Hibru 6:11 - Udél Dwata: Gna Kesfasad ne Lomi Kesfasad

¹¹ Yó hol hesgalu me kuy, yóm ket kuy na sotu, ke hol henlel ye mò du yóm hyu efet kukol towok ye, anì angat ton ye yóm hendón nefet nawa ye.

Hibru 6:11 Referans Kwoze

Hibru 3:6

Okóm ke Krays kun, du se hol kun Ngà Dwata, ne gotu hfogot Dwata du yóm gónóen yó, ne tey teneb kogoten du. Tekuy se kun gónô Dwata, syan ke là likò tekuy lemolò du, ne ke hol gentud nawa tekuy yóm hendón nefet nawa tekuy.

2 Pitér 1:10

Duhen yó, kem dumuhu setwoli, hol hotu ye són gel ye mò du nim monu ni koni mò gónó ye hton du yóm deng tehe ktaba Dwata kuy, ne yóm deng kéléken kuy. Ke henlel ye mò du nim ni, là kô na ye e gbek kmogol du yóm kehtahu ye bè Dwata.

Hibru 3:14

Són gónó kuy hlós mò kun dumu Krays ke là kó tekuy du yóm tehe kegtud nawa te du.

Hibru 10:22

Yó gónóm mon, hol tekuy hloni ebè Dwata dé. Hol hewót tekuy lem but blutut tekuy yóm kehloni tekuy yó, mung du yóm hol kehtahu tekuy béléen. Yakà deng hólósen tekuy Jisas, yó gónón deng mkó ta tekuy ne yó kem salà tehe gel hemblat tekuy. Hol lómón ke deng denyohen tu lem yóm tey él tikaw.

Deng Hegfan 2:26

Yó kem tau gel matù bè yó kem sidek gel sut, ne glolò le yóm dou kóyô efet kól bè yóm hol són kdaw, angat wen kwalis blayu kul, hol skél bè yóm kwalis tehe blay Mà do, duhen yóm kwalis mogot benwu. Tey mfasang yóm kukum hogotu kul. Ke wen là mimón kul, lómó kmò le kul ke bnogul le bala tók yóm kuleng tonok. Ne blayu kul snéen yóm blotik semla, yóm alì gel mnóng móyón mwas.

1 Jan 3:14

Deng tngón tekuy se yóm deng kegewà tekuy gu lem hatay, ne yóm deng kili tekuy ebè yóm klowil laen dù sónen. Yó gónó ye temngón du, abay se bong nawa ye yó kem dumu ye. Okóm yóm tau ke là kenbong nawahen kem dumun, yó se yóm tau tolo golu elem hatay.

2 Pitér 3:14

Ke ni se yóm sensangat tekuy yu kem weu, hol tilów ye són gel ye mkó du ke wen belenen yóm gel nmò ye anì laen dù duón Dwata kuy sok kól, ne anì wen kenek nawa ye.

1 Pitér 1:21

Mlan bè Krays yóm gónó tekuy hemtahu bè Dwata, yóm Dwata tehe hlowil du gu lem hatay, ne tey kehegetahen du. Yó gónón alì mbegel yóm kehtahu tekuy bè Dwata ne yóm hendón tekuy béléen.

2 Tisalunika 3:13

Okóm bélê ye kuy, kem dumu me setwoli, bê ye abay htakas mò du yóm hyu.

Sulat Pol Ebè Yó Kem Tau Hemtahu Bè Rom 15:13

Yó hem Dwata hol bemlay kuy yóm kligal ne yóm kenek nawa lemwót bè yóm deng kehtahu ye béléen. Du se yóm nefet nawa tekuy. Ne lemwót bè yóm tey kfasang yóm Tulus Dwata gónón hol seflós temnù yóm hendón nefet nawa ye.

Isaya 32:17

Lemwót bè yóm kmò le tedeng yóm kdê le, angat tey menek kbenwu le ne laen kô dù tul sónen yóm klaen dù knikò le.

1 Tisalunika 4:10

Ne bè ktahuhen, yó se yóm deng gel nmò ye bè kdê yó kem dumu ye hemtahu bè klamangen Masdunya. Okóm, kem dumu me setwoli, yó hol sen-galu me bélê ye ke hol henlel ye mò du.

1 Tisalunika 1:5

Abay se bè yóm tehe kwit me ebélê ye yóm Tulón Hyu, là kô olo udél tau du se yóm yó, okóm tódô gmung bè yóm udél me yóm kun kfasang yóm Tulus Dwata, ne tódô gnóm me se kum yóm hol ktahuhen yóm tulón nwit me yó. Ne deng ton ye snéen yóm kum kmò bè yóm tehe knô me bélê ye dyó, hono bè kuy kehyu nim nmò me ni.

Kulasi 1:5

Bè yóm hol tanay kungol ye du yóm tahu tulón, duhen yóm Tulón Hyu, gungol ye yóm kwen nefet nawa tulónen. Yó se hol buten yóm kehtahu ye ne yóm kbong nawa ye kem dumu ye, duhen yóm hendón nefet nawa ye deng eles tgama Dwata kuy bè longit.

Flipay 3:15

Yóm kdê tekuy deng malay kehtahuhen, yake lómón ni dé kehedem tekuy. Okóm ke wen bélê ye tólóng kehedemen, heglileb Dwata kul he nim ni.

Glasya 6:9

Duhen yó, bê tekuy abay htakas mò du yóm hyu, abay se angat wen tey guta tekuy du ke là htakas tekuy.

1 Kurin 15:58

Yó gónóm mon, kem dumuhu sogot nawa, hol hbegel ye dé kehtahu ye, bê ye abay hili nawa ye. Bê ye abay senkó mò du yóm hmoen kuy yóm gónó tekuy mogot, abay se deng hónô tngón ye, kdéen nmò tekuy bè yóm gónó tekuy mogot tey wen uléken.

1 Kurin 13:13

Duhen ni, wen tlu yóm laen dù mtukul sónen, duhen yóm kehtahu tekuy bè Dwata, ne yóm hendón tekuy béléen, ne yóm kesbong tekuy nawa. Ne bè nim tlu ni, yó alì bong muhen, duhen yóm kesbong tekuy nawa.

Matyu 24:13

Okóm hol ye hbala efet kól bè sónen anì angat guta ye yóm klowil laen dù sónen.

1 Jan 3:19

Bè yóm kbong nawa tekuy kem dumu tau gónó tekuy hol temngón du yóm deng klolò tekuy yóm ktahuhen. Bud bè yó snéen gónó tekuy là myak bè solu Dwata.

Kulasi 2:2

Yó gónów mò du anì wen lanu temgel nawa ye, ne anì wen kessotu nawa ye lemwót bè yóm kesbong nawa ye. Kóyóu ke hol mbegel kehtahu ye lemwót bè yóm deng ketngón ye du yóm ktahuhen. Ke lómón ni se kmoen, tngón ye yóm tehe buni Dwata bè yó kem tau gnan, duhen Krays.

Kulasi 1:23

Song tahu eta ye nim ni ke là monol nawa ye bè yóm kehtahu ye. Yó gónóm mon, hbegel ye yóm kehtahu ye anì là sliwo kehedem ye du yóm hendón nefet nawa ye lemwót bè yóm Tulón Hyu deng gungol ye. Nim Tulón Hyu monu ni, deng gefet bè kdéen tau bè klamangen benwu ne, ne ou Pol sotu tóbóng lówó Dwata mò fen heglalag du.

Sulat Pol Ebè Yó Kem Tau Hemtahu Bè Rom 12:8

Ne ke yó blayen khulung semgduf kem dumu tau, hol nmoem sen. Ke yó blayen kóm yóm nawa masa, hol bnasahem kem dumum sen. Ke yó blayen kóm khulung malak yó kem dumuhem tau, holi tódô hteneb mò du sen. Ne ke yó kenhulung blay Dwata kóm mò gel tmóbóng yó kem élél, hol nmoem sen mung du kligalem.

Glasya 5:5

Okóm bélê tekuy du, són ken-gel nawa tekuy yóm nmò Dwata bélê tekuy mò gónón tedeng ktonen tekuy. Kun kfasang yóm Tulus Dwata mò du nim ni, hlanen bè yóm kehtahu tekuy. Ne yó se yóm tendo nangat tekuy.

Kun Snulat Luk 1:1

Deng dê ne tau hmotu gel le smulat du yóm deng nmò Jisas lem blóng me.

Juswa 7:3

gotu tulón le ke Juswa yóm kdê ton le, mon le, “Là katen bong tum syudad tu. Anien he ke là kdéen du tau mundug edu. Anien ke olon lewu libu duhen ke tlu libu tau mundug etu, kaem gbek le.”