Dwata 7:12 - Udél Dwata: Gna Kesfasad ne Lomi Kesfasad

¹² Ke hol hnungol ye yó kem hlau Dwata yó koni ne ke teneb ye mimón du, yó se gónó Dwata dmohò du yóm fasaden kuy ne hegfanen bélê ye yóm kbong nawahen kuy, yóm nawa là monolen lómón yóm deng fasaden yó kem tehe fù ye.

Dwata 7:12 Referans Kwoze

Dwata 7:9

Yó gónóm mon, hol sù ye lem hendem ye nim ni. Yóm sana kuy Dwata hol gónó mogot, tek sónen du Dwata ne là kóen monol nawahen. Là kô klifóten du yóm tehe senfasad ye ditu bè Bulul Sinay ne gel hegfanen bè yó kem tau kembong nawa du ne mimón yó kem kun hlau yóm kbong nawahen kul efet kól bè hilu libu bud lugod le.

Mika 7:20

Angat hol hegfanem bè yó kem kóm tau yóm là konol nawam ebélê me ne yóm tey kbong nawahem kum, lómón yóm deng tehe fasadem bè yó kem tehe fù me ekni le Abraham ne Jakub.

Kun Snulat Luk 1:55

Deng tey kkoduhen ke Abraham ne yó kem semfu gu béléen, ne laen kô dù sónen yóm kkoduhen tekuy.”

Kehewà 15:26

Yó monen mò kul, “Ke hol nimón ye o ne ke tedeng ktonu du yóm gel nmò ye ne ke nimón ye yó kem hlauhu kuy, là kô naw e tafak du kuy yóm des tehe tafaku yó kem tau Idyip. Ou se Dwata, yóm gel hkó des ye.”

Dwata 7:11

Yó gónóm mon, hol nimón ye yó kem hlau Dwata deng toloku kuy kemdaw ni.

Kem Lingón 149:9

anì tafak le kul yóm tafak deng mon Dwata bè sulaten. Ni se mò gónó le megdóyón yó kem tau là monol nawa le bè Dwata. Hol dóyón tekuy Dwata.

Jirimaya 11:5

Yó gónóhu tehe mon du nim ni anì dohò yóm deng fasadu yó kem fù ye, duhen yóm keblayu du kul yóm tey tonok hyu ne tonok alì tembas, yóm tonok deng nfun ye ni kmoen ni.’ ” Yó balà Jirimaya ke Dwata, monen, “Tahu se, Dwata, yóm monem yó.”

Dwata 1:8

Yóm kdê benwu monu ni, ni se yóm tonok deng tehe fasadu yó kem tehe fù ye le Abraham ne Isak ne Jakub ne bè kdê yó kem semfu gu bélê le. Mógów ye etu ne henek ye tahen.’ ” Là gomongen bè nili yóm tsaptér 1:9 efet kól bè tsaptér 3:29. Yó tulónen bè ni kem tsaptér ni yóm ktutul Musis du bè yó kem tau Israél yóm tehe kewót le gu bè Idyip. Ke móyô ye semfala du bè Tboli yóm tulónen, gbek ye semfala du bè ni kem bok nii abay se senged yóm tulón le. Kehewà 18 Kélék le yó kem tau kmukum bélê le Lista Israél 11 Knô le lem yóm benwu laen hol wen tauhen Lista Israél 13 Yó kem tau na a hemkana bè Kanan Lista Israél 14 Ksonol le ke Dwata yó kem tau Israél Lista Israél 20 Là kehlus Dwata ke Musis hlós ebè Kanan Lista Israél 21 Kegmò le bè le Sihun ne Ug Lista Israél 32 Yó kem tau Israél fen menwu fi dmata kdaw Él Jurdan

Dwata 5:10

Okóm bè yó kem tau kembong nawa do ne mimón yó kem dou hlau hegfanu bélê le yóm kbong nawahu kul efet kól bè hilu libu bud lugod le.

1 Bok Kem Tau Hol Geta 8:23

ne mni bè Dwata, monen, “Ó Dwata, yóm kum Dwata yó kem tau Israél, laen kô dù dumu Dwata semnged kóm bè longit duhen ke dini talak tonok. Là kô klifótem du yóm tehe senfasad ye yó kem tauhem, ne là kóen monol yóm kbong nawahem kul ke hol lemwót lem but blutut le yóm kimón le kóm.

Nihimaya 1:5

“Ó Dwata yóm sana kum Dwata hol gónó me mogot nô bè longit. Uu se yóm hol dandónen geta, yóm Dwata knóón bang knikò. Là kóen mkó bè nawahem yóm tehe kesfasad ye yó kem tau kembong nawa kóm, yó kem tau mimón yó kem hlauhem.

Nihimaya 9:32

Ó Dwata yóm sana kum Dwata, uu se yóm hol dandónen geta, yóm hol knóón bang knikò, yóm alì mfasang. Là kóen na a mkó bè nawahem yóm tehe senfasad ye yó kem tauhem. Lenwóten bè yóm tehe alì kdà le kum elaan yó kem tau hol geta bè Asirya efet ni kmoen ni, tey keglayam me. Deng tonem se yóm tey keglayam me yóm kdê me, yó kem tau hol geta bélê me ne yó kem malak kum ne yó kem tau gel blóng me ebéléem ne yó kem tugodem ebélê me ne yó kem fù me ne kdê yó kem dumu me tey keglayam le.

Kem Lingón 103:18

syan ke là mkóhen bè nawa le yóm tehe senfasad le Dwata, ne ke hol le teneb mimón du yó kem kun hlau.

Danyél 9:4

Mnihe bè yóm sana kum Dwata hol gónó mogot, benkasu béléen yóm salà me kem tau Israél, monu mò du, “Ó Dwata yóm Dwata hol mfasang ne bang knikò. Sal gel dnohoem yóm tehe senfasad kuy, duhen yóm kbong nawahem yó kem tau kembong nawa kóm ne mimón yó kem hlauhem.