Hibru 9:19 - Udél Dwata: Gna Kesfasad ne Lomi Kesfasad

¹⁹ Yóm tanay nmò Musis ekni, gotu senfalahen yó kem hlau Dwata bè yó kem tau. Ne ominen ma yóm litô yó kem safì ne yó kem kambing deng eles hnatay le, ne nbolen él. Ne wen sotu kay hulu nwahen boluyen hisop, benkesen yóm tnikel hulô nmò le gu bè bul ubiha, ominen mdù du lem yóm litô. Gna hentsiken ta yóm bok gónóhen nô yóm hlau Dwata, ominen hetsik du ebè kdéen tau.

Hibru 9:19 Referans Kwoze

Hibru 9:12

Bè yóm kógów Krays bè yóm gónô yó, tódô hlós husek elem yóm Dfél gónóhen nô Dwata, ne bè yó gónón seflós nô. Bè yóm khuseken, là nwiten du yóm litô kambing duhen ke litô safì mò dsuen ebè Dwata. Okóm hol kun litô yóm nwiten. Lemwót bè yóm kedsuen yó, yó gónón wen lan tekuy gewà gu lem hatay, ne laen tul sónen ne yóm kegewà tekuy yó.

Hibru 10:4

Abay se yóm litô gel dsù le lemwót bè safì ne bè kambing, là kô gbeken mkó du yó kem salà le.

1 Pitér 1:2

Deng tehe eles tngónen kuy Dwata, yóm Mà tekuy bè longit. Ne deng néléken yu ne nmoen yu hol kun tau mlan bè yóm kun Tulus. Yó gónón mò du yóm yó anì hol nimón ye Jisas Krays ne anì gotu hnifóten yó kem salà ye mlan bè yóm deng khamà Jisas litóen. Dwata he hol tendo tmóbóng kuy ne hol tendo henek nawa ye.

Isikél 36:25

Angat wen él mólós hetsiku ebélê ye anì baling ye mólós. Nolobu yó kem using ye ne là bud ye tmaba ebè yó kem dwata kéng.

Kun Snulat Jan 19:5

Omin Jisas bud hewà, nô bè kuluhen yóm sual lenikin le yó, ne leseken se yóm nes ginggung. Mon Paylét mò kul, “Ngem, ni sii yóm tau yó.”

Kun Snulat Jan 19:2

Timbow deng kfes le du, omin yó kem sendalù lemikin yóm sotu kay tinu semnual mò nmò le kuruna suub le bè kulu Jisas. Ne hesek le du yóm nes ginggung, hningón nmò le tau hol geta.

Mark 15:20

Timbow le deng tmakas hmowon du, omin le bud mlus yóm nes ginggung hesek le du yó koni, bud hesek le du yóm sana kun nes. Kewót le bè yó ne, nit le Jisas ebè yóm gónó le tmutuk du.

Mark 15:17

Ne omin le hesek du ke Jisas yóm nes ginggung, hningón nmò le tau hol geta. Ne lenikin le yóm sotu kay tinu semnual, nmò le kuruna, mò suub le bè kuluhen.

Matyu 27:28

Ne kó le nes Jisas, hesek le du yóm nes tógó hulô, hningón nmò le tau hol geta.

Isaya 52:15

Okóm ni, tey kehtaw le du yó kem tau bè dumu benwu. Tódô le teneng yó kem tau hol geta bélê le, sidek ketnga le. Tódô ton le ne tngón le yóm tehe là deng hnikót tngón le du.”

Kehewà 12:22

Ma ye ngà hanga yóm hulu boluyen hisop ne dù ye lem yóm tukung gónó ye hemsù yóm litô yóm ógóf tnétê ye yó, omin ye lemumang du bè hehek bak dól ye ne bè yóm hlekel ta yóm bak dól ye. Hol béen wen bélê ye hewà bè gónóen efet hlafus.

Kem Lingón 51:7

Hol kóhem dou salau anì balinge mólós. Hol denyohem ou anì laen dù bud usingu, balù udì.

Hibru 12:24

Hol lómón ke deng tekuy hloni ebè Jisas. Du se mò du yóm lomi lan mò gónó tekuy hloni ebè Dwata lanen hamà litóen bélê tekuy. Hol lómón ke deng hentsiken tekuy yóm kun litô. Ne yóm litóen yó, tey hyu nefeten senta yóm litô tehe Abél ekni.

Hibru 1:1

Tehe yu ekni, yóm Dwata tódô gel mudél ebè yó kem tau gnan tehe gónó tekuy gu semfu hlanen bè yó kem tugoden. Ne tey dê dulék Dwata mudél ebélê le, ne tey dê lanen mò du snéen.

Hibru 9:13

Yóm sotu tehe hlolò Musis kul, ke wen tau là mólósen lemwót bè yóm deng kehlonihen ebè yóm tau deng matay, yó gel nmò le sal gel wen litô kambing duhen ke litô safì gel hetsik le ebéléen, mung du kohuen yóm sotu safì deng eles hkekeb le. Ke sok deng gotu kmò le du yóm yó, mólós ne kton Dwata du yóm tau là mólósen yó koni.

Hibru 9:18

Senged se bè yóm gna lan hlolò Dwata kul tganay. Là kóen hyu ke là wen yóm litô yóm ógóf fen matay.

Hibru 10:22

Yó gónóm mon, hol tekuy hloni ebè Dwata dé. Hol hewót tekuy lem but blutut tekuy yóm kehloni tekuy yó, mung du yóm hol kehtahu tekuy béléen. Yakà deng hólósen tekuy Jisas, yó gónón deng mkó ta tekuy ne yó kem salà tehe gel hemblat tekuy. Hol lómón ke deng denyohen tu lem yóm tey él tikaw.