Hibru 3:1 - Udél Dwata: Gna Kesfasad ne Lomi Kesfasad

¹ Ó kem dumuhu setwoli, yóm deng tnaba Dwata mò kem tauhen. Hol hendem tekuy dé Jisas. Du se yóm deng hógów Dwata elem blóng tekuy mò fen blóng tekuy ebè Dwata bè yóm kehtahu tekuy.

Hibru 3:1 Referans Kwoze

2 Timuti 1:9

Deng lenwà Dwata tu gu lem hatay, ne tnabahen tu anì baling te kun tau. Sundu ke bè yóm hyu deng nmò te gónón lemwà kut, kaem tódô lemwót bè yóm kun kóyô tmóbóng kut. Yóm któbóngen kut yó, hlanen bè Krays Jisas gu laanen là deng dmimun du nim benwu ni.

Flipay 3:14

Yó gónóm mon, tódô henktengu yóm dou klóy efet gutahu yóm ofol blay Dwata do, duhen yóm klowil bè longit, yóm tehe tabahen dou hlanen bè Krays Jisas.

Hibru 7:26

Duhen yó, Jisas se yóm mò blóng tekuy ebè Dwata, yóm hol hulung tmóbóng tekuy. Tey kólósen. Laen kô dù sidek duhen ke salà ton tekuy béléen, Deng sentólóng Dwata bè yó kem tau gemsalà, ne tey kehegetahen du ditu bè longit.

Ifisus 4:1

Duhen ni, wen hlolou kuy, ou se yóm tau deng geblanggù lanu mò du yóm hmoen dou yóm gónó tekuy mogot. Bê kwit ye ktau ye, hol nmò ye sen yóm nmò seklóón ebè yó kem tau deng tnaba Dwata.

1 Pitér 2:9

Okóm yu kem tau deng hemtahu béléen, deng nélék Dwata yu mò hol kun tau. Yu se yóm henged demsù ebéléen. Yu se kem tau hol kun nogot, kem tau hol nfunen. Deng néléken yu anì hol heglalag ye bè klamangen yóm tey hyu deng nmoen bélê ye. Deng tnabahen yu igò ye tolo nô lem gónón kmifu anì mili ye ebéléen bè tum gónón alì lemayag.

Hibru 2:17

Bè yóm któbóngen tau, là gbeken du ke là nan tódô hbaling tau anì mkél bélê tekuy kem dumuhen setwoli. Yó gónón na gbót bè yóm kmò tekuy anì du mò blóng tekuy ebè Dwata, ne anì là mili nawahen mò du bélê tekuy, ne anì hol knoduhen tekuy. Bè yóm keseblóngen yó, yó se gónó Dwata hmifót salà tekuy.

Hibru 10:21

Tey geta yóm fen semblóng tekuy ebè Dwata, yóm fen mogot du yóm kun gónô Dwata.

Ifisus 4:4

Tekuy kem tau hemtahu, hol lómón ke deng ssotu lówó tekuy. Tek sotu snéen yóm Tulus Dwata. Ne tek sotu se yóm hol hendón nefet nawa tekuy, duhen yóm deng taba Dwata tekuy.

1 Tisalunika 2:12

Tey gel kegduf me kuy, ne tey gel kehyu me nawa ye, lel me tendo gemduf kuy anì gmò ye yóm gónón hligal Dwata. Du se tehe tmaba kuy anì gomong ye bè yó kem tau nogoten ne bè yóm tey kegetahen.

1 Kurin 9:23

Yó gónóhu mò du nim ni anì hol mból yóm Tulón Hyu nwitu, ne anì wen se dou du bè yóm hyu gel tulónen lemen.

2 Timuti 2:7

Hol hendemem ni kem monu mò kóm ni, ne Dwata he hol fen heglileb du kóm.

1 Timuti 6:12

Hotuhem gelem bè yóm kloloem ke Krays Jisas anì gutahem yóm klowil laen dù sónen. Yakà yó du gónó Dwata tehe tmaba kóm bè yóm tehe deng ktulónem du lem blóng yó kem tey tau wen yóm deng kehtahuhem.

Sulat Pol Ebè Yó Kem Tau Hemtahu Bè Rom 15:8

Tódô tulónu kuy, deng hógów Dwata Krays mò tmóbóng yó kem Ju. Ne yó gónón dohò yó kem tehe fasaden bè yó kem tehe fù le ekni.

Hibru 2:11

Du se gembek hólós tekuy bè yó kem sidek gel nmò tekuy. Ne tekuy se yó kem tau hólósen gbót menmà béléen bè Dwata. Yó se gónó Jisas là kemyak moluy tekuy kem dumuhen setwoli.

Kun Snulat Jan 20:21

Ne bud mon Jisas mò kul, “Dwata he hol henek nawa ye. Lómón yóm tehe khógów Mà do, hol lómón yó se bud khógówu kuy.”

Hagay 1:5

Là getnef ye du kô yóm kmò kógów klowil ye?

Kem Lingón 110:4

Deng wen safà Dwata, ne là kô nan e bud hulék du lem baken, monen, “Uu se mò blóng tau ebéléu kól bè laen kô dù tul sónen lómón yóm tehe keseblóng Mélkisédék tau ebéléu.”

Sulat Jud 1:1

Ou se Jud gónón lemwót nim sulat ni. Ou se yóm sotu tau mò tóbóng lówó Jisas Krays, ne ou se yóm twoli Jim. Smulate ebélê ye yu kem tau deng tehe tnaba Dwata. Tey kbong nawahen kuy Dwata, yóm Mà tekuy bè longit, ne tey gel kofinen kuy Jisas Krays.

Hibru 3:14

Són gónó kuy hlós mò kun dumu Krays ke là kó tekuy du yóm tehe kegtud nawa te du.

Isaya 1:3

Mom hyu he yó kem safì gotu tngón le yóm fun le. Senged se yó kem kudà gotu tngón le yóm gónón hemken kul yóm kul fun. Bede yó kem dou tau Israél là kô tngón le du kul. Bà udì ke glileb le yóm deng nmou bélê le.”

1 Timuti 6:2

Hol néen ke hemtahu bè Dwata yóm mfun kul, là hyuhen ke là nimón le du, yakà deng le setwoli bè Krays. Mom monem yó ne hol keged le mò nmò bélê le, abay se yóm tau gmuta du yóm len-ged le, kul dumu hemtahu kenbong nawa. Hol henkimedem tmolok du kul ni kem ni, ne hol gendufem lu mò du.

2 Tisalunika 2:14

Ni se lemen yóm gónó Dwata tmaba kuy ebéléen hlanen bè yóm Tulón Hyu tehe tulón me kuy. Yó gónón tmaba kuy anì gomong ye bè yóm kun kegeta yóm gónó tekuy mogot Jisas Krays.

2 Tisalunika 1:11

Yó gónóm mon, tey gel kni me bélê ye bè Dwata. Yó hni me anì baling hol segtón yóm kuy kmò ebè yóm tehe kun kóyô Dwata bélê ye bè yóm tehe ktabahen kuy. Dwata he hol tmóbóng kuy lemwót bè kfasangen anì gmò ye yóm kehyu kmò gel nalu nawa ye, ne yóm hyu tô nmò ye lemwót bè yóm kehtahu ye.

1 Tisalunika 5:27

Hesfalahu kuy nim sulat ni lem blóng yóm kdéen tau hemtahu dyó. Nim hmou kuy ni, hlanu bè yóm kwalis blayen dou yóm gónó tekuy mogot.

Kulasi 3:12

Yu se yó kem tau Dwata, kem tau kenbong nawahen, kem tau deng néléken mò kun nfun. Duhen yó, hol dnalang ye yóm nawa skodu ne yóm nawa sbasa, ne yóm keheglaan ye bè kem dumu ye. Ne hol dnalang ye snéen yóm kganag nawa ne yóm khanay nawa.

Kulasi 1:22

Okóm nim kmoen ni, hlan Dwata bè tum tehe katay Ngaen bè yóm tehe kehbalingen du tau, yó gónón mit kuy sefyu anì hol mólós ktonen kuy bè yóm kdaw kehdaen kuy bè soluhen, ne laen dù belen ye, balù udì ke wen tngelen kuy.

2 Kurin 1:7

Tey mgel nawa me kuy. Tódô tngón me ke gel ye gbót bè yóm kum gónó glayam, bud ye gomong snéen bè yóm któbóng Dwata kum.

1 Kurin 1:2

Smulate ebélê ye, yu kem tau deng hemtahu bè Dwata bè syudad Kurin. Deng tnaba Dwata yu mò baling hol kun tau laen dù belenen. Deng nfunen yu hlanen bè yóm deng kessotu ye bè Krays Jisas. Deng ye gotu gomong ne bè yó kem kdéen tau bè dumu benwu deng gel tmaba bè yóm gónó tekuy mogot Jisas Krays.

Sulat Pol Ebè Yó Kem Tau Hemtahu Bè Rom 15:27

Tey kehligal le du snéen nim nmò le ni. Bè ktahuhen, bong knóón se yóm nmò le yó mò balà le yó kem Ju bè yóm deng kgomong le hemtahu bè Dwata. Bong knóón se ke wen kul blay yó kem tau là Ju le lemwót bè yóm kul gónó wen.

Sulat Pol Ebè Yó Kem Tau Hemtahu Bè Rom 11:17

Okóm yóm koyu ulib nfun Dwata yó, deng wen hanga kenlengen du ne tugoden du bè yóm hanga koyu ulib tehe nwahen tmowok lem dlag. Yu kem tau là Ju le, hol lómón ke yu yóm koyu ulib lem dlag. Deng ye gomong lembud bè yóm koyu hyu nfun Dwata, duhen yó kem Ju.

Sulat Pol Ebè Yó Kem Tau Hemtahu Bè Rom 9:24

Duhen tekuy se yó kem tau deng tnabahen. Là sónen du kem Ju tnabahen, okóm gomong le snéen kul yó kem tau là Ju le.

Kun Snulat Jan 20:27

Ominen mon du mò ke Tumas, “Ó Tumas, ni hnénégem hólólu, ne duem bè haliu tdokem. Ne bud duem bè sol halì bè klabihu yóm hólólem. Béem bud hegewu nawahem, hol hentahuhem ne yóm deng klowilu.”

Hagay 2:15

Yó bud udél Dwata ebélê le, monen, “Là ton ye du kô yóm kmò kógów klowil ye? Gu laan ye là deng mbut hdà du he yóm dou Gónô,

Isikél 18:28

Lemwót bè yóm tendo kehedemen du yóm ksideken yóm gel nmoen ne tódô knogolen yóm kmoen sidek, angat mowil yóm tau yó, là kóen kendel matay.

Isaya 41:20

Yó kem nmou yó, angat kdéen tau gotu mton du ne temngón du ou se yóm Dwata hol gónó mogot fen mò du. Ne tódô tngón le yóm kul Dwata yó kem tau Israél yóm Dwata laen dù belenen, du se mò du yóm ni.” Là gomongen bè nili yóm bérs 21 kól bè bérs 29. Bè ni kem bérs ni, htulón Dwata ke Isaya yóm kewóten béléen yóm kegmò Sayrus yóm tau hol geta bè Persya, bè yóm kleden yó kem dê benwu ne yóm bud keblayen kul kwalis mulék ebè kul benwu yó kem tau deng negef le. Yó sotu htulón Dwata ke Isaya yóm klaen dù muhen yóm gel ktaba le bè yó kem dwata kéng, abay se là gbek le tmulón du yóm mò kmoen bè yóm gnahen ne là se gbek le tmulón du yóm mò kmoen bè hulin, ne là se gbek le mò du yó kem hentaw ton. Mon Isaya mò kul yóm kul dwata kéng yó, laen kô dù lemen lómón lenos. Okóm gbek Dwata eles tmulón du kul yóm mò kmoen elem haya. Yó tulónen kul yóm kóyónen kól yóm sotu mò tmóbóng kul bè yó kem hohon le, deng sana gu ditu ne. Dwata se tmóbóng du mò gemlà yó kem hohon le.

Deng Hegfan 18:20

Okóm kuy du, yóm kdê ye gel nô bè longit, hol ye hligal lemwót bè yóm deng keglaen. Hligal ye ne, yu kem tau Dwata, ne yu kem tehe gel hógów Jisas, ne yu kem tehe gel tugod Dwata, abay se deng tnafak Dwata ne lemwót bè yóm tehe sidek nmoen bélê ye.

Deng Hegfan 17:14

Angat le gotu mit sfatay bè yóm Ngà Ubiha, okóm laen kô dù gmò le béléen. Ne yó kem tau mung bè yóm Ngà Ubiha, lu se yó kem tau tehe tnabahen, deng tehe néléken, tau là monol nawa le bè yóm klolò le du. Angat le matù, abay se yóm Ngà Ubiha, du se yóm hol gónó le mogot yó kem kdéen mogot, ne du se yóm Hol Geta bè yó kem kdéen tau hol geta.”

1 Jan 1:3

Yóm deng ton me ne yóm deng gungol me béléen, yó se heglalag me bélê ye anì tilob kesfulung tekuy ebè yóm Mà tekuy bè longit ne ebè Jisas Krays yóm Ngaen.

1 Pitér 5:10

Okóm ke deng legen udì yóm keglayam ye, tey któbóng Dwata kuy. Du se hol hbegel kuy ne tendo ten-gelen yu efet là buden sliwo yóm kehtahu ye. Yó gónón tehe tmaba kuy anì gbót ye bè yóm tey kegetahen ditu bè longit hlanen bè yóm deng kessotu ye bè Krays. Ne yóm kegetahen yó, laen kô dù nan e són.

1 Pitér 5:1

Ne ni wen udélu ebélê ye, yu kem tuha gónó le gel galak yó kem tau hemtahu. Ou se sotu dumu ye tuha gel malak snéen. Lelen yó he deng tonu se dou yóm tehe keglayam Krays bélê tekuy, ne gomonge snéen dou bè yóm kdaw angat kegfan yóm kegetahen. Ni se yóm hlauhu kuy.

1 Pitér 3:5

Hol lómón yó se tehe kul gel kehtilob yó kem libun hemtahu bè Dwata ekni, kem libun alì mogot nawa le bè Dwata. Nimón le kem tuha logi le.

Hibru 9:11

Okóm ni ne, deng sut Krays mò blóng tekuy ebè Dwata. Mlan béléen yóm tóbóng alì hyu deng kól bélê tekuy. Sundu bè yó dum gónô Dwata hdà tau te tonok gónón semblóng tekuy, okóm bè tum hol gónô Dwata bè longit, yóm hol tahu duhen, yóm tódô ket du.

Hibru 6:20

Deng du se hol tukô gna tekuy, ne du se yóm hol blóng tekuy ebè Dwata, ne laen kô tul sónen yóm keseblóngen tekuy yó, hol lómón yóm tehe keseblóng Mélkésédék yó kem tau gnan ebè Dwata ekni.

Ifisus 3:6

Ni se hol lemen yóm tehe bunihen yó, duhen yóm kehlan Dwata du bè yóm Tulón Hyu yóm khomongen kuy yu kem tau là Juhen bè yó kem hyu blayen bè yó kem Ju. Deng ye tahu baling kun fes lówó Dwata snéen kuy, ne wen kuy du snéen yóm tehe fasad Dwata bè yó kem Ju hlanen bè Krays Jisas.

1 Kurin 10:17

Abay se tek sotu yóm mambang senkbéng tekuy yóm kdê tekuy. Bè yóm kken tekuy du yó, yó hnigaden yóm deng kessotu tekuy, balù yóm tey kwen tekuy, abay se tódô kdê tekuy gbót mken du yóm tek sotu mambang yó.

Kun Snulat Jan 17:3

Ni se hol lanen yóm klowil laen dù sónen monu yó, duhen yóm deng ketngón le kóm, yóm tahu Dwata, ne yóm deng ketngón le dou, Jisas Krays, yóm deng hógówem elem benwu.

Kul Nmò 1:15

Bud sotu kdaw bè yó, gotu le stifun yó kem tau hemtahu, wen dô lematu bud lewu folò kwen le.

2 Kurin 9:13

Bè yóm keblay ye, yó se gónón gfan yóm kehtahu ye ke Krays. Angat tey dê tau dmóyón ke Dwata lemwót bè yóm kimón ye du yóm Tulón Hyu lemwót bè Krays. Dóyón le Dwata snéen bè yóm tey któbóng ye kul, dalang se yó kem dumu tau tnóbóng ye.

Hibru 3:12

Ó kem dumuhu setwoli, hol ye eles temgama anì là nóen bélê ye yóm knawa sidek, yóm knawa là mimón. Lemwót bè yóm knawa yó gónó ye kmogol ke Dwata, yóm Dwata laen dù tul katayen.

Hibru 7:28

Yóm tau tehe gel nélék le mò blóng le ebè Dwata, gel lolò le yóm hlau Musis. Bede sal wen gónó le là gulit yó kem tau nélék le yó. Okóm wen fasad Dwata tekuy tukô huli yóm hlau Musis, bud hlanen bè yóm boluyen mò hemget du. Lemwót bè yóm fasaden tekuy yó, yó gónón mélék yóm hol Ngaen mò fen blóng tekuy ebéléen. Yóm Ngaen yó, laen kô dù gónón là gulit bè yóm keseblóngen tekuy ebè Dwata, ne laen dù tul sónen snéen yóm kguliten yó.

Hibru 9:15

Yó gónóhem mon, Krays se yóm lomi lan deng nmò Dwata mò lan tekuy hloni ebéléen. Yó gónón mò du anì kdê yó kem tau deng tnaba Dwata, gotu ton le yó kem hyu tehe fasad Dwata kul, yóm hyu laen kô tul sónen. Hol tahu dohò nim ni, abay se deng wen fen matay. Yóm katayen yó, gotu lenwaen yó kem tau bè yó kem sidek tehe gel nmò le bè yóm tehe klolò le yó kem gna hlolò le kul.

Hibru 10:19

Duhen yó, kem dumuhu setwoli, lemwót bè yóm deng khamà Jisas litóen bè yóm tehe katayen, deng wen lan tekuy ne tódô husek elem tum Dfél gónóhen nô Dwata.

Hibru 10:23

Hol bê tekuy abay tnagaw nawa yóm hendón nefet nawa tekuy, yakà deng tehe fasad Dwata du nim ni, ne là kô tenlesen du hendemen.

Hibru 13:22

Ó kem do dumu setwoli, hol hanay ye nawa ye hmungol du nim udélu mò gemduf kuy ni, yakem tahà se nim sulatu ni.