuleng blututen ne mngà logi. Ominen yó lemwót yó kem tau Israél deng negef le mayuk, tódô le bud mulék ebè yóm hol kul benwu lem blóng yóm kul dumu.

2 Tutul Israél 36:15

Yó nmò Dwata yóm kul Dwata hol gónó mogot yó kem tehe fù le, wen kem tugoden senflós hógówen elem blóng le mò eles hetgama kul, abay se là móyóen gemlà kul, dalang se yóm Gónô gónóhen nô lem blóng le, là móyóen ke gebà.

Jirimaya 9:6

Sónmoen temnù yóm kéng gel tulón le. Là kô le bud móyô mulék ebéléu,” mon Dwata.