Hibru 5:12 - Udél Dwata: Gna Kesfasad ne Lomi Kesfasad

¹² Tey deng kegen ye hemtahu, yake deng ye kem olò hulung tmolok ne yóm Udél Dwata bè kem dumu ye. Là myó. Hyu ke wen tau na bud tmolok kuy yóm hol tanay dnalang yóm tau hemtahu lemwót bè yóm Udél Dwata. Yó gónóhu e hmingun kuy, hol lómón yóm ngà tolo tmutù. Là deng gbeken du he mken du yóm mgel.

Hibru 5:12 Referans Kwoze

Hibru 6:1

Duhen yó, yake hlós tekuy dé bè yóm tolok gónó tekuy baling gulit. Laen dù mu tekuy bud semsulit du yóm hol tanay dnalang tekuy bè yóm tehe kbut tekuy hemtahu. Bê tekuy abay bud sensulit yóm tehe ktagak tekuy yóm dê lolò laen dù muhen bè yóm deng kehtahu tekuy bè Dwata.

1 Pitér 2:2

Hkél ye bè yóm ngà lomi sut, són nô bè nawahen tmutù ne yó gónón baling lemnok. Yake són Udél Dwata nô bè nawa ye se kuy mò henged kuy tutù anì lemnok kehtahu ye.

Hibru 5:13

Ne yóm ngà tolo tmutù monu yó, hningónen yóm tau là deng hol tngónen du he yóm kmò kimónen yóm Udél Dwata anì tedeng kmoen.

Kulasi 3:16

Hol sù ye bè nawa ye yóm tey hyu gel dnalang ye gbak ebè Krays. Hol ye gel stolok ne seflau lemwót bè yóm khulung ye hedem. Ne gel sngal ye dé yó kem lingón nô bè bok Lingón, dalang se yó kem dumu sngal Dwata. Semngal ye ebè Dwata, hol hmung ye du snéen yóm alì kdóyón ye du.

Kem Lingón 34:11

Ó kem weu lomi lemnok, hol hnungol ye ou. Wen toloku kuy anì wen klikò ye ke Dwata.

Matyu 17:17

Omin Jisas mudél, monen, “Yu kem tau kmoen ni, alì ye hemda. Gel sekban yóm kehedem ye. Deng tey kegenu ne nô lem blóng ye, ne deng tey kehlawihu nawahu bélê ye. Nitem edini kun yóm ngaem.” Tahu se, niten ebéléen.

Isaya 55:1

Yó udél Dwata, monen, “Ó kem tau meeng, géhél ye edini ne ni wen él mò ninum ye. Ó kem tau laen dù filak le, géhél ye edini ne ni wen mò ken ye. Géhél ye edini ne ni wen mò ninum ye. Là heblihu du kuy nim ni.

Isra 7:10

Nim Isra monen ni, tódô hotuhen nawahen hemnagì du yó kem hlau Dwata, lelen mimón du ne gotu toloken yó kem tau Israél yóm kdê deng hlolò Dwata kul.

2 Samwél 16:23

Bè yóm kdaw yó, ket hlau Ahitufél sal lolò Absalum lómón yóm tehe kun gel klolò du Dabid. Abay se yóm kmò kehedem le du yóm hlau Ahitufél kul, hlau lemwót bè Dwata.

1 Pitér 4:11

Ke uu yóm sotu tau wen khulungen tmolok, tódô tolokem sen yóm Udél Dwata. Ke uu sotu tau wen khulungen tmóbóng, hol hlanem bè yóm kgis deng blay Dwata kóm yóm któbóngem kem dumuhem. Ke hyu kwit ye du yóm kenhulung blayen kuy, tey megdóyón Dwata mlan bè yóm któbóngen kuy Jisas Krays. Dwata se yóm hol knóón megdóyón, ne sónen du se yóm hol mfasang. Hol bê ye abay nmò sónen yóm kdóyón kuy du.

1 Kurin 14:19

Ewenem yó, bè yóm gel ksimba tekuy, mom hyu he ke tek limu udélu ebélê ye bè yóm ktoloku kuy, syan ke tngón ye lanen. Hyu yó senta yóm hilu libu udélu bè yóm udél là tngón ye du lanen.

Sulat Pol Ebè Yó Kem Tau Hemtahu Bè Rom 3:2

Igoen tey bong muhen yóm ktau tekuy Ju. Yó hol tanayen, tekuy se fen gónó Dwata hogot du yóm kun sulat.

Kul Nmò 7:38

Nim Musis ni, du se nô lem blóng yó kem tau Israél ekni ditu bè yóm benwu laen dù tau menwu du. Tódô nô lem blóng yó kem tehe fù tekuy. Bud du se yóm tehe mógów eta yóm Bulul Sinay, ne wen hógów Dwata gu bè longit mudél ebéléen. Hlan Dwata bè Musis se yó kem hlau blayen tekuy, yóm hlau laen kô dù tul sónen.

Mark 9:19

Ne mon Jisas se mò kul, “Yu kem tau kmoen ni, alì ye gel hemda. Igò tey deng kegenu nô lem blóng ye, ne tey klawi nawahu bélê ye. Nitem edini sen yóm ngaem.”

Flipay 3:1

Ni hol són yóm tulónu kuy, kem dumuhu setwoli. Hol ye gel hligal dé lemwót bè yóm deng kessotu ye bè yóm gónó tekuy mogot. Wen bud sensulitu bélê ye yóm tehe snulatu bélê ye anì là tlas ye.

Isaya 28:13

Yó se gónó Dwata tmolok kuy mlan bè ket sotu betek ne bè ket sotu ktol ne bè ket sotu hennagì. Bè yóm angat kegef le kuy sónmò ye tlokob. Ne wen tey halì ye laen kô dù lan ye gewà, yakà deng ye gotu baling tau negef.

1 Kurin 14:20

Bè ni kem tulónu kuy ni koni, kem dumuhu setwoli, bê ye abay heskél yóm kuy kehedem bè knawa ngà. Yó dé dnalang ye bélê le yóm là khulung le matul mò du yóm sidek. Okóm bè yóm kmò kehedem ye du nim toloku kuy ni, yake kehedem tau tmuha dé kehedem ye du.

Glasya 4:3

Hol lómón yó se yóm kmò tekuy. Yóm gu laan tekuy là deng gulit bè kehtahu tekuy, lómón ke tolo tekuy ghesek bè yó kem dê hlolò le tekuy yó kem tau lem benwu.

Hibru 5:11

Bè ni kem tulónu kuy ni koni, tey dê he yóm tô nóyô tulón me kuy, okóm tey mgel tmulón du kuy, abay se laen dù hol óyô ye dmalang.

Hibru 10:32

Okóm tekuy, hol hentulón ye nawa yóm tehe kdaw ye ekni, yóm kdaw tehe kehlayag Dwata lem hendem ye. Tey sidek tehe keglayam ye lemwót bè yóm deng kehtahu ye, okóm là gwiten kuy.