Hibru 6:19 - Udél Dwata: Gna Kesfasad ne Lomi Kesfasad

¹⁹ Yóm hendón nefet nawa monu yó koni, hol lómón ke hihol yóm klowil tekuy. Angat dohò kton tekuy du, abay se deng eles nô ditu Jisas bè yóm hol gónóhen nô Dwata. Yó gónón là megewu nawa tekuy mangat du.

Hibru 6:19 Referans Kwoze

Kem Lingón 43:5

Moen du ke alì sidek keblat nawahu? Moen ni du ke alì sbeweg kegnómu du? Dwata he nefet nawahu, angat wen kdawu bud dmóyón du. Du se yóm lemwà dou, ne du se yóm dou Dwata.

Hlolò 16:15

Kesok deng kmò Aron du yóm yó, ominen hewà nan e hnatay yóm kambing hedsù le du ebè Dwata yó kem tau. Nwahen litô yóm kambing yó ne nwiten elem yóm Dfél hol gónó Dwata nô ne bud hentsiken sulék bè kilil yóm sefeng yóm Slungan Fasad, ne bud hitu duléken hemtsik du bè lówóhen lómón yóm deng gna nmoen bè litô yóm safì tudu kun dsù.

Hlolò 16:2

“Hol tulónem ke Aron yóm twoguhem, béen tódô óyô husek elem yóm Dfél hol gónóhu nô sentu yóm nes seng ye. Abay se bè yó lemen fita yóm sefeng yóm Slungan Fasad gónóhu hegfan mung bè lobun. Ke là nimónen du yóm monu ni, angat hatay tafaku du.

Hibru 9:7

Okóm yóm gewu dfélen, tek sotu tau gusek elemen, tek són yóm tau hol geta bè yó kem gel demsù ebè Dwata, bede tek suléken husek elemen bè yóm sfalay. Ne là kóen na a gusek elemen ke là wen litô nwiten mò dsuen ebè Dwata. Yóm dsuen yó, mò lan Dwata hmifót yóm kun salà, dalang se yóm kul salà deng gmò yó kem dumu tau là gehedem le du.

Hibru 9:3

Ne yóm gewuhen dfél, yó boluy le du, Dfél gónón nô Dwata. Bede wen tey tilob nes mfól seng bè sóólen.

Matyu 27:51

Uma kóm bè yóm Gónô Dwata, wen tey nes mfól mò seng yóm dfél hetfing le ebè Dwata. Bè yóm kilot nawa Jisas, tódô sen-gengen lómón ke hninggel dnólóhem bè gónón sóól yóm nes yó, lemwót fi ta kól elaan. Ne tódô sen-gengen se mbel tey linol bong, tódô gotu meskang se yó kem botu lembang.

Kulasi 3:1

Deng homong Dwata tekuy ne bè yóm tehe kehlowilen ke Krays gu lem hatay. Yó gónóm mon, yake hol hendem tekuy dé yó kem gel nô bè longit. Bè yó se hol gónóhen nô Krays, deng myón fi bè kwanan Dwata.

Kem Lingón 42:11

Moen ni du ke alì sidek keblat nawahu? Moen de ke alì sbeweg kegnómu du? Dwata he nefet nawahu, angat wen kdawu bud dmóyón du. Du se yóm lemwà dou, ne du se yóm dou Dwata.

2 Timuti 2:19

Okóm yóm ktahuhen lemwót bè Dwata, là kóen na a monol. Wen deng hsulat Dwata, yó monen, “Tngón yóm gónó tekuy mogot yó kem kun tau.” Ne sotuhen, “Ke yó udél yóm sotu tau, ke monen, Tauhe yóm gónó tekuy mogot dou, yake hol hlayuk du sen yóm sidek.”

Kul Nmò 27:29

Yó tnafa nawa yó kem tau mit kafal, kô glaf bè hagang yóm kafal. Yó nmò le, hloyol le fat blangaw bè sekéen anì là gógówen elem botu bè kilil mohin yóm kafal. Ya tey kehdón le du ke olò géhél mwas.

Sulat Pol Ebè Yó Kem Tau Hemtahu Bè Rom 4:16

Yó gónóm mon, tek sotu gónó tekuy gmuta du yóm fasad Dwata tekuy, són bè kehtahu tekuy béléen. Yóm fasad Dwata yó, tódô basahen yóm kdéen tau semfu gu bè Abraham. Là són du yó kem tau gel lemolò yóm hlau Musis, okóm gotu gomong snéen yó kem tau hemtahu lómón yóm tehe kun kehtahu Abraham. Abay se yóm Abraham, hol mà kdéen tau hemtahu bè Dwata.

Kul Nmò 27:40

Gotu kenleng le fét yó kem blangawen, tódô hebtang le elem mohin. Ne ntó le snéen yó kem fét yó kem kwa gel semtódô kógów yóm kafal. Ne omin le hekteng eta yóm layal bè kulu yóm kafal anì tedeng kwiten du ebè yóm lusuken yóm lenos. Ne tahu se, hlós me ebè kililen.

Isaya 28:16

Ne ni se udél yóm Dwata hol dandónen geta gónó tekuy mogot, monen, “Wen yó kem botu alì mbegel mò gónón myón yóm beng deng suu bè Sayun mò hol hembegel du yóm Gónô angat hdau bè yó. Wen sotu botu suu bè yó mò hdengen ne wen snulatu du yóm monen, ‘Yóm tau mbegel kehtahuhen, hanayen nawahen.’

Isaya 12:2

Dwata se yóm lemwà do. Són du se do snalig ne yó gónóhu là bud likò. Béléen hol gónón lemwót yóm kgisu ne yóm kligalu, hol du se yóm lemwà do.

Hibru 4:16

Duhen yó, bê tekuy abay likò hloni ebè Dwata, yóm gónón hol nô yóm tóbóng. Ke hloni tekuy ebéléen, angat ton tekuy yóm tey kkoduhen tekuy ne yóm tey kun któbóng bè ket kehtóbóng tekuy béléen.

Ifisus 2:6

Lemwót bè yóm deng kessotu tekuy bè Krays Jisas, deng homong Dwata tekuy ne bè yóm le klowilen du gu lem hatay, ne bud homongen tekuy snéen bè yóm deng kehegetahen du ditu bè longit mò mogot klamangen.

Kem Lingón 42:5

Moen ni du ke alì sidek keblat nawahu? Moen de ke alì sbeweg kegnómu du? Dwata he nefet nawahu, angat wen kdawu bud dmóyón du. Du se yóm lemwà dou, ne du se yóm dou Dwata.

1 Kurin 15:58

Yó gónóm mon, kem dumuhu sogot nawa, hol hbegel ye dé kehtahu ye, bê ye abay hili nawa ye. Bê ye abay senkó mò du yóm hmoen kuy yóm gónó tekuy mogot, abay se deng hónô tngón ye, kdéen nmò tekuy bè yóm gónó tekuy mogot tey wen uléken.

Kem Lingón 39:7

Duhen ni, Dwata, tau du de nefet nawahu? Tek són sem uu.

Sikaraya 9:12

Ó kem tau negef, deng wen nefet nawa ye ne ni, hol ye bud semfulék ebè yóm sana kuy benwu, yóm benwu gónón laen dù hemen ye. Wen fasadu kuy kemdaw ni, lewu duléku he bud hulék du ebélê ye yóm tóbóngu kuy bè ket keglayam ye.

Kul Nmò 23:6

Timbow dilô Pol wen se Sadyusi ne wen se kem Farisi bè yó kem tau mogot kukum, ominen hgel udélen, monen, “Kem dou dumu tau Israél, ou snéen sotu Farisi. Dalang se yó kem tehe fuu, Farisi le snéen kul. Ni se duón yóm kkukum ye dou ni abay se hentahuhu yóm angat klowil tau.”

Sulat Pol Ebè Yó Kem Tau Hemtahu Bè Rom 4:18

Bè Abraham kun, balù yóm là keglileben du yóm kehlan Dwata du béléen yóm fasaden yó, tódô hentahuhen, ne henlelen hemdón du yóm kdohoen ebéléen. Yó gónóm mon, du se baling “mà yó kem tey dê kay but tau bè klamangen benwu.” Hol lómón yóm monen bè Sulat Dwata, yó monen, “Angat dê semfu gu béléem, hol lómó kwen le blotik bè longit.”Bè yóm kdaw kfasad Dwata ke Abraham yó, móyónen gefet bè lematu ne halay Abraham, ne tódô tngónen là buden mngà. Lelen atil he Sara, yóm tuha libunen. Ewenem là kóen monol yóm kehtahuhen du yóm fasad Dwata du bè yóm angat kwen ngaen.

Sulat Pol Ebè Yó Kem Tau Hemtahu Bè Rom 5:4

Ne yó bud uléken yóm kehbala tekuy yó, duhen yóm kehyu nawa Dwata ebélê tekuy. Ne ke hyu nawa Dwata bè yóm kmò tekuy, yó gónón temnù kgel nawa tekuy du yóm hyu hendón tekuy yó.

1 Kurin 13:13

Duhen ni, wen tlu yóm laen dù mtukul sónen, duhen yóm kehtahu tekuy bè Dwata, ne yóm hendón tekuy béléen, ne yóm kesbong tekuy nawa. Ne bè nim tlu ni, yó alì bong muhen, duhen yóm kesbong tekuy nawa.

Kulasi 1:27

Kun kóyô Dwata ke hegfanen bè yó kem kun tau ni kmoen ni yóm tehe gbuni bè yó kem tau gnan, duhen yóm tey któbóngen yóm kdéen tau bè klamangen benwu. Yóm tehe bunihen yó ekni, duhen yóm knô Krays bélê ye ket kuy ne sotu. Bè yóm knóen bélê ye yó, yó se gónó ye temngón du yóm angat kegbót ye bè klaen sónen kun klowil Dwata.

1 Pitér 1:3

Hol dóyón tekuy dé Dwata. Du se kun Dwata yóm gónó tekuy mogot Jisas Krays, ne bud Maen snéen. Tódô lemwót bè yóm tey kkodu Dwata tekuy, wen yóm lomi klowil blayen tekuy hlanen bè yóm tehe klowilen ke Jisas Krays gu lem hatay. Ne yó se yóm hendón tekuy yóm klowilen tekuy hulin kdaw snéen.