Hibru 11:4 - Udél Dwata: Gna Kesfasad ne Lomi Kesfasad

⁴ Bè yóm tehe Abél ekni, lemwót bè yóm kehtahuhen bè Dwata gónón mò du yóm dsù kun kóyô Dwata, fen là yó dum twoguhen Kain. Lemwót bè yóm kehtahu Abél, yó gónón tedeng kton Dwata du, ne bud bè yó gónó Dwata hemmóyô du yóm dsuen. Balù yóm deng katayen, tolo wen dnalang tekuy béléen lemwót bè yóm kehtahuhen bè Dwata.

Hibru 11:4 Referans Kwoze

Hibru 12:24

Hol lómón ke deng tekuy hloni ebè Jisas. Du se mò du yóm lomi lan mò gónó tekuy hloni ebè Dwata lanen hamà litóen bélê tekuy. Hol lómón ke deng hentsiken tekuy yóm kun litô. Ne yóm litóen yó, tey hyu nefeten senta yóm litô tehe Abél ekni.

Tekang Kbuten 4:10

Omin Dwata bud mon du, “Tey, Kain, moen ni du ke nmoem nim tey sidek ni? Deng tonu litô twolihem dmanag bè tonok, lómón ke dawaten ou anì bnelesu.

Sulat Jud 1:11

Tey angat gfà le yó kem tmolok sekban abay se lolò le yóm tehe kun kmò sidek Kain ekni, hnatayen Abél yóm twolihen, ne yóm tehe kun nmò Balaam, móyô mò du yóm sidek anì wen filak gutahen. Ne sotuhen, mkél le bè yóm tehe katù Kura ke Musis ekni. Tódô genlà Dwata lu.

Matyu 23:35

Yó angat guta ye du yóm nmò ye yó, gotu duón Dwata kuy yóm tehe katay le bnonok yó kem tau tedeng kmò le, lemwót bè katay Abél bnonok, yóm tau alì tedeng kmoen, efet kól bè yóm kbonok le ke Sikaraya yóm tehe ngà Berakiya. Tódô kem hnatay le igoen tolo mógów lem blóng yóm Gónô Dwata ne yóm gónó le gel demsù ebè Dwata.

Kem Udél Hlalak Tehe Selumun 15:8

Tey keklit Dwata du yóm kedsuen ebéléen yóm tau gel mò sidek, okóm yóm kni yóm tau tedeng kmoen hnigalen.

Hibru 9:22

Bè ktahuhen, bè yóm gna hlolò Dwata kul tganay, là holen wen baling mólós bè yó kem kimu le yó ke laen dù litô sù le du. Ne laen se dù tau hnifót Dwata salaen ke là wen yóm fen gamà litóen.

Tekang Kbuten 4:15

Okóm yó balà Dwata du yóm udélen yó, monen, “Là. Ke wen hmatay kóm, hitu duléku he mkay du senta yóm tafaku kóm yóm kun tafak.” Duhen yó, wen ilô nmò Dwata bè Kain anì laen dù tau hmatay du ke wen gemslong du.

Tekang Kbuten 4:8

Sotu kdaw bè yó, mon Kain mò ke Abél yóm twolihen, “Na te slomong ebè tniba dé kemdaw ni.” Tahu se. Tikóng le deng kól ditu bè tniba, tódô kento Kain demlu yóm twolihen ne hnatayen.

Hibru 12:1

Yóm bélê tekuy, lómón tô deng gotu senibut le tekuy yó kem tau gnan yó ekni. Yó gónóm mon, hol kó tekuy yó kem gel hemseng yóm klolò te ke Dwata. Kó tekuy snéen yóm salà gónó tekuy gel gfét. Hol lómón yóm tau skuya mlóy, hotuhen són gelen anì gefet bè hol sónen.

Kun Snulat Luk 11:51

kewóten bè katay Abél bnonok efet yóm kbonok le ke Sekariya. Tódô kem hnatay le igoen mógów lem blóng yóm gónó le gel demsù ebè Dwata ne yóm Gónô Dwata. Yó tódô tulónu kuy,” mon Jisas, “angat tnafak Dwata yu bè yó kem kdê tugoden tehe matay bnonok.

Kem Udél Hlalak Tehe Selumun 21:27

Tey kenlit Dwata yóm dsuen ebéléen yóm tau gel mò sidek, hol néen ke yó gónón tô demsù anì mkó tahen yóm salaen.

1 Bok Kem Tau Hol Geta 18:38

Sen-gengen se wen ofi hwit Dwata gu bè longit, gotu kenen yóm dsù Ilaydya, ne yóm koyu snuken, ne yó kem botu ne yóm tonok. Ne bud gotu hektihen se yóm él leminu lem kanal.

Tekang Kbuten 4:25

Bud sentungô Adam Ib yóm tuha libunen, ne mlutut, ne mngà logi. Ne yó mon Ib, monen, “Deng bud benlay Dwata ou ngà logi mò tles Abél, yóm tehe hnatay twoguhen.” Ne yó gónón moluy du Sét.

Taytus 1:16

Ya mo kmon le du tngón le Dwata, okóm tódô dilóem bè yóm nmò le yóm là ktahuhen. Kem tau alì sidek nmò le, ne là hdon le. Là kô gbek le mò du yóm hyu.

Hibru 5:1

Bong yóm tau mò fen gel blóng le ebè Dwata yó kem Ju, sal gel nélék le bè yó kem dumu le tau. Sal gel mlan béléen ke wen gel dsù le ebè Dwata, duhen ke wen gel blay le ebéléen bè yóm kegsalà le.

Hibru 11:2

Bè yó kem tau gnan ekni, lemwót bè yóm kehtahu le gónón hyu nawa Dwata ebélê le.

2 Pitér 2:8

Tódô nô lem blóng le Lat, bede ket kdawen tey gel blat nawahen bè yóm sidek gel tonen ne yóm gel gungolen.