Hibru 8:11 - Udél Dwata: Gna Kesfasad ne Lomi Kesfasad

¹¹ Bè yóm kdaw yó, laen dù tau ke bud toloken kem dumuhen anì tngón le o, abay se deng tódô kdê le gotu temngón do, lemwót bè yóm hol tau glaan kólen bè yóm hol tau hol geta.

Hibru 8:11 Referans Kwoze

Jirimaya 31:34

Là bud tnolok le kul ne yó kem dumu le sebét ne yó kem fes lówó le ke mon le, ‘Yake hol tngón ye Dwata.’ Abay se angat tódô kdê le temngón dou lenwóten bè leneken kkólen bè lebangen. Angat gotu hnifótu yó kem sidek deng nmò le ne là kô bud hendemu du ne.”

Isaya 54:13

Tódô ou ne tmolok yó kem tauhem anì wen gendeng le ne anì menek kbenwu le.

Kun Snulat Jan 6:45

Wen snulat yó kem tehe gna tugod Dwata ekni, yó mon le, ‘Angat tolok Dwata kdéen tau.’ Yó se tau hmungol ke Mà ne wen dnalangen béléen,” mon Jisas, “yó se yóm tau mógów ebéléu.

1 Jan 2:27

Okóm yó dum kuy, deng sù Krays bélê ye yóm kun Tulus. Anien he ke laen dù tau bud tmolok kuy syan ke senflósen nô bélê ye yóm kun Tulus. Abay se du fen tmolok kuy yóm kdéen, ne laen dù kéng boolen yóm gel toloken kuy, hono tahu. Yó gónóm mon, hol gel nimón ye sen yóm gel toloken kuy yóm Tulus Dwata, ne hol henlós ye yóm kessotu ye bè Krays.

Jirimaya 24:7

Angat wen nawa hyu blayu kul anì hol dilô le ou yóm sana kul Dwata hol gónó mogot. Angat bud lu se dou tau ne bud ou se kul Dwata, abay se hol lemwót bè nawa le yóm bud kesfulék le ebéléu.

1 Jan 5:20

Ne deng tngón tekuy se yóm tehe kógówen edini yóm Ngà Dwata mò na a hetngón du tekuy yóm hol tahu Dwata. Deng tekuy ssotu ne bè yóm hol tahu Dwata lemwót bè yóm deng kessotu tekuy bè yóm Ngaen Jisas Krays. Du se yóm hol tahu Dwata, ne du se gónón lemwót yóm klowil laen dù sónen.

Kul Nmò 8:10

Tódô kdéen tau bè yóm benwu yó, lenwóten bè yó kem tau glaan kkólen bè yó kem tau hol geta, tey gel khungol le du. Yó gel mon le, “Yóm kun ktulus ni, tódô lemwót bè Dwata, yóm gel mon le, ‘Hol Tahu Tulus Dwata.’ ”

Hbakuk 2:14

Okóm angat wen kdawen tódô kdéen tau talak tonok angat gotu temngón du yóm tey kun keklóón Dwata. Yóm ketngón le du yó, tódô lenngeben klamangen tonok lómón mohin, tódô lengeb él.

1 Tutul Israél 28:9

Ne uu, ngau Selumun, yake holi setngón ke Dwata yóm Dwata yó kem fuem. Hol nmoem yóm hmoen kóm Dwata, ne hol hewótem lem but blututem yóm óyóem hol mimón du. Yakà yóm Dwata yó, gotu tonen yóm nô lem hendem yóm ket tau, ne gotu tngónen yóm kdê atulen ne kdê hendemen. Ke hnebelem Dwata, dohò se ktonem du. Okóm ke tebelem, bud laen kô dù tul sónen yóm kdohò yóm kekbéen kóm.

Isaya 2:3

Ne yó angat mon le, “Lemwót tekuy ne mneged ebè yóm bulul Dwata, hlós tekuy ebè Gónô yóm Dwata yó kem tau Israél. Angat toloken tekuy yóm kun kóyô bélê tekuy ne angat lolò tekuy yó kem lan hloloen tekuy. Abay se yóm kun tolok Dwata, bè Jirusalim gónón lemwót. Bè yó gónón gel mudél ebè yó kem kun tau, bè yóm bulul gel boluy le du Sayun.”

Isikél 34:30

Yóm nmou bélê le ni, bè ni gónó le temngón du ou se yóm sana kul Dwata hol gónó mogot yóm tendo nô bélê le. Ne tngón le se kul yó kem tau Israél ou se mfun kul, udél yóm sana Dwata hol dandónen geta.

Isra 7:25

Ne uu, Isra, lemwót bè yóm tey khulung hedem blayen kóm yóm kóm Dwata, uu fen mélék kul yó kem tau mò fen mogot du yó kem fsinà ye ne mò fen kmukum yóm kdê ye nô fi desdef Él Yufratis. Nélékem yó kem tau temngón du yó kem kun Hlau yóm kuy Dwata. Hol bud tolokem yó kem Hlau Dwata yó bè yó kem tau là deng temngón du he.

2 Tutul Israél 30:22

Tey kdóyón Hisikaya kul yó kem sfu Libay bè yóm tey dê kenhulung hegfan le bè yóm kmò le nmò bè Dwata. Duhen yó, hitu kdaw le mò du yóm kehligal yó. Dsù le yóm dsù mit sefyu ebè Dwata, ne gotu benkas yó kem tau ebè Dwata yó kem salà le bè yóm Dwata yó kem tehe fù le.

Jirimaya 6:13

“Tódô lenwóten bè yó kem tau leneken kkólen bè yó kem tau lebangen, gel snukat le kem dumu le, nwa le yóm là kul du. Balù yó kem dumu tugodu ne yó kem tau blóng ebéléu, bud yó se kul nmò.

Jirimaya 42:1

Omin le gotu mógów ebè Jirimaya yóm kdéen genlal bè yó kem sendalù Israél, mung kul Juhanan yóm ngà Kariya logi ne Jisanaya yóm ngà Husaya logi ne kdê yó kem tau kewóten bè leneken kkólen bè lebangen, gotu le mógów ebè

Jirimaya 42:8

Duhen yó, htaba Jirimaya Juhanan yóm ngà Kariya logi ne yó kem genlal bè yó kem sendalù ne kdê yó kem tau kewóten bè leneken kkólen bè lebangen.