Hibru 13:3 - Udél Dwata: Gna Kesfasad ne Lomi Kesfasad

³ Bê ye abay klifót tmóbóng kul yó kem dumu ye geblanggù. Hol lómón kegnóm ye du dé, lómón ke yu yóm geblanggù. Ne yó kem dumu ye deng glayam, bê ye abay klifót tmóbóng kul. Hol lómón kegnóm ye du, lómón ke yu yóm deng glayam.

Hibru 13:3 Referans Kwoze

Matyu 25:36

Bè yóm tehe klaen dù nesu, wen blay ye do mò nesu. Ne bè yóm tehe kwen desu, tey gel kesgifà ye do. Ne bè yóm tehe knóu lem blanggù, tódô gel nauy ye ou.’

Hibru 10:34

Ne gel ye gbót glayam bè yóm kegkukub yó kem dumu ye hemtahu. Balù yó kem tau mled kimu ye, là kóen sidek kehedem ye ebélê le, mom wen he yóm kuy kehligal, abay se deng tngón ye wen yóm tey kuy kimu alì hyu laen dù sónen ditu bè longit.

Sulat Pol Ebè Yó Kem Tau Hemtahu Bè Rom 12:15

Ke hligal kem dumu ye, gbót ye hligal bélê le. Ke wen knangag le, gbót ye langag bélê le snéen.

1 Kurin 12:26

Ke wen des gnómen yóm sotu nô bè lówó tekuy, tódô kdê le gemnóm du snéen. Senged nóm ke dóyón le yóm sotuhen, tódô kdê le se gemnóm du yóm kligalen.

Kulasi 4:18

Dou lan tdok smulat du nim mò sónen ni: Ou se Pol. Tey kólómu kuy. Bê ye klifót yóm tolo kegfétu. Yó hem Dwata hol tmóbóng kuy.

1 Pitér 3:8

Duhen ni, hol sensotu ye nawa ye ne hol ye skodu, ne hol ye sbong nawa ne hen-ganag ye nawa ye. Hol heglaan ye knô ye bè kem dumu ye.

Matyu 25:43

Yóm tehe kilohu, là kô hnódó ye do. Yóm tehe klaen dù nesu, là kô dog benlay ye do. Yóm tehe kwen desu ne yóm tehe knóu lem blanggù, là kô dog sen-gifà ye do.’

Kul Nmò 24:23

Ominen mdók yóm sotu kfitan anì hlós kbentey le ke Pol, okóm là kenbéen du ke wen wè Pol mógów ebéléen mò fen bemlay du yóm wen muhen du.

Ifisus 4:1

Duhen ni, wen hlolou kuy, ou se yóm tau deng geblanggù lanu mò du yóm hmoen dou yóm gónó tekuy mogot. Bê kwit ye ktau ye, hol nmò ye sen yóm nmò seklóón ebè yó kem tau deng tnaba Dwata.

Kul Nmò 27:3

Deng hayahen bè yó, dmuung me bè yóm sotu syudad boluyen Sidon. Tey hyu nawahen ebè Pol yóm kfitan Julyus, tódô bayaen yóm nan keslob bè yó kem dumuhen hemtahu bè yó anì wen tóbóng le du yóm wen muhen du.

Tekang Kbuten 40:23

Okóm yóm tau gel mkay ninum yó, deng mom klifóten Jusif, balù udì ke bud gbel bè nawahen.

Hibru 11:37

Wen se bélê le matay bè kestudà le kul botu. Wen se bélê le tódô len-gadì le bè sóól lówóhen. Ne bud wen se matay lan le tmibó kul. Són nes lesek le, són kulit ubiha ne kulit kambing. Balù udì ke wen gónó le ma, ne tey gulé kehlayam le kul ne kehsidek le kul.