Filimun 1:14 - Udél Dwata: Gna Kesfasad ne Lomi Kesfasad

¹⁴ Okóm là kóe móyô ke tô ten-gnahu nawahem. Hnongum du ke deng hol tikaw kewóten lem but blututem yóm któbóngem do, là mlanen bè kubug te kóm. Yó gónóm mon, laen dù nmou ke là lemwóten béléem.

Filimun 1:14 Referans Kwoze

2 Kurin 9:7

Duhen yó, yake ket tau eles hemdem du kbongen yóm angat blayen. Là kóen hyu yóm bemlay ke là nóen bè nawan, duhen ke song bemlay ke tek nubug le. Abay se ke Dwata kun, tey kbong nawahen du yóm tau hol nô bè nawahen bemlay.

1 Tutul Israél 29:17

Tngónu se, Dwata, gel henklolem yóm nô lem but blutut me, ne teyi hligal ke tonem yóm kgulit me. Nim kdê blayu ni, hol lemwót lem but blututu, ne deng hol tonu bè yó kem tauhem nô bè ni yóm hol kewóten lem but blutut le se kul yó kem blay le kóm, mung du yóm tey kehligal le.

2 Kurin 9:5

Yó gónóhen wen eles hógówu tukô gna dou anì eles hentifes ye gu laanu là deng kól dyó yóm blay tehe fasad ye. Bè yóm nmò ye yó, yó gónón hol gfan yóm kewóten bè nawa ye yóm keblay ye, laen dù tlek hmau du kuy.

2 Kurin 8:12

Abay se ke lemwót bè but blutut ye yóm keblay ye, hligal du Dwata. Là kô nan e ktes du bélê ye yóm là gbek ye du, okóm yó dé kóyóen ke hol blay ye yóm són kuy gbek.

2 Kurin 1:24

Là kô nubug me kuy bè yóm kuy kehtahu. Kaem deng sana tngón me deng mbegel ne kehtahu ye. Okóm yó dé kóyô me ke wen lan me tmóbóng kuy anì hol temnù yóm kligal ye.

1 Kurin 9:17

Ke tódô dou lenbù nmò nim ni, knóón ke gmutahe du sukéy. Okóm ni se hmò Dwata do, ne tey mget ksigangen du tahu.

Kem Lingón 110:3

Bè yóm kdaw angat kwitem sgida, wen tey óyô le tmóbóng kóm yó kem tauhem. Yó kem ngà logi sendaluem alì mólós nes le, angat le sut béléem ket hlafus, hol lómón kmò le, lómón ke amù gel sut hlafus.

1 Kurin 9:7

Tulón ye dou kun, deng wen sendalù mung bè gida kô ke tlek kun mebel mò gastuhen? Ne bè yóm tau gel mò hulu, là dog kenen du ne kô yóm gel nutahen? Dalang se yóm tau semgyok ógóf, là dog wen kem ofolen du ne kô yó kem ógóf sen-gyoken? Là kô yó du. Sal gel wen ofolen du yóm kun leniteg yóm tau.