Hibru 8:1 - Udél Dwata: Gna Kesfasad ne Lomi Kesfasad

¹ Yó hol bótóngen yóm deng tulón me kuy ni koni, deng wen yóm tau hol tahu gulit mò blóng tekuy ebè Dwata. Ne ni deng myón fi bè kwanan Dwata, yóm hol geta bè longit.

Hibru 8:1 Referans Kwoze

Kulasi 3:1

Deng homong Dwata tekuy ne bè yóm tehe kehlowilen ke Krays gu lem hatay. Yó gónóm mon, yake hol hendem tekuy dé yó kem gel nô bè longit. Bè yó se hol gónóhen nô Krays, deng myón fi bè kwanan Dwata.

Hibru 1:3

Yóm kun kegeta Dwata, deng hol tódô tahu gfan bè yóm Ngaen yó. Yóm kun kmò Dwata, yó se kun kmò yóm Ngaen. Du fen mkem du yóm kdê nmoen hlanen bè yóm udélen alì mfasang. Timbow kogol yóm tehe kkóhen salà kdéen tau, tódô mulék ebè longit, ne myón fi bè kwanan yóm Dwata alì mfasang bè kdéen.

Deng Hegfan 3:21

Yó kem tau gel matù bè yó kem sidek gel sut, angat wen kwalis blayu kul anì gemyón le klohoku bè yóm gónóhu myón kmamal yóm klamangen. Yóm katù le yó, hol lómón se yóm deng dou katù, ne kyónu klohok Mà bè yóm gónóhen myón kmamal se kun.

Hibru 12:2

Bê tekuy kó mata dé yóm Jisas. Du se hol lewóten yóm kehtahu tekuy, ne bud du se hol nefeten. Tódô henbalahen yóm tehe ktutuk le du bè kros. Bè ktahuhen, lemwót bè yóm kligal hendón nangaten, là dog suen du bè nawahen yóm tey kyaken bè yóm katayen yó. Ne nim kmoen ni, fen myón fi bè kwanan Dwata ditu bè longit.

Hibru 2:17

Bè yóm któbóngen tau, là gbeken du ke là nan tódô hbaling tau anì mkél bélê tekuy kem dumuhen setwoli. Yó gónón na gbót bè yóm kmò tekuy anì du mò blóng tekuy ebè Dwata, ne anì là mili nawahen mò du bélê tekuy, ne anì hol knoduhen tekuy. Bè yóm keseblóngen yó, yó se gónó Dwata hmifót salà tekuy.

Hibru 10:12

Okóm ke Krays, tek suléken demsù klowilen mò hkó salà yó kem tau, ne wen ktueden yóm dsuen yó efet kól bè hol sónen. Ne kogol yóm kedsuen, ominen tódô myón fi bè kwanan Dwata,

Mika 5:4

Bè yóm angat ksut yóm tau mogot benwu yó, tódô mdà lem blóng le, gotu nalaken yó kem kun tau mlan bè yóm kgis lemwót bè Dwata ne mung du yóm tey kegeta boluy yóm kun Dwata yó. Ominen yó kem tau nalaken, balù udì ke wen hemen le abay se tódô lenngeben klamang benwu yóm tey kegetahen.

Kem Lingón 104:1

Hotuhu nawahu dmóyón ke Dwata. Ó Dwata, uu se yóm gónóhu mogot, tey kegetahem. Yó henged nes knóón lesekem, duhen yóm kegetahem ne yóm tey klinggelem.

Kem Lingón 21:5

Deng tey kegetahen lemwót bè yóm kehegmoem du. Lemwót béléem yóm tey keklóónen ne yóm tey kegetahen.

1 Tutul Israél 29:11

Uu se, Dwata, yóm hol geta, laen dù là gbekem du. Bud uu se yóm alì knóón, yóm gel gemmò bè kem hmohon kóm. Uu se yóm hol dandónen geta. Yóm kdê nô bè longit ne te tonok hono kóm funen, Dwata. Uu se kmamal yóm klamangen. Bud uu se yóm hol dandónen geta senta yóm kdéen.

Hibru 1:13

Balù sotu bè yó kem gel hógów Dwata ke deng gónón e mon du, “Myóni bè ni fi bè kwananu. Angat ndau lu elaan he yó kem hmohon kóm.”

Ifisus 6:20

Yakà ni du gónó Dwata hógów dou, ne ni se yóm lewót gónóhu geblanggù. Hol hni ye ou anì là likoe mit du yóm Tulón Hyu deng sigang Dwata tahu.

Kem Lingón 145:12

anì kdéen tau gotu temngón du yóm tendo gel nmoem, ne yóm tey klinggelen yóm kóm kogot.

Kem Lingón 110:1

Yó udél Dwata bè yóm gónóhu mogot, monen, “Myóni bè ni bè kwananu efet gotu heglaanu lu bè soluhem yó kem hohonem, lómón ke nmou lu mò gónóm hmótól tihem.”

Mark 16:19

Kogol yóm kudél Jisas ebélê le, ominen tódô ganag haway etta bè longit, ne myón fi bè kwanan Dwata.

Hibru 3:1

Ó kem dumuhu setwoli, yóm deng tnaba Dwata mò kem tauhen. Hol hendem tekuy dé Jisas. Du se yóm deng hógów Dwata elem blóng tekuy mò fen blóng tekuy ebè Dwata bè yóm kehtahu tekuy.

Hibru 4:14

Duhen yó, hol hbegel tekuy yóm kehtahu tekuy. Yakà wen yóm tey hyu fen semblóng tekuy ebè Dwata, deng gna kól ditu ne bè soluhen. Du se Jisas, yóm Ngà Dwata.