Flipay 2:1 - Udél Dwata: Gna Kesfasad ne Lomi Kesfasad

¹ Lemwót bè yóm deng kessotu ye bè Krays, deng setgel ne nawa ye. Gel henyuhen nawa ye lemwót bè yóm kbong nawahen kuy. Ne deng tey tilob kesetngón ye du ne yóm Tulus Dwata. Deng tey tilob ne yóm kmò kestóbóng ye ne yóm gel keskodu ye.

Flipay 2:1 Referans Kwoze

Kulasi 3:12

Yu se yó kem tau Dwata, kem tau kenbong nawahen, kem tau deng néléken mò kun nfun. Duhen yó, hol dnalang ye yóm nawa skodu ne yóm nawa sbasa, ne yóm keheglaan ye bè kem dumu ye. Ne hol dnalang ye snéen yóm kganag nawa ne yóm khanay nawa.

1 Jan 4:12

Laen kô dù tau deng mton ke Dwata. Okóm ke hol tekuy sbong nawa, yó se gónó tekuy ssotu bè Dwata. Ne yóm kessotu tekuy bè Dwata yó, yó se gónón baling gulit yóm kesbong tekuy nawa.

2 Kurin 13:14

Yó hem gónó tekuy mogot Jisas Krays hol tendo tmóbóng kuy, ne tendo gfan bélê ye he yóm kbong nawa Dwata kuy, ne yóm knóen bélê ye yóm Tulus Dwata.

Kulasi 2:2

Yó gónów mò du anì wen lanu temgel nawa ye, ne anì wen kessotu nawa ye lemwót bè yóm kesbong nawa ye. Kóyóu ke hol mbegel kehtahu ye lemwót bè yóm deng ketngón ye du yóm ktahuhen. Ke lómón ni se kmoen, tngón ye yóm tehe buni Dwata bè yó kem tau gnan, duhen Krays.

1 Kurin 12:13

Lómón yó se yóm kdê tekuy lemolò ke Krays. Bè yóm tehe kehbabtays tekuy, henbalingen tekuy sotu lówó yóm Tulus Dwata, kihu ke Ju duhen ke là Ju le, ke tau klifen duhen là klifen le. Liman ke tek sotu lówó tekuy, abay se tek sotu yóm Tulus Dwata tendo nô bélê tekuy.

Kem Lingón 133:1

Tey minggel gemnóm du yóm kessotu nawa yó kem tau Dwata.

Glasya 5:22

Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesbong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm kehyu kmò, ne yóm kteneb nawa,

Glasya 4:6

Wen lan Dwata hdilô du bélê tekuy yóm kngaen tekuy, duhen yóm ksuen du bélê tekuy yóm Tulus yóm Ngaen. Lemwót bè yóm knóen bélê tekuy yóm Tulusen yó, yó se gónó tekuy là bud lengayà tmaba du, “Mà.”

Kul Nmò 4:32

Tey tilob kessotu nawa le yó kem tau hemtahu bè Jisas. Balù yó kem kimu le, laen kô mtukul mfun du bélê le. Ke wen bélê le wen gónón élél, tódô sentóbóng le.

1 Jan 3:24

Yóm tau ke nimónen yó kem hlau Dwata yó, deng le ssotu Dwata ne, ne tódô nô béléen se Dwata. Ne lemwót bè yóm kun Tulus deng hnóen bélê tekuy, tódô tngón tekuy se yóm deng kessotu tekuy bè Dwata.

Kun Snulat Jan 17:13

Ni, Mà, móyóne mulék ebéléem. Ni se yóm hnihu béléem bè yóm tolo knóu dini ni anì hol gsengel kligal le ni kem dou tau, lómón yóm dou kligal.

1 Jan 4:16

Deng tngón tekuy ne yóm tey kbong nawa Dwata tekuy, ne yó se gel genléd nawa tekuy. Tey bong nawahen tau yóm Dwata. Yóm tau ke kenbong nawahen yó kem dumuhen, deng le ssotu Dwata ne yóm tau yó, ne hlós nô béléen Dwata.

Flipay 3:3

Bè ktahuhen, tekuy se yóm tau wen tahu ilóen, là kô lu du. Abay se tekuy se yó kem tau gel hloni bè Dwata hlanen bè Tulusen. Tekuy se yóm alì hligal lemwót bè yóm deng kessotu tekuy bè Krays Jisas. Là bud snalig tekuy du ne yó kem gel hlolò tau mò lan tekuy gewà gu lem hatay.

1 Kurin 3:16

Deng tngón ye se yóm lówó tekuy kun gónô Dwata, ne deng nô bélê tekuy se yóm kun Tulus Dwata.

Sulat Pol Ebè Yó Kem Tau Hemtahu Bè Rom 8:26

Yóm Tulus Dwata, tey ketgelen tekuy bè yóm gónó tekuy gel lunog. Lómón yóm gel kni tekuy ebè Dwata, là hol tngón tekuy du ke tedu yóm mò utóm tekuy. Okóm yóm Tulus Dwata fen hemkodu du bè Dwata yóm hol hyu bélê tekuy. Yóm fen gel kehkoduhen yó, là hulung tekuy mon du.

Sulat Pol Ebè Yó Kem Tau Hemtahu Bè Rom 5:5

Angat dohò kguta tekuy du yóm hendón tekuy yó, abay se deng gotu gnóm tekuy ne yóm kbong nawa Dwata tekuy, hlanen bè yóm Tulusen deng basahen tekuy.

Kul Nmò 2:46

Ket kdaw le gel stifun ebè Gónô Dwata yó kem tau hemtahu bè Jisas ni. Gel le slawa, ne lel le gel segbót mken. Tey tendo gel kehyu nawa le ne tilob kessadat le.

1 Pitér 1:2

Deng tehe eles tngónen kuy Dwata, yóm Mà tekuy bè longit. Ne deng néléken yu ne nmoen yu hol kun tau mlan bè yóm kun Tulus. Yó gónón mò du yóm yó anì hol nimón ye Jisas Krays ne anì gotu hnifóten yó kem salà ye mlan bè yóm deng khamà Jisas litóen. Dwata he hol tendo tmóbóng kuy ne hol tendo henek nawa ye.

Hibru 6:18

Duhen yó, nim lewu tehe nmò Dwata ni, duhen yóm fasaden ne yóm kehgeten du, là kóen na a megetles, abay se yóm Dwata là kóen mò kéng. Yó gónóm mon, bè yóm kdê tekuy deng mlóy ebéléen, deng tey mgel nawa tekuy du ne yóm hendón nangat tekuy deng fasaden tekuy.

Flipay 1:8

Tódô tngón Dwata yóm hol ktahuhen yóm nawahu ebélê ye, yóm nawa hol lemwót bè Krays Jisas.

Ifisus 4:4

Tekuy kem tau hemtahu, hol lómón ke deng ssotu lówó tekuy. Tek sotu snéen yóm Tulus Dwata. Ne tek sotu se yóm hol hendón nefet nawa tekuy, duhen yóm deng taba Dwata tekuy.

2 Kurin 2:14

Okóm tey kdóyónu ke Dwata, abay se lemwót bè yóm deng kessotu me bè Krays, hol lómón ke mi se yó kem tau deng nfunen bè yóm tehe katuen. Duhen mi se yóm tau hol nfunen mò gel htonen bè dumu tau. Ne hlan Dwata bélê me yóm kehbólen du bè klamangen yóm kun kmò Krays. Yóm tulón nwit me yó, hol lómón ke yóm hboo alì minggel boohen.

1 Kurin 15:31

Béléu dou, kem dumuhu setwoli, wen se tendo móló hmatay dou ket kdaw. Yó gónóhu tmulón du kuy nim ni lemwót bè yóm tey kligalu bè yóm deng kessotu tekuy bè Krays Jisas, yóm gónó tekuy mogot.

Kun Snulat Jan 14:27

Wen kenek nawa tebelu bélê ye. Hol lómón yóm dou kenek nawa nim tebelu bélê ye ni. Là kóen mkél bè yóm kul kenek nawa yó kem tau là hemtahuhen. Hol bê ye hesbeweg kehedem ye, ne bê ye se abay hlikò.

Kun Snulat Jan 14:18

Bè yóm kógówu ni, là kô tódô bayau kuy. Angate bud semfulék ebélê ye.

Kun Snulat Luk 2:25

Bè yóm kdaw yó, wen sotu tuha logi nô bè Jirusalim boluyen Simyun. Nim tau ni, tedeng knawahen, ne tey klikoen ke Dwata. Sal gel nangaten yóm kehewà Dwata kul yó kem tau Israél. Tendo nô béléen yóm Tulus Dwata,