Flipay 4:8 - Udél Dwata: Gna Kesfasad ne Lomi Kesfasad

⁸ Ni mò sónu du bélê ye, kem dumuhu setwoli. Yake hol sù ye lem hendem ye dé yóm hyu, ne yóm knóón bang dóyón. Tey hyu ke són gel hendem ye yóm tahu ne yóm tedeng ne yóm mólós, ne yóm minggel ne yóm knóón nadat.

Flipay 4:8 Referans Kwoze

Sulat Jim 3:17

Okóm yóm tau ke lemwót bè Dwata yóm ketngónen, laen kô dù belenen. Gel nmoen yóm gónón menek bè kem dumuhen, lelen ganag nawahen ne wen khulungen mit swè. Tey gel knoduhen kem dumuhen ne lelen hyu kmoen ebélê le. Là kô ton tekuy du béléen yóm nawa kmihu ne laen se kô lafinen yóm nawahen.

Taytus 2:7

Yake béléem dé, Taytus, mò gónó le dmalang du yóm kehyu kmò. Hol hewótem lem but blututem yóm ktolokem kul, béem mom hningay.

2 Kurin 8:21

Kóyô me ke laen dù gónón gemsanil kum yóm gónó tekuy mogot, dalang se kem tau, hyu ke laen dù sanil le kum se kul.

Glasya 5:22

Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesbong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm kehyu kmò, ne yóm kteneb nawa,

1 Pitér 2:12

Hol hninggel ye mò kmò ye lem blóng yó kem tau là hemtahuhen. Abay se ke són hyu yóm gel ton le bélê ye, laen kô sfuhen ke wen tô semtulón kuy. Ngem angat gbót dóyón le Dwata bè yóm kdaw kesfuléken edini.

Hibru 13:18

Hol gel utóm ye mi bè Dwata. Tódô tngón Dwata se ke deng wen blóng me ebéléen. Tey gel kesgalu me du anì laen dù tlek belenen yóm gel nmò me.

1 Timuti 4:12

Hol gel tenngelem kdaem, Timuti, kô wen gónó le gemsanil kóm. Balù yóm hanà tolo klomihem lemnok, uu se mò senflénég kem dumum hemtahu bè kestulónem, bè kekdolem, bè kbong nawam kem dumuhem, bè kehtahuhem, bè kólós nawam.

Ifisus 5:9

Wen tey bunguhen yóm deng knô tekuy lem layag yó, duhen yóm hyu kmò tekuy bè kem dumu tekuy, ne yóm ktedeng tekuy, ne yóm kimón tekuy du yóm ktahuhen.

Taytus 1:8

Yó dé nélékem yóm tau hulung hmódó, yóm tau són nalu nmoen, són yóm hyu. Hol nélékem yóm tau hulung mafas nawahen, yóm tau btol, yóm tau laen dù belenen yóm gel nmoen, ne megtolok.

1 Jan 3:3

Ke yó tendo nefet nawahen yóm tau yóm angat kkélen ke Krays, béen abay nmò belenen yóm gel nmoen, abay se yóm Krays, laen kô belenen yóm kun kmò.

1 Pitér 1:22

Lemwót bè yóm deng kimón ye yóm ktahuhen, deng ye baling mólós ne, ne deng wen ne yóm tahu kesbong ye nawa. Hol hewót ye lem nawa ye yóm kesbong ye nawa yó.

Taytus 3:14

Yó kem dumu te deng hemtahu bè yó, yake hol le hfulung mò du yóm hyu anì duhe kóm wen lan le gel tmóbóng yó kem dumu tau laen bang genbek le. Là hyuhen ke là wen muhen yóm klowil le.

Sulat Pol Ebè Yó Kem Tau Hemtahu Bè Rom 13:13

Nmò tekuy dé yóm nmò segtón bè yóm kul kmò yó kem tau nô lem layag. Hol bê tekuy abay gel segduf hlengel, kô wen gónó tekuy hemyak knô tekuy. Hol bê tekuy abay mò samuk ne yóm dumu nmò gónó le semdekà tekuy. Bê tekuy sfatay. Bê tekuy nmò yóm sélés nawa.

Kem Udél Hlalak Tehe Selumun 20:7

Hyu nawa le kul yó kem kun ból yóm tau tedeng ne laen dù belenen yóm kun kmò.

Sulat Jim 1:27

Yóm tahu kehtahu hol kun henmóyô Dwata, yóm Mà tekuy, duhen yóm hol któbóng yó kem ngà hikit ne yó kem libun bolu bè yóm gónó le glayam. Ne ke gel tensuhen yó kem sidek gel nmò tau lem benwu.

1 Jan 3:18

Ó kem ngà, béen olo són bè sumóng ye yóm kbong nawa ye kem dumu ye. Yake hol hegfan ye bè kmò ye yóm tahu kbong nawa ye kul.

Taytus 2:2

Yó hol hloloem kul yó kem logi deng malay knawa le, bê le abay hlengel, yake hfulung le mit ktau le, ne hfulung le mafas nawa le. Yake hgemel le kehtahu le, ne hfulung le kembong nawa kem dumu le, ne hfulung le hbala ke wen gónó le glayam.

2 Kurin 13:7

Hol tendo gel hni me bè Dwata he anì laen dù sidek nmò ye. Là yó du hni me ke hol dilô tau yóm kewóten bè Dwata yóm gel nmò me. Okóm yó dé gel hni me anì hol tedeng kmò ye, baluen ke henkéng le yóm kewóten bè Dwata yóm nmò me ni.

Kulasi 4:5

Hol ye hfulung mò du yóm hyu bè yó kem tau là dengen hemtahu. Eles tnana ye ke wen lan ye mò du.

1 Pitér 4:8

Yó bong muhen bè kdéen, hol ye sbong nawa. Ke sbong nawa ye botong gbek ye tódô hmifót du yóm dê gemsalà bélê ye.

2 Samwél 23:3

Mudél ebéléu yóm Dwata yó kem tau Israél, yóm Dwata gónó le tendo gel heklung, monen, ‘Yóm tau mogot benwu, ke tedeng kwiten kukum, ne ke wen klikoen ke Dwata,

Sulat Pol Ebè Yó Kem Tau Hemtahu Bè Rom 13:3

Yó kem tau mit udin, laen kô gónó tekuy likò bélê le ke hyu yóm gel nmò tekuy. Són gónón wen klikò tekuy bélê le ke wen gónó tekuy mulé udin. Anì là wen gónó ye likò bélê le, hol nmò ye sen yóm hyu anì dóyón le yu.

Taytus 2:14

Deng fen hamaen yóm kun klowil bélê tekuy anì lenwaen tekuy bè kdéen sidek gónó te gel geskét, ne henbalingen tekuy kem kun tau deng mólós, anì gotu nawa tekuy mò du yóm nmò hyu.

Flipay 3:1

Ni hol són yóm tulónu kuy, kem dumuhu setwoli. Hol ye gel hligal dé lemwót bè yóm deng kessotu ye bè yóm gónó tekuy mogot. Wen bud sensulitu bélê ye yóm tehe snulatu bélê ye anì là tlas ye.

Sulat Pol Ebè Yó Kem Tau Hemtahu Bè Rom 2:29

Yóm hol tahu tau Ju, duhen yóm tau hol nô bè nawahen yóm kimónen ke Dwata. Là lemwóten bè yóm kwen kenleng bè lówó, bede lemwót bè yóm kegetles kehedemen mlan bè Tulus Dwata. Yóm tau lómón ni kegetles hendemen, hnebelen yóm kdóyón Dwata du, là hnebelen du yóm kdóyón kem dumu tau du.

Isaya 26:7

Tey hyu, Dwata, yóm lan nmoem bè yó kem tau hyu kmò le, tey sdatal yóm lan lolò le.

Kem Udél Hlalak Tehe Selumun 31:31

Hol henblatem béléen yóm kdéen deng nmoen abay se tey knóón du ke nadat yóm kdéen tau.

1 Timuti 2:2

Homong hni ye béléen se yó kem tau hol geta bélê ye, ne yó kem dumu tau genlal. Yó gónó ye mutóm kul anì menek kbenwu tekuy, ne són nô bè nawa te yóm kadat te ke Dwata, ne yóm hyu kmò te bè yó kem dumu te tau.

1 Timuti 5:10

ne tótól boluyen lemwót bè yóm hyu gel nmoen, deng megtolok kem ngaen, hulung hmódó, dê lanen gel tmóbóng yó kem dumuhen hemtahu, là tlek kun temngel ke wen gónó le glayam kem dumuhen, ne gotu nawahen bè kem dumuhen.

Ifisus 6:14

Duhen yó, eles tekuy gel htifes dé. Yó henged hilet mget bè ówók tekuy, duhen yóm klaen dù kéng tekuy. Yó henged onit eles tendo gel lesek tekuy, duhen yóm ktedeng nawa tekuy.

1 Tisalunika 4:12

Ke ni se nmò ye, nadat le yu yó kem dumu tau là dengen hemtahu he, ne sotuhen, là salig ye du bè kem dumu ye yóm kuy klowil.

Ifisus 4:25

Duhen yó, hol bê tekuy abay bud mò kéng sen. Tódô gel tulón tekuy yóm ktahuhen bè kem dumu tekuy hemtahu, abay se deng kuy ssotu bè kun lówó Krays.

2 Kurin 6:8

Wen se gel madat kum, ne bud wen se gel hemgnok kum. Wen se gel hemnê kum, ne bud wen se gel dmóyón kum. Wen se gel hemkéng kum, ewenem, hono tódô tahu yóm gel tulón me.

Kul Nmò 10:22

Mon le se, “Hógów Kfitan Kurnilyus mi edini. Tey hyu kmoen yóm kfitan tu, tau hemtahu bè Dwata, ne tey kadat le du kdê yó kem Ju. Deng wen hógów Dwata gu bè longit sut béléen, hfangayen uu ne anì gungolen yóm tulón gel nwitem.”

Kun Snulat Jan 7:18

Yóm tau tódô lembù tmolok, naluhen któtólen. Okóm yóm tau naluhen któtól yóm hógów du, laen kô dù kéng du yóm gel tulónen, hono tahu.

Kun Snulat Luk 2:25

Bè yóm kdaw yó, wen sotu tuha logi nô bè Jirusalim boluyen Simyun. Nim tau ni, tedeng knawahen, ne tey klikoen ke Dwata. Sal gel nangaten yóm kehewà Dwata kul yó kem tau Israél. Tendo nô béléen yóm Tulus Dwata,

Mark 6:20

Abay se ke Hirod, wen klikoen ke Jan. Tódô tngónen tau tedeng kmoen, bà udì ke wen belenen, yó gónón gel mofin du. Tey móyô Hirod hmungol du yóm gel tulón Jan, okóm deng mom sónmoen sbeweg kehedemen bè yóm gel khungolen du.

Kem Udél Hlalak Tehe Selumun 11:1

Tey keklit Dwata du yóm tau lemingko, okóm tey kehligalen du yóm tau tedeng kun kmò.

Rut 3:11

Duhen ni, Rut, béem htafa nawam, nmou yóm kdê kóyóem. Deng gotu tngón yó kem tau bè nim benwu ni yóm tey kgulit knawahem.

Kun Snulat Luk 16:15

Yó gónó Jisas mon du mò kul, “Tey dê nmò hegfan ye bè tau anì tedeng kton le kuy, okóm tódô tngón Dwata lem hendem ye. Yó kem alì mebtes bè kehedem tau, bè kton Dwata du, laen kô dù muhen.

1 Kurin 4:5

Yó gónóm mon, bê tekuy abay kendel hendeng kun kmò sotu tau gu laanen là deng kól yóm hol bantang kdaw. Tódô nangat tekuy bè kun kmò du yóm gónó tekuy mogot sok semfulék edini. Bè yóm kdaw yó, angat gotu hegfanen yóm kdéen gebnos nmò tau. Dalang se yóm kdéen gbuni nô lem hendem tau, gotu hegfanen. Ne yó he kguta kdéen tau du yóm kdóyón Dwata kul duhen ke là.

Kul Nmò 22:12

Wen sotu tau bè yóm syudad yó boluyen Ananiyas. Yóm tau ni, tey tedeng kloloen du yóm hlau tekuy, ne tey kadat le du yó kem dumuhen Ju nô bè yó.

Tekang Kbuten 18:19

Deng néléku mò gel hmau yó kem ngaen ne yó kem fuen anì nimón le ou ne nmò le yóm tedeng. Ke mimón le, angat dnohou yóm deng fasadu ke Abraham.”

1 Jan 4:1

Ó kem weu do dumu sogot nawa, bê ye kendel tódô hentahu ke wen tau mon du nô béléen kun yóm Tulus Dwata. Ke yó se gel mon le, na ye na hol nilô bè ktolok le ke tahu lemwót bè Tulus Dwata duhen ke là. Yakà dengen tey dê tau tódô lembù tmugod ke Dwata nim kmoen ni.

1 Timuti 5:2

Senged se yó kem libun deng tmuha sentahem, lómón kmoem kul, lómón ke yéem. Dalang se ebè yó kem sawang libun, lómón kmoem kul, lómón ke hol libunem, ne béem nmò óngóhem lem blóng le.

Kun Snulat Luk 23:50

Wen sotu tau boluyen Jusif, lemwót bè Arimatiya, sotu benwu snakuf prubinsya Judiya. Nim tau ni, tey hyu kmoen, ne tedeng knawahen. Gel hendónen snéen kun yóm kdaw angat kogot Dwata tau. Du se sotu bè yó kem geta mogot kukum lem blóng yó kem Ju, okóm là gbóten du kun yóm atul yó kem dumuhen bè yóm kkukum le ke Jisas.

Kem Udél Hlalak Tehe Selumun 31:29

Monen, “Tey dê libun hyu kmò le okóm uu yóm hol lemyu bè kdéen.” Ni se koni udél yóm tuha logihen.

Kem Udél Hlalak Tehe Selumun 16:11

Tey móyô du Dwata yóm tau tmimbang ne bemtes là lemingkohen ne balù bè yóm kehbalù ke hono tedeng.

Kem Udél Hlalak Tehe Selumun 12:4

Hegdóyónen ne hefligalen tuha logihen yóm libun hyu kmoen, okóm yóm libun henyaken tuha logihen lómón ke gel hengoken lem tiolen.

1 Timuti 3:4

Hyu ke hulung mit yó kem fes lówóhen, ne ke himón yó kem ngaen, mung du yóm kadat le du.

Kul Nmò 6:3

Yó dé hyu ni, kem dumu me setwoli, mélék ye kut bè kuy kwen hitu logi, yóm alì gel nadat ne yóm tendo galak bè Tulus Dwata, ne yóm hulung hedem anì sigang tekuy ta le yóm nmò ni,

Matyu 22:16

Yó nmò le, wen tau dók le ebéléen, hono kem tau gel lemolò kul, ne wen se bélê le kem kun tau Hirod. Timbow le kól bè Jisas, mon le mò du, “Ó Sér, tódô tngón me sal gel tahu yóm gel tulónem bè yóm kun kóyô Dwata bè tau. Ne laen dù klikoem tmulón du, abay se laen dù tau mtukul henlom nawahem.

Kem Udél Hlalak Tehe Selumun 31:10

Mdangan gónó mton du yóm libun mò yehen hyu kmoen ne ke wen libun lómón yó kmoen tey hyu senta yóm kimu legen mebtes.

Hibru 11:2

Bè yó kem tau gnan ekni, lemwót bè yóm kehtahu le gónón hyu nawa Dwata ebélê le.

1 Timuti 3:11

Kólen bè yó kem yehen le, hol sneb kul snéen ke libun hyu kmò le, ne ke là gel sentulón le kem dumu le, ne ke là hlengel le, ne ke laen dù kéng nmò le.

2 Kurin 8:18

Wen yóm sotu dumu tekuy hemtahu bè ni hmung me ke Taytus edyó. Tey tótól boluyen nim tau ni bè yóm ktoloken yóm Tulón Hyu bè yó kem dumu tekuy hemtahu bè ket benwu.

2 Samwél 1:23

Yóm Sol lewu le Junatan, kem tau alì knóón, tey dê kembong nawa kul. Slomong le mowil, ne slomong le matay. Ke sfatay le, tey le metlasik senta yó kem banug, ne tey le kemgis senta yó kem liyun.

2 Pitér 3:1

Ni se gewuhu dulék smulat ebélê ye, yu kem weu dumuhu sogot nawa. Bè nim gewu sulat ni, olohu bud hegtulón du bè nawa ye yóm deng eles tngón ye anì gulit kehedem ye du yóm deng lolò ye.

Kem Lingón 82:2

Yó udélen ebélê le, monen, “Kmò kegenen de yóm là ktedeng kukum ye. Kmò kegenen de yóm tendo kfi ye yó kem tau gel mò sidek?

Sulat Pol Ebè Yó Kem Tau Hemtahu Bè Rom 14:18

Ke lómón yó klolò tekuy ke Krays, tey hligal bélê tekuy Dwata, ne hligal bélê tekuy kem dumu tekuy snéen.