Glasya 3:16 - Udél Dwata: Gna Kesfasad ne Lomi Kesfasad

¹⁶ Bè yóm tehe fasad Dwata ke Abraham ne bè yóm sotu semfu gu béléen, là kô monen du ke fasaden bè yó kem dumu semfu gu bè Abraham. Okóm monen bè yóm sotu semfu gu bè Abraham, duhen Krays.

Glasya 3:16 Referans Kwoze

Sulat Pol Ebè Yó Kem Tau Hemtahu Bè Rom 4:13

Tehe yu ekni, wen fasad Dwata ke Abraham ne bè yó kem semfu gu béléen. Yó fasaden kul, lu angat mogot yóm klamangen benwu. Là kóen mlan bè klolò Abraham du yóm hlau Musis gónó Dwata hlan du béléen yóm fasad yó. Okóm mlan bè yóm kehtahuhen ke Dwata. Són yó se gónón tedeng kton Dwata du, són bè yóm kehtahuhen.

Kun Snulat Luk 1:55

Deng tey kkoduhen ke Abraham ne yó kem semfu gu béléen, ne laen kô dù sónen yóm kkoduhen tekuy.”

Sulat Pol Ebè Yó Kem Tau Hemtahu Bè Rom 4:16

Yó gónóm mon, tek sotu gónó tekuy gmuta du yóm fasad Dwata tekuy, són bè kehtahu tekuy béléen. Yóm fasad Dwata yó, tódô basahen yóm kdéen tau semfu gu bè Abraham. Là són du yó kem tau gel lemolò yóm hlau Musis, okóm gotu gomong snéen yó kem tau hemtahu lómón yóm tehe kun kehtahu Abraham. Abay se yóm Abraham, hol mà kdéen tau hemtahu bè Dwata.

Tekang Kbuten 12:7

Bè yóm kkól Abram bè yó, tódô hegfan béléen Dwata, yó monen mò du, “Ó Abram, ni se yóm benwu angat blayu yó kem tau semfu gu béléem.” Omin Abram semsodò yó kem botu mò gónón demsù ebè Dwata yóm Dwata hol kun gónó mogot, yóm deng hegfan béléen.

Glasya 3:8

Deng tehe eles tulón Dwata bè Sulaten ekni yóm angat ktedeng ktonen kul yó kem tau là Ju le lemwót bè yóm kehtahu le béléen. Deng tehe tulón Dwata ke Abraham se yóm Tulón Hyu yó, yó monen, “Hlanu béléem yóm angat któbóngu yóm kdéen tau bè klamangen benwu.”Ne tahu se, hentahu Abraham yóm tulón Dwata du yó, ne tey któbóng Dwata du lemwót bè yóm kehtahuhen. Dalang se nim kmoen ni, yóm kdéen tau hemtahu, tey któbóng Dwata kul lómón se yóm tehe któbóngen ke Abraham.

Tekang Kbuten 12:3

Tey angat któbóngu kul yó kem tau gel tmóbóng kóm, okóm tnafaku yó kem tau hemmulà kóm. Ne mlan béléem gónóhu tmóbóng yóm kdéen tau bè klamangen benwu.”

Kul Nmò 3:25

Deng tehe wen fasad Dwata ebè yó kem fù tekuy hlanen bè yó kem tehe gna tugoden. Là són du ebè yó kem tehe fù tekuy gónó Dwata fmasad du yóm yó, gomong tekuy lemen snéen kut. Yó mon Dwata mò ke Abraham ekni, monen, ‘Angat hlanu bè yóm semfu gu béléem yóm angat któbóngu kdéen tau talak tonok.’Duhen yó,” mon Pitér, “deng nélék Dwata Jisas mò hógówen. Deng gna hógówen elem blóng tekuy mò tmóbóng tekuy, yóm ket tekuy na sotu, anì knogol tekuy yó kem sidek gel nmò tekuy.

Tekang Kbuten 21:12

Okóm yó mon Dwata mò ke Abraham, “Béem hesbeweg kehedemem du yóm ngaem logi yó ne yóm hesekem Hagar. Tódô loloem yóm mon Sara mò kóm abay se angat mlan bè Isak yó kem ból deng fasadu kóm.

Kulasi 3:11

Yó nefeten nim lomi klowil ni, laen dù bud gónón stólóng ne yóm tau Ju ne yóm tau là Juhen, yóm tau tnulì ne yóm tau là tnulien, yóm tau tólóng udélen, ne yóm tau laen dù tngónen, yóm tau klifen ne yóm tau là klifenen, abay se Krays yóm alì bong muhen bè kdéen, ne du se tendo nô bélê tekuy.

Tekang Kbuten 15:5

Omin Dwata mit du hewà, ne monen mò du, “Temngeli ebè longit dé bè yó kem blotik, tilów nsóhem lu. Yóm alì kwen le yó, hol lómón yó se angat kwen yó kem semfu gu béléem.”

1 Kurin 12:27

Na, deng tekuy gotu baling kun lówó Krays, bede ket tekuy na sotu, sal stólóng muhen tekuy.

1 Kurin 12:12

Ke hningónu yó kem tau hemtahu bè Krays, hol lómón ke lówó tau. Tek sotu lówóhen, okóm tey dê nô du.

Sulat Pol Ebè Yó Kem Tau Hemtahu Bè Rom 12:5

Senged snéen bélê tekuy. Deng tekuy ssotu bè kun lówó Krays, ne tódô ket sotu bélê tekuy sal tólóng kun nmò. Ne lemwót bè yóm deng kessotu tekuy bè kun lówó Krays gónóhen wen hentngón tekuy bè yó kem dumu tekuy. Ne ket sotu bélê tekuy wen mu tekuy du kem dumu tekuy.

Tekang Kbuten 49:10

Yóm tuged gel nogot yóm tau hol geta mò ilô yóm kfasangen mogot tau, là kóen lana bè kun ból Juda efet kól yóm sotu sfuhen hol mfun du mogot yóm klamangen. Bè yóm kkólen, gotu nimón yó kem tau bè klamangen benwu.

Kulasi 2:19

Là kô le mogot bè Krays, igoen du yóm hol kulu yóm kdê tekuy deng mò henged lówóhen. Lemwót bè yóm kalaken tekuy, gónóhen tilob kesgayun te, ne baling tekuy gulit, lan te lemolò yóm kun kóyô Dwata.

Ifisus 5:32

Yóm kessotu lówó le yó, laen kô dù tau gembek tmulón du yóm hol lanen, bede tngón tekuy yóm ktahuhen lemwót bè Sulat Dwata. Bè dou kehedem du, henléden yóm deng kbaling le ssotu bè Krays yó kem tau hemtahu béléen.

Matyu 1:1

Ni se kmò kestugoden yóm gónó Jisas Krays gu semfu bè yóm tehe kehbalingen tau. Semfu gu bè yóm tehe Dabid. Ne ke Dabid, sfu yóm tehe Abraham.

Sulat Pol Ebè Yó Kem Tau Hemtahu Bè Rom 9:4

Lu se kem Ju deng néléken mò kem ngaen. Tehe tódô hegfan lem blóng le mlan bè yóm tey keDwatahen. Dê duléken mò fasad bélê le ne blayen bélê le yóm kun hlau hlanen bè Musis. Tey mtukul ktoloken du kul yóm kmò ktaba le ebéléen. Ne tey dê yóm fasaden kul.

2 Kurin 11:22

Ke gel mon yó kem tau heklabak yó, tau le Hibru, bude tau Hibru se dou. Ke mon le tau le Israél, bude tau Israél se dou. Ke mon le semfu le gu bè Abraham, ou snéen fù Abraham.

Glasya 3:19

Duhen yó, ke lómón yó se kmoen tedu se muhen yóm kehsulaten du ke Musis yóm hlau? Yó muhen mò hdilô du bè yó kem tau yóm salà le. Wen mu Dwata du efet yóm kdaw kkól yóm tau monen semfu gu bè Abraham, yóm tau gónó Dwata e mon du yóm tehe fasaden yó. Bè yóm tehe keblay Dwata du ke Musis yóm hlau, wen hógówen gu bè longit mò blóngen ebè Musis. Bong ke Musis kun, mò fen blóngen ebè kem tau.