Dwata 8:19 - Udél Dwata: Gna Kesfasad ne Lomi Kesfasad

¹⁹ Hol bê ye abay klifót yóm sana kuy Dwata hol gónó mogot ne bê ye abay beklil ebè yó kem dumu dwata ke tô ye tmaba ebélê le ne ke tô ye mtud bukol bè solu le. Ke ni se nmò ye, eles tulónu kuy kemdaw ni angat ye tódô gotu meglà.

Dwata 8:19 Referans Kwoze

Dwata 4:26

Ke là nimón ye du nim monu ni, angat ye tódô kendel lana ta yóm tonok móyón nfun ye. Là kóen legen knô ye tahen yóm tonok móyón nfun ye nô sentu Él Jurdan, tódô ye gotu meglà. Kemdaw ni tnabahu longit ne tnabahu tonok mò temksì du bélê ye nim udélu ni.

Kun Snulat Luk 13:5

Là yó du. Bede yó tódô tulónu kuy, ke là eles ye hegsel, ne ke là knogol ye du yó kem sidek gel nmò ye, angat ye matay mekto snéen kuy.”

Kun Snulat Luk 13:3

Là yó du. Bede yó tódô tulónu kuy, ke là eles ye hegsel, ne ke là knogol ye du yó kem sidek gel nmò ye, angat ye matay mekto snéen kuy.

Sifanaya 3:6

Yó udél Dwata, monen, “Deng gotu genlau yó kem dumu benwu hmilol. Gotu genbau yó kem syudad le dalang se yóm beng hmilol le, gomong yóm gónó le gel heklung deng gotu genbau. Balù sotu ke wen bud lemolò du yó kem lan le, laen kô dù bud tauhen yó kem syudad le, balù sotu ke wen dù tebel.

Sifanaya 1:18

Bè yóm kdaw alì kebut Dwata kul yó, laen kô dù lanen lemwà kul yó kem blówón bukay le ne yó kem tahu blówón le. Yóm kebut Dwata kul yó hol lómón ke ofi, angat gotu kenen yóm klamang tonok. Angat kendel nmoen són le yóm kdéen tau talak tonok.

Amus 3:2

“Bè kdê yó kem kmuleng talak tonok tek sónen yu yóm dou nélék. Yó gónóm mon là kô gbeku du ke là tnafaku kuy bè kdê yó kem sidek gel nmò ye.”

Danyél 9:2

bè yóm tanay halay kogoten yó, ou se Danyél hemnagì du yóm udél Dwata deng hsulaten yó kem tugoden. Wen tonu bè yóm kun snulat Jirimaya yóm sotu tau tugod yóm sana kum Dwata hol gónó mogot. Yó tonu hitu folò halayen deng kegenen gbà yóm benwu Jirusalim.

1 Samwél 12:25

Okóm ke henlós ye mò sidek angat ye meglà, dalang se yóm tau hol geta bélê ye.”

Juswa 23:13

tódô eles tulónu kuy, là kô bud lo Dwata du bélê ye ni kem dù hohon ye ni ke sok nundug ye lu. Deng mom lu gónó ye gholot, duhen ke lu yóm blatik gónó ye bkó. Ne tey sidek kdesen bélê ye, lómón ke nfes le gu tekwang ye ne lómón ke huling ye sual. Ngangen mò du bélê ye yóm yó efet ye gotu mekfung ta nim tey tonok hyu deng blayen kuy yóm sana kuy Dwata hol gónó mogot.

Dwata 31:20

Nwitu lu ebè yóm tey tonok hyu ne wen tey tebasen, lómón yóm tehe fasadu bè yó kem tehe fù le. Bè yóm tonok yó, là bud le élél du bè ken ne mdengen klowil le tahen. Okóm angat knogol le ou ne tmaba le ebè yó kem dumu dwata. Kenbê le o ne nulé le yóm deng senfasad me.

Jirimaya 7:6

Tenflok ye ne smukat yó kem tólóng tau nô lem blóng ye dalang se yó kem ngà hikit ne yó kem libun bolu. Tenflok ye ne hmatay kul yó kem tau laen dù salà le. Tenflok ye ne tmaba ebè yó kem dumu dwata, abay se yó yóm hemsidek knô ye.

Jirimaya 25:6

Bê ye abay hebut ou ke mlan bè ktaba ye ebè yó kem dwata kéng ye anì là tnafaku kuy.’

Malakay 4:4

“Hol bê ye abay klifót mimón du yó kem tehe hlolò Musis kuy yóm tau tóbóng lówóhu. Ditu bè Bulul Sinay gónóhu tehe bemlay du yó kem dou hlau, ne yó kem dumu hlolou kul mò nimón yóm kdéen tau Israél.