Hbakuk 1:8 - Udél Dwata: Gna Kesfasad ne Lomi Kesfasad

⁸ Yóm alì kehlóng yó kem kudà le, botong kéng kehlóng yóm sotu ógóf lóbô lem bnes boluyen lipard. Ne yóm alì klóbô le, hol lómón klóbô yóm ohu lóbô lem bnes ke deng bitil. Yó kem tau gmida smakay kudà bélê le, lemwót le gu bè benwu mayuk. Tey kehlóy le yó kem kudà le, hol lómón ke dmauf banug ke wen kenfóen.

Hbakuk 1:8 Referans Kwoze

Sifanaya 3:3

Yó kem genlal le, lómón kmò le yó kem liyun mngel mebel mò nsék le. Ne yó kem gel kmukum bélê le, lómón kmò le yó kem ógóf lóbô lem bnes alì sidek kbitilen ke deng kimel, yóm nséken balù udì ke wen tebelen du kól hlafus.

Isikél 17:3

Hgefetem bélê le nim udél lemwót bè yóm sana Dwata hol dandónen geta, yó monen, ‘Wen sotu tey banug bong sut bè Libanun. Ya tey ktahà hafak nbólen, bede tey segkay yó kem betek bulen. Yó nmoen, nogoten yóm hanga koyu sidar hol tnulunen,

Dwata 28:49

Angat wen sotu but tau hwit Dwata ebélê ye lemwót bè yóm benwu bè hol són tonok mò gmida kuy, yóm benwu là deng kuy hnikót tngón du udél le. Yóm kmò le kuy, hol lómón ke semkot kemfô yóm banug.

Kun Snulat Luk 17:37

Ne mon le mò ke Jisas yó kem gel lemolò du, “Gónóhen angat seblà de nim ni, Sér?” Ne mon Jisas mò kul, “Yó se gónóhen mta lób, yó se gónóhen e sguku wak.”

Matyu 24:28

Angat dohò nim tulónu kuy ni. Lómón yóm gel mon le, ‘Yó se gónón mta lób, yó se gónón e sguku wak.’ ”

Isikél 17:12

“Tulónem yó kem tau là mimón bè Israél, monem mò kul, ‘Là tngón ye du kô hnigad yóm lewu banug yó? Tulónu kuy ne, mon yóm sana Dwata hol dandónen geta. Yó hnigaden, lemwót yóm tau hol geta bè benwu Babilun mógów ebè Jirusalim nan e negef yóm tau hol geta bè yó, gomong yó kem dumu tau wen glalen, gotu nwiten lu ebè Babilun.

Nahum 2:5

Dók yóm tau hol geta yó kem genlal bè yó kem sendaluen anì kenluug le yóm gónô bongen. Botong salà kdà le lemwót bè keheslò le.