Hagay 2:5 - Udél Dwata: Gna Kesfasad ne Lomi Kesfasad

^5-6 Bè yóm tehe kehewà yó kem fù ye gu bè Idyip, tehe fasadu kul yóm tendo eles knóu bélê le. Senged se nim kmoen ni, elese tendo gel nô bélê ye. Yó gónóm mon, hol bê ye abay hlikò. Là buden legen ne yóm angat ksinsigu longit ne tonok ne mohin.

Hagay 2:5 Referans Kwoze

Kehewà 34:10

Yó mon Dwata mò ke Musis, “Yu kem tau Israél, ni wen senfasad tekuy. Yó fasadu kuy, angat nmou bè yó kem hohon ye yóm tey knikò bong là deng wen hmikót mton du talak tonok. Kdê yó kem tau Israél gotu ton le ni kem tey knikò angat nmou ni. Ou se yóm sana Dwata hol gónó mogot mò du bélê ye nim tey knikò angat nmou ni.

Nihimaya 9:20

Tey hyu yóm gel tolokem kul mlan bè Tulusem. Là kô tenflokem du yóm mana gel hkenem kul dalang se yóm él gel hinumem kul.

Isaya 41:13

Ou se Dwata yóm kuy gónó mogot. Tendo gel ten-gelu yu. Ni hol udélu ebélê ye, ‘Hol bê ye abay hlikò. Ou se tendo tmóbóng kuy.’ ”

Sikaraya 8:13

Ó kem tau bè Juda ne kem tau bè Israél, bè kton le kuy yó kem tau bè tólóng benwu, yu se yó kem tau deng henmulà Dwata. Okóm ni, là ne. Lenwau yu ne hlanu bélê ye yóm któbóngu yó kem dumu tau. Yó gónóm mon, bê ye abay hlikò, hol hgel ye nawa ye, henlel ye mò du yóm dou Gónô.

Sikaraya 8:15

Duhen ni, bê ye abay hlikò, deng hendemu ne yóm któbóngu yó kem tau bè Jirusalim ne yó kem tau bè Juda ne là kô bud tenlesu du hendemu.

Kul Nmò 27:24

Yó monen mò dou, monen, ‘Béi hlikò, Pol, nam na gemdà bè solu Sisar he. Lemwót bè yóm kkodu Dwata kóm, tódô gomong mowil béléem yó kem dumuhem nô lem kafal ni.’

Isaya 41:10

Hol bê ye abay hlikò, tendohe gel nô bélê ye. Ou se yóm kuy Dwata, laen kô dù knikò ye. Tendo gel benlayu yu kgis ne tendo tnóbóngu yu. Sónmou mofin kuy ne lenwau yu.

Deng Hegfan 1:17

Bè yóm ktonu du, tódóe hegluduk klohok tihen, lómón ke denge tódô matay mekto. Okóm ogoten do sigel kwananen, ne monen mò do, “Béi abay hlikò. Ou se yóm hol buten ne bud sónen.

Matyu 28:5

Ne mudél yóm hógów Dwata ebè yó kem libun, monen, “Bê ye abay hlikò. Tngónu hnebel ye Jisas, yóm lomi tnutuk le bè kros.

Sikaraya 4:6

Ominen mon du mò dou, “Ni se udél Dwata ebè Sirubabél. Yóm nmoem là lemwóten bè kegbek tau duhen ke bè kgis tau, okóm lemwót bè dou Tulus, udél yóm Dwata laen dù là gbeken du.

Nihimaya 9:30

Deng tey hilu halayen ne yóm tendo khanayem nawam lem blóng le. Kóm Tulus se fen gel hudél yó kem tugodem, okóm deng le mom hbokong yó kem tauhem. Yó gónóm mon, bud hlusem lu elem hólól yó kem tólóng but tau.

2 Tutul Israél 20:17

Okóm là kô yu du mit kul sgida. Olo ye tódô htuhod mdà, tenngel ye yóm kegmò Dwata bélê le yó kem hohon ye. Ó kem tau bè Juda ne kem tau bè Jirusalim, Dwata se nô bélê ye. Hol bê ye abay hlikò, ne bê ye abay hunu nawa ye. Haya mógów ye etu, abay se nô bélê ye Dwata.”

Juswa 8:1

Yó bud mon Dwata mò ke Juswa, “Gotu nwitem yóm kdê sendaluem na ye e nundug yóm syudad Ay. Béi abay hlikò ne béi abay htakas. Hegmou uu bè yóm tau geta bè yóm syudad yó ne suu lem hólólem yó kem tauhen ne yóm syudaden ne yóm tonoken.

Kehewà 34:8

Tódô kendel mtud bukol bè tonok Musis nan e heglaan bè Dwata.

Kehewà 19:4

Yó udél Dwata, monen, “Deng ton ye yóm deng nmou bè yó kem tau Idyip ne yóm kmò kwitu kuy gu bè Idyip. Yóm kwitu kuy hol lómón yóm kwit banug ngaen, sal gel suen ta hafaken. Lómón yó se kmò kwitu kuy edini béléu.

Kehewà 19:6

kem tau deng hetfingu mò dou ne angat ye baling kem tau mò gel blóng ebéléu. Nim udél lemwót lem baku ni, hol tulónem yó kem tau Israél.”

Kehewà 24:3

Tahu se. Lemwót mosol Musis, gotu tulónen yóm kdê tau yó kem hlau Dwata kul ne yóm kdê hloloen kul. Ne yó balà le ke Musis yó kem tau, mon le, “Tódô nmò me yóm kdê deng mon Dwata mò kum.”

Kehewà 24:8

Omin Musis ma yóm litô nô lem yó kem tukung ne hetsiken ebè yó kem tau. Yó monen, “Ni se yóm litô mò hemget du yóm deng kesfasad ye Dwata bè yóm deng keblayen du kuy yóm kdê hlauhen kuy.”

Juswa 1:9

Ni hol monu mò kóm, hol hotuhem gelem ne hol hfólem nawam. Béi abay hlikò ne béi abay htakas, yakà ou du yóm sana kóm Dwata hol gónó mogot ne tendohe nô béléem balù kihu gónóm e solu.”

1 Samwél 12:20

Yó bud udél Samwél ebélê le, monen, “Bê ye abay hlikò. Balù yóm deng tey kegsalà ye bè Dwata, hol bê ye abay bud knogol Dwata ne hol hewót ye lem but blutut ye yóm klolò ye du.