Flipay 4:7 - Udél Dwata: Gna Kesfasad ne Lomi Kesfasad

⁷ Ke ni se gel nmò ye, gnóm ye yóm kenek nawa lemwót bè Dwata. Yóm kenek nawa yó, là gbek tekuy hmingón du yóm mò kmoen. Ke deng gnóm ye, là kóen bud sbeweg ne kehedem ye, baling menek kegnóm ye du lemwót bè yóm deng kessotu ye bè Krays Jisas.

Flipay 4:7 Referans Kwoze

Kun Snulat Jan 14:27

Wen kenek nawa tebelu bélê ye. Hol lómón yóm dou kenek nawa nim tebelu bélê ye ni. Là kóen mkél bè yóm kul kenek nawa yó kem tau là hemtahuhen. Hol bê ye hesbeweg kehedem ye, ne bê ye se abay hlikò.

Isaya 26:3

Uu se, Dwata, bemlay du yóm tahu kenek nawa bè yó kem tau hol nô bè nawa le mimón kóm, yó kem tau hol smalig béléem.

2 Tisalunika 3:16

Yó hem gónó tekuy mogot hol tendo henek nawa ye balù kihu sut bélê ye. Du se gónón lemwót yóm kenek nawa. Yó hem gónó tekuy mogot tendo nô bélê ye.

Kulasi 3:15

Wen yóm kenek nawa deng blay Krays. Nim kenek nawa ni mò gónó tekuy milô du yóm kun kóyô bélê tekuy Dwata. Yakà ni du gónón tmaba kut anì wen kenek nawa tekuy yóm kdê tekuy mò lówóhen. Ne hol gel dóyón tekuy dé Dwata.

Kem Lingón 29:11

Dwata se bemlay kul kgis yó kem tauhen. Du se bemlay kul kenek nawa.

Glasya 5:22

Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesbong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm kehyu kmò, ne yóm kteneb nawa,

Sulat Pol Ebè Yó Kem Tau Hemtahu Bè Rom 15:13

Yó hem Dwata hol bemlay kuy yóm kligal ne yóm kenek nawa lemwót bè yóm deng kehtahu ye béléen. Du se yóm nefet nawa tekuy. Ne lemwót bè yóm tey kfasang yóm Tulus Dwata gónón hol seflós temnù yóm hendón nefet nawa ye.

Kun Snulat Jan 16:33

Yó gónóhu eles tmulón du kuy ni kem ni anì lemwót bè yóm kessotu tekuy gónón wen kenek nawa ye. Angat tey wen gónó ye glayam lemwót bè yó kem tau là hemtahuhen,” mon Jisas, “okóm bê ye abay hlikò, abay se denge matù bélê le.”

Sulat Pol Ebè Yó Kem Tau Hemtahu Bè Rom 8:6

Ke són knóyô lówó gónón galak yóm tau, yó nefeten, hatay. Ke galak bè Tulus Dwata, yó nefeten, klowil laen dù sónen, ne wen kenek nawahen.

Sulat Pol Ebè Yó Kem Tau Hemtahu Bè Rom 5:1

Duhen ni, deng baling tedeng ne kton Dwata tekuy mlan bè yóm kehtahu tekuy. Deng tekuy sefyu ke Dwata mlan bè Jisas Krays yóm gónó tekuy mogot.

Ifisus 3:19

Kóyóu ke hol gnóm ye yóm tey kbong nawahen kuy. Ewenem yóm nawahen tekuy yó, là kô hol glileb tekuy du yóm mò kmoen. Ke deng tahu gnóm tekuy nim ni, hol lómón ke deng tekuy skél bè yóm kun kmò Dwata.

Isaya 48:18

Ke deng tehe hnungol ye yó kem hlauhu kuy, sana klelen he yóm kenek nawa ye lómón lel él. Ne sana kehlósu hegmò kuy bè yó kem hohon ye, lómón keseflósen gedkol ebè kilil yóm lewók mohin.

Sulat Pol Ebè Yó Kem Tau Hemtahu Bè Rom 14:17

Bè yóm kogot Dwata tau, là mlanen bè yóm gel ken ne ninum tekuy. Okóm mlan bè ktedeng nawa, ne kenek nawa, ne yóm kligal blayen tekuy yóm Tulus Dwata.

Isaya 48:22

“Okóm,” mon Dwata, “yó kem tau gel mò sidek, laen kô kul kenek nawa.”

Deng Hegfan 1:4

Ou se Jan gónón lemwót nim sulat ni. Hwitu ebè yó kem tau hemtahu bè yó kem hitu simbahan bè prubinsya Asya. Yó hem Dwata ne yóm Tulusen ne Jisas Krays hol tendo tmóbóng kuy, ne tendo henek nawa ye. Ni se yóm sana Dwata tenbut bè kbuten efet nim kmoen ni, ne du se yóm móyón bud sut ni. Yóm Tulus Dwata, wen hitu kay kfasangen ne eles tendo nô bè solu Dwata, bè yóm gónón myón kmamal.

Kun Snulat Luk 1:79

Angat heknasen yóm kifu lem blóng tekuy anì là hlós yóm kgolu tekuy elem hatay. Du semgalak tekuy bè yóm lan mò gónón hlós menek nawa kuy.”

2 Kurin 13:11

Duhen yó, kem dumuhu setwoli, hol ye gel hgulit. Hol hnungol ye ni kem hlauhu kuy ni. Hol sensotu ye kut nawa ye. Bê ye bud hesgólól kehedem ye. Ke ni se nmò ye, beyen bélê ye Dwata. Du se gónón lemwót yóm kesbong nawa ne yóm kenek nawa.

Lista 6:26

Dwata he tendo minguy kuy ne bemlay kuy kenek nawa.’ ”

Kun Snulat Luk 2:14

“Hol dóyón tekuy yóm Dwata nô bè yóm hol són longit geta. Ne hol wen kenek nawa kem tau te tonok, yó kem tau gel hefligal ke Dwata.”

Kem Lingón 85:8

Tey khungolu du ke tedu yóm udél Dwata yóm Dwata hol gónó me mogot, abay se fasaden tekuy kem kun tau yóm kenek nawa, syan ke là bud tekuy semfulék ebè yó kem sidek tehe nmò tekuy.

Flipay 4:9

Hol gel nmò ye yó kem deng dnalang ye lemwót bè yóm deng gungol ye ne yóm deng ton ye béléu. Ke yó se nmò ye, hlós nô bélê ye Dwata, yóm tendo henek nawa tekuy.

Kem Udél Hlalak Tehe Selumun 6:22

abay se yóm kul gel tolok malak yóm kóm klan, gel bnenteyen u ke kifu ne gel hnauhen u ke kemdaw.

Isaya 26:12

Ó Dwata, benlayem mi kehyu klowil. Tódô kdê yó kem deng gendeng me hono lemwót bè yóm któbóngem kum.

Kem Udél Hlalak Tehe Selumun 4:6

Béem kó bè nawahem yóm khulung hedem; yó se yóm semgyok kóm. Hol hnóem du nawam ne yó se mentey kóm.

Sulat Pol Ebè Yó Kem Tau Hemtahu Bè Rom 1:7

Ne duhen yó, smulate ebélê ye, yu kem kun kenbong nawa Dwata bè Rom. Deng tnabahen yu mò hol kun tau. Yó hem Dwata, yóm Mà tekuy, ne Jisas Krays yóm gónó tekuy mogot, hol tendo tmóbóng kuy ne tendo henek nawa ye.

Kem Udél Hlalak Tehe Selumun 2:11

Yóm khulungem mit du hyu yóm kmoem ne yóm khulungem temnef yó se yóm kemlung kóm.

Nihimaya 8:10

Ne ni, mulék ye ebè gónô ye ne hol ye hligal ne mò ye ken. Benlay ye yó kem tau là kóyówen yóm kul. Nim kdaw ni, kdaw hetfing tekuy ebè Dwata. Yó gónóm mon, hol bê ye abay heblat nawa abay se yóm kligal lemwót bè Dwata, yó se hol gónón lemwót yóm kgis tekuy.”

Jirimaya 33:6

Okóm angat wen he kdawu, bud temlob du yó kem deng gbà bè Jirusalim ne bud henyuhu klówó yó kem tauhen. Ne bud hefeneku ke benwu le ne laen kô dù bud hemen le yó kem tau nô lemen.

Isaya 45:7

Ou se tehe dmimun du yóm layag ne bud ou se tehe dmimun du yóm kifu. Béléu gónón lemwót yóm gel tóbóng ne béléu se gónón lemwót yóm gel gfà. Ou se mò kul ni kem ni, yóm Dwata hol gónó mogot.

Hibru 13:20

Deng hlowil Dwata yóm gónó tekuy mogot Jisas. Lemwót bè yóm katayen bélê tekuy yó, hol lómón ke du yóm hol geta bè yó kem semgyok ubiha, ne tekuy se yóm hol sen-gyoken. Yóm litô hamaen bélê tekuy, yó se hol hemget du yóm lomi lan nmò Dwata mò lan tau ebéléen, ne laen kô sónen yóm lan nmoen yó. Yó hem Dwata gónón lemwót yóm kenek nawa tekuy hol tmóbóng kuy anì gbek ye mò du yóm kun kóyô. Ne bud du se hembaling tekuy kem tau mò hol hefligal du hlanen bè Jisas Krays. Hol bê tekuy abay nmò sónen yóm kdóyón tekuy ke Krays.

Deng Hegfan 2:17

Duhen yó, yóm tau wen klinguhen, hol hnungolen dé yóm tulón yóm Tulus Dwata bè yó kem tau bè ket simbahan. Yó kem tau gel matù bè yóm sidek gel sut, angat hkenu kul yóm ken là ton mata du mò hekgis kul. Ne angat benlayu lu ket kul sotu yóm botu bukay wen lomi boluy nô du. Laen dù dumu tau temngón du yóm boluy yó, tek són yóm tau gmuta du.”

Sulat Jud 1:1

Ou se Jud gónón lemwót nim sulat ni. Ou se yóm sotu tau mò tóbóng lówó Jisas Krays, ne ou se yóm twoli Jim. Smulate ebélê ye yu kem tau deng tehe tnaba Dwata. Tey kbong nawahen kuy Dwata, yóm Mà tekuy bè longit, ne tey gel kofinen kuy Jisas Krays.

Flipay 1:2

Yó hem Dwata yóm Mà tekuy, dalang se yóm gónó tekuy mogot Jisas Krays tendo tmóbóng kuy ne tendo henek nawa ye.

Jirimaya 32:16

Tikóng deng oguhu ke Baruk yóm klatas tonok yó koni ominu mni bè Dwata, monu,

2 Kurin 10:5

Dalang se yó kem tau hegmón hemkéng ke Dwata, gbek me malà kul anì laen dù gmò le. Bè yóm kbalà me kul yó, botong tenles le kehedem le, ne baling le tau mimón ke Krays.

Flipay 1:1

Ou se Pol gónóhen lemwót nim sulat ni, lewu me Timuti, tau me gel tóbóng lówó Krays Jisas. Smulat me ebélê ye yu kem kun tau Dwata bè yó bè syudad Flipay, yóm kdê ye deng baling ssotu bè Krays Jisas. Homong me lemen snéen yó kem tau fen gel malak kuy bè sembahan ye kkólen bè yó kem tau fen tmóbóng kul.

Flipay 4:19

Ke Dwata kun, lemwót bè yóm tey kendengenen, gotu blayen kuy yóm gónó ye élél hlanen bè Krays Jisas.

Flipay 4:21

Tey gel kólómu kul yó kem kun tau Dwata bè yó, yó kem tau deng nfun Krays Jisas. Dalang se ni kem dumu tekuy setwoli bè ni, tey gel kólóm le kuy.