Hibru 11:8 - Udél Dwata: Gna Kesfasad ne Lomi Kesfasad

⁸ Dalang se ke Abraham ekni. Lemwót bè yóm kehtahuhen bè Dwata, yó gónón tódô mimón yóm ktaba Dwata du ebè yóm benwu deng fasaden du. Tódô tnagaken yóm kun benwu, balù yóm là ketngónen du gónón seblà yóm benwu deng fasad Dwata du.

Hibru 11:8 Referans Kwoze

1 Pitér 1:22

Lemwót bè yóm deng kimón ye yóm ktahuhen, deng ye baling mólós ne, ne deng wen ne yóm tahu kesbong ye nawa. Hol hewót ye lem nawa ye yóm kesbong ye nawa yó.

Tekang Kbuten 22:18

Lemwót bè yóm tey kimónem dou, angat wen bè yó kem bólem gónóhu hlan du yóm tóbóngu yóm kdéen but tau talak tonok.”

Tekang Kbuten 12:7

Bè yóm kkól Abram bè yó, tódô hegfan béléen Dwata, yó monen mò du, “Ó Abram, ni se yóm benwu angat blayu yó kem tau semfu gu béléem.” Omin Abram semsodò yó kem botu mò gónón demsù ebè Dwata yóm Dwata hol kun gónó mogot, yóm deng hegfan béléen.

Sulat Pol Ebè Yó Kem Tau Hemtahu Bè Rom 10:16

Okóm là kô kdê le du hemtahu du yóm Tulón Hyu yó. Hol mkél bè yóm sotu tehe mon Isaya ekni, yóm monen, “Ó Dwata, là holen wen tau hemtahu du yóm gel tulón me.”Duhen yó, yó gónó le hemtahu yó kem tau ke deng gungol le yóm Tulón Hyu. Ne yóm Tulón Hyu monu yó, duhen yó se yóm tulón me gbak ebè Krays.

1 Pitér 4:17

Deng hto ne yóm buteng Dwata kmukum tau, ne fen hegnahen yó kem tau nogoten. Ke nbuten bélê tekuy, mò kmoen se bè yó kem tau là mimón du yóm Tulón Hyu lemwót gu bè Dwata?

Hibru 11:33

Ni kem tehe tau gnan ni ekni, lemwót bè yóm kehtahu le bè Dwata, yó gónó le gel matù bè yóm gel kesgida le. Tódô nmò le yóm tedeng, ne yó gónó le gmuta du yóm fasad Dwata kul. Lemwót bè kehtahu le, là kô gebngat le du kakim le yó kem liyun tô msék kul.

Sulat Pol Ebè Yó Kem Tau Hemtahu Bè Rom 6:17

Tehe ye ghesek bè yóm óyô ye mò sidek, okóm ni gónóhu hol dmóyón ke Dwata abay se deng hol nô bè nawa ye mimón du yóm ktahuhen lemwót gu bè Dwata.

Isikél 36:24

Ni se angat nmou, gotu bud sentifunu yu gu bè yó kem benwu deng gónóhu e semkla kuy ne nwitu yu semfulék ebè yóm hol kuy benwu.

Juswa 24:3

Okóm nwitu Abraham yóm hol kuy fù, gu bè yóm tonok sentu Él Yufratis yó, nwitu edini bè nim benwu Kanan ni. Ne tey kehbólu du. Hngau du Isak

Dwata 9:5

Là kô yó du gónó Dwata hemlus du kuy nim tonok ni ke mlan bè kehyu kmò ye ne bè kmò ye yóm tedeng. Yó dé gónón mlo kul lemwót bè yóm tendo kmò le sidek ne lemwót bè yóm tehe fasaden yó kem tehe fù ye le Abraham ne Isak ne Jakub.

Tekang Kbuten 26:3

Hluni nô bè ni ne elese tendo nô béléem ne tnóbóngu uu. Yóm klamang yóm benwu Kanan angat blayu kóm ne yó kem lugodem. Là kô klifótu du yóm deng tehe kfasadu ke maem Abraham bè yóm tonok ni.

Tekang Kbuten 17:8

Nim tonok hanà tolo gónóm milo ni, blayu kóm ne bè yó kem sfuhem. Nim klamangen benwu Kanan ni, yó kem sfuhem funen ne laen kô dù sónen yóm kfun le du. Ne bud ou se hol kul Dwata.”

Tekang Kbuten 15:5

Omin Dwata mit du hewà, ne monen mò du, “Temngeli ebè longit dé bè yó kem blotik, tilów nsóhem lu. Yóm alì kwen le yó, hol lómón yó se angat kwen yó kem semfu gu béléem.”

1 Pitér 3:1

Senged se kuy kem libun deng myehen. Hol gel nimón ye tuha logi ye, anì yó ke wen bélê le là hemtahu du yóm Udél Dwata, angat gwit ye lu tódô hemtahu lemwót bè yóm kton le yóm hyu kmò ye, baluen ke là bud wen udél ye ebélê le.

Hibru 5:9

Tikóng deng gotu nmoen yóm hmò Maen du, yó gónó Dwata hlan du tahen yóm kegewà tekuy gu lem hatay. Kdéen tau mimón du, gotu blayen kul yóm klowil laen dù sónen.

2 Kurin 10:5

Dalang se yó kem tau hegmón hemkéng ke Dwata, gbek me malà kul anì laen dù gmò le. Bè yóm kbalà me kul yó, botong tenles le kehedem le, ne baling le tau mimón ke Krays.

Sulat Pol Ebè Yó Kem Tau Hemtahu Bè Rom 1:5

Mlan bè yóm Ngaen yó, wen tey hyu hmò Dwata dou, duhen yóm gel khógówen dou elem blóng yó kem tau là Ju le anì hol megdóyón Krays. Nitu yóm Tulón Hyu lem blóng le anì gbót nimón le Jisas se kul lemwót bè yóm kehtahu le béléen.

Tekang Kbuten 11:31

Bè yóm kdaw yó, yó nmò Tira nwiten Abram yóm ngaen logi, ne Lat yóm téméen, ne Saray yóm towuhen yehen Abram. Tebelen yóm syudad Ur snakuf Babilun, tô mógów etu bè Kanan. Ngang le mò du mógów efet le kól bè yóm syudad boluyen Haran ne bè yó gónó le henek nô.

Tekang Kbuten 12:5

Bè yóm kewót Abram yó, nwiten Saray yóm yehenen, ne Lat yóm ngà twoguhen ne kdê yó kem kendengen le, ne kdê yó kem hesek deng nwa le bè Haran. Tódô le lemwót, mógów le etu bè yóm benwu boluyen Kanan. Timbow le kól ditu bè Kanan,

Tekang Kbuten 20:13

Bè yóm tehe kdók Dwata dou, anì hlayuke bè gónô mà, yó monu mò ke Sara, “Yó gónón gfan yóm kbong nawahem dou, balù kihu gónó te e solu, hol monem setwoli te.”

Matyu 2:21

Tahu se, btik Jusif, nwiten yóm ngà lewu le yéen, mulék le ebè Israél.