Husiya 11:11 - Udél Dwata: Gna Kesfasad ne Lomi Kesfasad

¹¹ Tey kehlóng le mulék lemwót gu bè Idyip, lómón kehlóng yó kem onuk koyu móyóng. Bud le mulék se kul yó kem tau tehe nô bè Asirya lómón kehlóng le kóyóng obun. Ne bud nwitu lu mulék ebè yóm hol tahu kul benwu. Ou se yóm sana kul Dwata hol gónó mogot nim mudél ni.”

Husiya 11:11 Referans Kwoze

Isaya 60:8

Bo tedu yóm tey móyóng ebè Israél lómón ke lobun mung bè lenos ne lómón ke wadag yó kem tey obun móyóng mulék?

Sikaraya 10:10

Huléku lu gu ditu bè Idyip ne gu ditu bè Asirya, nwitu lu mulék ebè yóm kul benwu bè Gilyad ne bè Libanun. Angat tey kwen le ta yóm kul tonok, botong là kóyówen bélê le.

Ubadaya 1:17

“Okóm yóm Bulul Sayun angat baling benwu gónó le e mlo yó kem tau Israél deng gewà ne angat baling benwu laen kô du belenen. Angat le gotu bud semfulék yó kem dù tau Israél na le e bud nwa yó kem tehe kul nfun.

Husiya 3:5

Okóm kogolen bè yó angat le bud semfulék ebè yóm sana kul Dwata hol gónó mogot yó kem tau Israél. Bud le semfulék ebè yóm tau sfu Dabid mò mogot kul. Lemwót bè yóm tey klikò le ke Dwata, angat tódô setbol kkel le bè yóm bud kesfulék le ebéléen, bede angat guta le yó kem hyu angat tóbóngen kul elem hulin kdaw.

Isikél 37:25

Angat le nô bè benwu Israél, yóm benwu tehe gónó le nô yó kem tehe fù le, yóm benwu tehe blayu ke Jakub, yóm sotu tau tóbóng lówóhu. Laen kô dù sónen yóm knô le bè yó, dalang se yó kem ngà le kkólen bè yó kem angat lugod le elem hulin kdaw. Ne Dabid yóm tau tóbóng lówóhu, angat laen kô dù sónen yóm kegetahen bélê le.

Isikél 37:21

Tulónem kul yóm udél yóm sana Dwata hol dandónen geta, yó monu, Gotu bud sentifunu lu yó kem tau Israél deng nô bè yó kem tólóng benwu. Bud nwitu lu mulék gu bè yó kem benwu deng gónó le e sekla, nwitu lu mulék ebè yóm hol kul benwu.

Jirimaya 31:12

Angat le semfulék ebè benwu le ne tey kehligal le semngal ta yóm bulul bè Jirusalim gónó le tmaba ebéléu. Tey kehligal le lemwót bè yó kem deng basahu kul. Wen halay ne tifas grép le ne hnolo ulib ne wen tey ngà ubiha le ne kem ngà safì le. Yóm kmò klowil le hol mkél bè yóm tonok tendo wen élen. Laen kô dù bud gónó le élél. Ne laen dù bud knangag le.

Isikél 34:27

Yó kem koyu mungu le, angat tey kbungu le ne tey tembas yóm tonok le ne tey menek kbenwu le yóm kdê le. Ke deng hentohu yóm kdina fét le kul yó kem hohon le ne ke deng lenwau lu bè yó kem tau gónó le ghesek, bè yó he gónó le temngón du ou se yóm sana kul Dwata hol gónó mogot.

Isikél 34:28

Là bud hnamfas le kul ne yó kem tólóng benwu, dalang se yó kem ógóf lem bnes là bud nsék le kul. Angat tey menek kbenwu le, laen dù bud hmikò kul.

Sikaraya 8:7

Bud ni se udél yóm Dwata laen dù là gbeken du, monen, Tahu dohò se yóm angat kehewau kul yó kem dou tau deng negef le ebè yó kem benwu fi dmata kdaw ne ebè yó kem benwu fi desdef.

Sikaraya 8:8

Bud nwitu lu semfulék anì nô le bè ni bè Jirusalim. Lu se yó kem dou tau ne ou se kul Dwata. Là kóen na a monol yóm nawahu ebélê le ne angat hono tedeng yóm nmou bélê le.