Hlolò 16:15 - Udél Dwata: Gna Kesfasad ne Lomi Kesfasad

¹⁵ Kesok deng kmò Aron du yóm yó, ominen hewà nan e hnatay yóm kambing hedsù le du ebè Dwata yó kem tau. Nwahen litô yóm kambing yó ne nwiten elem yóm Dfél hol gónó Dwata nô ne bud hentsiken sulék bè kilil yóm sefeng yóm Slungan Fasad, ne bud hitu duléken hemtsik du bè lówóhen lómón yóm deng gna nmoen bè litô yóm safì tudu kun dsù.

Hlolò 16:15 Referans Kwoze

Hibru 9:7

Okóm yóm gewu dfélen, tek sotu tau gusek elemen, tek són yóm tau hol geta bè yó kem gel demsù ebè Dwata, bede tek suléken husek elemen bè yóm sfalay. Ne là kóen na a gusek elemen ke là wen litô nwiten mò dsuen ebè Dwata. Yóm dsuen yó, mò lan Dwata hmifót yóm kun salà, dalang se yóm kul salà deng gmò yó kem dumu tau là gehedem le du.

Hibru 9:12

Bè yóm kógów Krays bè yóm gónô yó, tódô hlós husek elem yóm Dfél gónóhen nô Dwata, ne bè yó gónón seflós nô. Bè yóm khuseken, là nwiten du yóm litô kambing duhen ke litô safì mò dsuen ebè Dwata. Okóm hol kun litô yóm nwiten. Lemwót bè yóm kedsuen yó, yó gónón wen lan tekuy gewà gu lem hatay, ne laen tul sónen ne yóm kegewà tekuy yó.

Hibru 9:3

Ne yóm gewuhen dfél, yó boluy le du, Dfél gónón nô Dwata. Bede wen tey tilob nes mfól seng bè sóólen.

Hibru 2:17

Bè yóm któbóngen tau, là gbeken du ke là nan tódô hbaling tau anì mkél bélê tekuy kem dumuhen setwoli. Yó gónón na gbót bè yóm kmò tekuy anì du mò blóng tekuy ebè Dwata, ne anì là mili nawahen mò du bélê tekuy, ne anì hol knoduhen tekuy. Bè yóm keseblóngen yó, yó se gónó Dwata hmifót salà tekuy.

Hibru 6:19

Yóm hendón nefet nawa monu yó koni, hol lómón ke hihol yóm klowil tekuy. Angat dohò kton tekuy du, abay se deng eles nô ditu Jisas bè yóm hol gónóhen nô Dwata. Yó gónón là megewu nawa tekuy mangat du.

Hibru 5:3

Lemwót bè yóm kun gónó lunog se kun, là són du bè kem dumuhen tau yóm gónóhen gel demsù, okóm gel demsù ebè Dwata bè kun salà snéen.

Hlolò 16:2

“Hol tulónem ke Aron yóm twoguhem, béen tódô óyô husek elem yóm Dfél hol gónóhu nô sentu yóm nes seng ye. Abay se bè yó lemen fita yóm sefeng yóm Slungan Fasad gónóhu hegfan mung bè lobun. Ke là nimónen du yóm monu ni, angat hatay tafaku du.

Hibru 7:27

Là kóen na a mkél bè yó kem dumu tau tehe gel blóng le ebè Dwata. Ke bélê le kul, sal gel wen dsù le ket kdaw. Tanay gónó le gel demsù bè yóm kul salà, omin le tmodol demsù bè salà yó kem dumu tau. Okóm là ke Jisas kun. Tek suléken demsù, bede yó dsuen, kun lówó. Yóm kun kedsù yó, laen kô bud seefen.

Hibru 9:13

Yóm sotu tehe hlolò Musis kul, ke wen tau là mólósen lemwót bè yóm deng kehlonihen ebè yóm tau deng matay, yó gel nmò le sal gel wen litô kambing duhen ke litô safì gel hetsik le ebéléen, mung du kohuen yóm sotu safì deng eles hkekeb le. Ke sok deng gotu kmò le du yóm yó, mólós ne kton Dwata du yóm tau là mólósen yó koni.

Lista 17:11

Tahu se, tódô nmò Musis yóm hlolò Dwata du yó.