Hibru 7:25 - Udél Dwata: Gna Kesfasad ne Lomi Kesfasad

²⁵ Duhen yó, ke hlan tekuy béléen yóm kehloni tekuy ebè Dwata, nô kihu kdaw tekuy tô mò du, hol là gbeken du ke là lenwaen tekuy gu lem hatay. Lemwót bè yóm kun là katay, yó gónón là skó yóm knihen tóbóng bè Dwata bélê tekuy.

Hibru 7:25 Referans Kwoze

Sulat Pol Ebè Yó Kem Tau Hemtahu Bè Rom 8:34

Ne laen se dù tau gembek bud tmuled kul. Tek són Krays Jisas, okóm deng mom du yóm fen matay bélê tekuy ne deng bud hlowil Dwata, hyónen bè kwananen. Ne du mò fen blóng tekuy ebéléen nim kmoen ni.

1 Timuti 2:5

Yakà tek sotu du Dwata, ne tek sotu se yóm blóng tau ebè Dwata, duhen yóm tau boluyen Krays Jisas.

Sulat Jud 1:24

Yó ne kóó. Hol dóyón tekuy dé Dwata. Tek són du yóm gembek tmóbóng tekuy anì là bud tekuy btang. Tek són du gembek mkó du bélê tekuy yó kem salà tekuy anì laen dù sidek tonen bélê tekuy bè yóm kdaw kwiten tekuy bè soluhen. Ngem he tey kligal tekuy bè yóm angat knô tekuy béléen yó.

Kun Snulat Jan 14:6

Bud mon Jisas se, “Ou se yóm lan, ne ou se yóm ktahuhen ne yóm klowil laen dù sónen. Laen kô dù tau gógów ebè Mà ke là mlanen béléu.

Ifisus 2:18

Lemwót bè yóm deng nmò Krays gónón wen lan tekuy hloni ebè Dwata yóm kdê tekuy, kem tau Ju ne kem tau là Ju le. Yóm kehloni tekuy ebéléen yó, hlanen bè yóm Tulus Dwata deng suen bélê tekuy.

Sulat Pol Ebè Yó Kem Tau Hemtahu Bè Rom 5:2

Lemwót bè yóm kehtahu tekuy béléen, deng wen ne lan Dwata tmóbóng tekuy. Tey kligal tekuy yóm angat kwen kut du yóm kun kehyu Dwata sok tekuy gefet bè longit. Yó se hendón nefet nawa tekuy nim kmoen ni.

Hibru 11:6

Ke là hemtahuhen yóm tau, là kô gbeken hefligal ke Dwata. Ke wen tau tô hloni ebéléen, là gbeken du ke là hentahuhen du yóm kwen Dwata, ne yóm kwen ofol blayen bè yó kem tau hloni ebéléen.

Ifisus 3:20

Duhen yó, hol gel dóyón tekuy dé Dwata, lemwót bè yóm alì kegbeken bélê tekuy, tey bong he yóm kun kegbek tmóbóng tekuy senta yóm gel hni tekuy béléen, ne senta yóm gel hendem tekuy snéen.

Isaya 45:22

Beklil ye ebéléu dé anì lenwau yu, yu kem tau bè klamangen benwu. Tek són ou yóm Dwata, laen dù dumuhen.

Hibru 9:24

Yóm gónô Dwata gónó Krays husek yó, sundu gónô nmò tdok tau du, olo hningónen yóm tahu duhen bè longit. Okóm deng kól ditu ne bè longit Krays. Deng mdà bè solu Dwata, abay se du fen semblóng tekuy ebéléen.

Hibru 7:19

Yó gónó Dwata temles du, abay se yóm hlau Musis yó, là gbeken hgulit tekuy. Bede tey hyu yóm tles Dwata du. Deng wen ne lan nmoen gónó tekuy gehloni ebéléen, duhen yó se hol nefet nawa tekuy ni kmoen ni.

Isaya 59:16

Ya tey ketngahen abay se laen dù tau tonen mò tmóbóng yó kem tau gel nongò le, bà sotu. Yó gónóm mon, tódô lemwót bè kun kfasang gónón lemwà kul ne gónón gemmò bè yó kem hohon le.

Kun Snulat Jan 14:13

Balù kihu hni ye bè Dwata hlan ye bè dou boluy,” monen, “tódô blayu kuy mò gónón megdóyón béléu Mà.

Danyél 6:20

Timbow kól bè yó, ominen tmaba ke Danyél igò yóm tey ktafa nawan, monen, “Ó Danyél yóm tóbóng lówó yóm Dwata là matayen, gbeken lemwà kóm bè yó kem liyun kô yóm kóm Dwata tendo nimón?”

Danyél 3:17

Ke botem se mi elem tum tey dilóf ofi, kaem yóm Dwata kum gónó hemtahu gembek lemwà kum. Lenwaen mi lem hólólem.

Hibru 5:7

Bè yóm tolo knô Jisas te tonok ekni, tey khotuhen nawahen gel mni bè Dwata, mung du yóm tey kkiken ne yóm gel kosok lewoken, abay se gbek Dwata lemwà du bè yóm katayen. Lemwót bè yóm keheglaanen bè Dwata ne yóm hol óyóen mimón du, hnungol Dwata yóm knihen ebéléen.

Isaya 53:12

Duhen yó, mon Dwata, angat tey kehegetahu du lem blóng yó kem tau alì tótól ne alì mfasang. Là kô nalihen du klowilen, deng gnómen yóm kul kegtafak yó kem tau mò sidek. Yóm katayen yó mò leyu lówó yóm kdéen tau gemsalà, lelen mni béléu anì hnifótu bélê le yó kem salà le.”

Hibru 13:15

Duhen yó, bê tekuy nmò sónen yóm kdóyón tekuy ke Dwata hlan tekuy bè Jisas, ne hol tulón tekuy bè kem dumu tau Jisas se yóm gónó tekuy mogot. Ni se mò henged dsù tekuy ebè Dwata.

Isaya 63:1

“Tau du se yóm tau kól gu bè syudad Busra bè benwu Idom? Tey alì tilob yóm nes hulô leseken. Tódô mógów hekteng, tódô dilóem béléen yóm tey kfasangen ne yóm tey kgisen. Tau du de tu?” Yóm mógów yó, duhen Dwata yóm hol gónó mogot. Tey wen kfasangen lemwà yó kem tauhen. Yó nógówen nan e tulón yóm deng kegmoen bè yó kem hohonen.

Hibru 7:16

Yóm keseblóngen yó, là lemwóten bè yóm kun kesfu gónó le mélék du, okóm yó gónó Dwata mélék du, abay se tey kfasangen lemwót bè yóm klaen dù sónen yóm klowilen.

Hibru 2:18

Ne ni kmoen ni, gbeken tmóbóng yó kem tau ke wen sindil sut bélê le, abay se deng gnómen se kun yóm sindil, ne deng glayam.

Flipay 3:21

Bè yóm angat kesfuléken edini, tenlesen yóm lówó tekuy mahil matay nii, ne heskélen bè yóm kun lówó là matayen. Yóm kegbeken mò du nim ni, bud yó se yóm kegbeken mogot du yóm klamangen.

Kun Snulat Jan 14:16

Angat wen hnihu bè Mà mò tles bud tmóbóng kuy, ne laen dù sónen yóm knóen bélê ye.

Jirimaya 3:22

“Ó kem ngà là mimón,” mon Dwata, “semfulék ye ebéléu dé anì kóhu bélê ye yóm nawa là mimón nô lem but blutut ye.” Ne yó balà le ke Dwata yó kem tau, mon le, “Tahu se, mulék me ebéléem ne ni, yakà uu du yóm kum Dwata hol gónó mogot.

Isaya 45:24

Ne yó angat mon le, ‘Són uu, Dwata, gónón mlan yóm kegmò me bè kem hohon me, són uu bemlay kum kgis.’ Okóm kdê yó kem kmutó nawa dou, angat tey sidek kehyaku kul.

2 Timuti 1:12

duhen nim gónóhu fen glayam ni. Okóm là kóen mili nawahu, abay se deng tngónu Dwata, yóm dou gentud nawa, ne deng tngónu se yóm kegbeken semgifà du yóm kdê deng sigangen tahu efet kól bè yóm kdaw angat kdau bè soluhen.

Danyél 3:29

Yó gónóm mon, wen udin mget nmou. Bè nim benwu knamalu, ke wen tau balù kihu gónó le gu semfu ne balù kihu benwu le ne balù kihu kay udél le, ke mudél sidek eta yóm kul Dwata le Sadrak ne Misak ne Abidnigu angat nufóku lu, gotu genbau gónô le. Laen kô dù dumu dwata tngónu ke lómón ni kehewaen yó kem kun tau.”

Hibru 7:24

Okóm tólóng yó dum ke Jisas, abay se laen dù tul katayen. Tódô hlós yóm kun keseblóng tau ebè Dwata, laen dù tau mò tlesen.

Danyél 9:16

Ó Dwata, lemwót bè yóm tey kehyu yóm tehe gel któbóngem kum, yó gónó me mni béléem anì béem bud lenbut ne yóm syudadem Jirusalim yóm kóm bulul. Lemwót bè yó kem salà me ne salà yó kem tehe fù me but gónó le alì hemnê yóm benwu Jirusalim ne yó kem tauhem yó kem tau menwu hmilol kum.

Danyél 3:15

Okóm ni, benlayu yu sulék duen. Ke bud gungol ye yóm tey uni féw sguyun mung du yóm kdê dumu huni le ne ke mtud ye uyó bè tonok, laen kô dù gfà ye. Okóm ke là mimón ye, tódô henmung tudà le yu elem tey dilóf ofi tuu. Ke lómón yó, dwata du de tô gembek lemwà kuy lem hólólu?”

Ifisus 3:12

Lemwót bè yóm deng kessotu tekuy bè Krays ne bè yóm kehtahu tekuy béléen, là bud tekuy likò ne hloni ebè Dwata ni kmoen ni, deng tey mgel nawa tekuy du ne yóm któbóngen tekuy.

Hibru 7:8

Yó kem tau gel demsù ebè Dwata, lu fen ma du yóm gesfoloen. Matay le se kul, abay se sana kmò tau. Bong ke Mélkésédék kun, tódô nwahen yóm gesfoloen, bede lemwót bè yóm snulat le bè Sulat Dwata, hol lómón ke là matayen.

Sulat Pol Ebè Yó Kem Tau Hemtahu Bè Rom 5:10

Tey tehe kesfohon tekuy ke Dwata, okóm kun, niten tekuy sefyu hlanen bè yóm le katay yóm Ngaen. Duhen ni, bè yóm deng kesefyu tekuy ke Dwata, milud he bud któbóngen tekuy hlanen bè yóm deng bud kehlowilen ke Krays.

1 Kurin 1:21

Bè kun khulung hedem Dwata, là kô hlanen du bè kul ketngón kem tau tonok yóm kesetngón le ebéléen. Okóm yó gónón hlan du yóm kehewaen kul gu lem hatay, tódô lemwót bè yóm kehtahu le du yóm tulón nwit me, yóm gel mon le tulón laen dù muhen.

Hibru 2:9

Okóm deng ton tekuy Jisas. Bè yóm tehe knóen te tonok, hlun heglaan Dwata bè yó kem gel hógówen gu bè longit anì fen na a matay bè kdéen tau. Yó se mò lan Dwata tmóbóng kul. Okóm ni kmoen ni, deng ton tekuy yóm tey kehegeta Dwata du, ne yóm tey kadat le du lemwót bè yóm keglayamen bè yóm katayen bélê tekuy.