Dwata 6:2 - Udél Dwata: Gna Kesfasad ne Lomi Kesfasad

² Bè yóm klawi ye mowil dalang se yó kem semfu gu bélê ye hol knikò ye Dwata, yóm sana kuy Dwata hol gónó mogot ne hol nimón ye yóm kdê hlauhen tulónu kuy ni. Ke ni se nmò ye angat tahà ktau ye.

Dwata 6:2 Referans Kwoze

Dwata 4:40

Hol nimón ye yóm kdê kun hlau kuy, duhen yó kem deng toloku kuy kemdaw ni anì hyu kógów klowil ye dalang se yó kem angat semfu gu bélê ye. Hol nimón ye yó kem kun hlau kuy yó anì angat mò hlós knô ye ta yóm tonok blayen kuy yóm sana kuy Dwata hol gónó mogot, yóm tonok hlós nfun ye efet kól bè laen dù tul sónen.” Là gomongen bè nili yóm bérs 41 efet kól bè bérs 49. Tulónen yóm tlu kem benwu htólóng Dwata fi dmata kdaw Él Jurdan mò gónó le e mlo yó kem tau gembonok là lenbù le du. Bud tulónen snéen yóm benwu gónó le kmamfù yó kem tau Israél bè yóm kdaw yó, duhen yóm tehe benwu yó kem tau Amurayt. Yó gónó kem tau Israél gemwa du yóm benwu yó lan le tehe gemmò bè yóm kwit le sgida bè le Sihun ne Ug, hono kem tau hol geta malak yó kem tau Amurayt.

Kehedem Tau Tmolok 12:13

Ni se mò sónu du. Hol knikoem Dwata, ne nimónem yóm kdê hlauhen kóm, yakà ni du yóm deng sigangen ta yóm kdéen tau.

Dwata 13:4

Són Dwata hol lolò ye yóm sana Dwata hol kuy gónó mogot, mung du yóm klikò ye du. Hol nimón ye ne lolò ye yó kem deng hlauhen kuy. Tmaba ye ebéléen ne hol ye hteneb mimón du.

Kehewà 20:20

Mon Musis se mò kul, “Bê ye abay hlikò. Yó gónó Dwata hegfan bélê ye nan e tnilów yu. Ne lemwót bè yóm klikò ye ke Dwata, yó gónón wen klikò ye mò salà.”

Kem Lingón 128:1

Hligal le kul yó kem tau wen klikò le ke Dwata, yó kem tau gel mò du yó kem hloloen kul.

Dwata 5:16

Hol nadat ye mà ye ne yê ye. Ou se yóm sana kuy Dwata hol gónó mogot fen hmau du kuy nim ni anì hyu kógów klowil ye ne anì tahà ktau ye ta yóm tonok blayu kuy.

Kem Udél Hlalak Tehe Selumun 3:16

Yó bunguhen yóm khulung hedem htahaen ktauhem, benlayen u kendengen ne kegdóyón.

1 Pitér 1:17

Bè yóm gel kni ye bè Dwata, gel taba ye du Mà. Ne tahu se yó, Mà ye yóm Dwata. Okóm angat knukumen yóm nmò tau, yóm ket kuy na sotu, ke hyu duhen ke sidek. Ne laen kô dù tau knihuhen. Duhen yó, bè yóm klawi ye mowil te tonok, yake hol knikò ye Dwata.

Kem Lingón 111:10

Yóm klikò le ke Dwata, yó se hol buten yóm khulung le hedem. Yóm kdê tau mimón du, wen ofol le du yóm kimón le yó. Bê tekuy nmò sónen yóm kdóyón tekuy du.

Dwata 10:20

Hol knikò ye yóm sana kuy Dwata hol gónó mogot ne olon du gónó ye e tmaba. Hol ye hteneb mimón du ne olon bè boluyen gónó ye gel hlan du ke wen fasad ye.

Kun Snulat Luk 12:5

Tódô tulónu kuy yóm mò hol knikò ye,” monen. “Hol knikò ye Dwata, abay se ke deng hnatayen lówó ye, wen kwalisen tmudà kuy elem lanaw ofi. Du dé yóm hol tahu knikò ye.

Kem Udél Hlalak Tehe Selumun 16:6

Mlan bè kogot nawa ne kteneb tau bè Dwata gónón hmifót salaen ne mlan bè klikò tau ke Dwata gónón gemkogol yó kem nmò sidek.

Dwata 6:7

Hol bud tolok ye bè yó kem ngà ye. Tendo bud gel sensulit ye bélê le balù kihu gónó ye nô, ke nô ye bè gónô ye duhen ke mógów ye, ke hegnô ye duhen ke mò ye nmò, hol tendo sensulit ye bélê le.

Dwata 4:10

yóm kdaw tehe kdà ye bè solu yóm sana kuy Dwata hol gónó mogot bè Bulul Sinay, yóm kdaw tehe kmonen du mò dou, ‘Gotu sentifunem lu yó kem tau. Kóyóu ke gungol le yóm udélu ebélê le anì wen klikò le dou bè yóm klawi le mowil ne anì bud tolok le bè yó kem ngà le snéen yóm klikò le dou yó.’ ”

Tekang Kbuten 22:12

Bud mon yóm hógów Dwata, “Hlasaem yóm suk. Béen abay wen nmoem béléen yóm ngà. Ni ne deng tngónu wen klikoem ke Dwata ne tey kimónem du, abay se là kô nalihem du béléen yóm hol tek són ngaem.”

Tekang Kbuten 18:19

Deng néléku mò gel hmau yó kem ngaen ne yó kem fuen anì nimón le ou ne nmò le yóm tedeng. Ke mimón le, angat dnohou yóm deng fasadu ke Abraham.”

Dwata 5:33

Gotu nimón ye yóm kdéen anì hyu kógów klowil ye ne hlós knô ye ta yóm tonok móyón nfun ye.”

Kehewà 20:12

Hol nadat ye mà ye ne yê ye anì tahà ktau ye ta yóm tonok blayu kuy.

Dwata 4:9

Bede hol ye eles temgama. Bè yóm igò ye tolo mowil, hol bê ye abay klifót yóm deng ton mata ye, yóm deng nmò Dwata bélê ye. Hol tulón ye bè yó kem ngà ye ne bè yó kem témê ye

Dwata 6:1

Yó bud mon Musis mò kul, “Ni se yó kem hlau htugod Dwata dou ebélê ye, yóm sana kuy Dwata hol gónó mogot. Yó gónón htugod du do ebélê ye ni kem hlau ni mò hol tendo nimón ye bè yóm knô ye ta yóm tonok mò gónó ye henek nô.

Kem Lingón 91:16

Yó ofol blayu kul, angat htahau klowil le, ne angat lenwau lu.”

Dwata 6:24

Ne yó hloloen tekuy yóm sana Dwata hol gónó mogot ke hol nimón te yó kem kun hlau ni ne ke nô bè nawa tekuy yóm klikò te du. Ke ni se nmò tekuy, tendo tnóbóngen tu ne tendo hyu kógów klowil tekuy.

Dwata 30:19

Héléku yu ni, mahi du se nóyô ye? Móyô ye mowil kô duhen ke móyô ye matay? Móyô ye kô ke tnóbóng Dwata yu duhen ke tnafaken yu? Tnabahu longit ne tonok mò temksì du bélê ye yóm nélék ye kemdaw ni. Yó dé hol nélék ye yóm mò gónó ye mowil.

Dwata 30:20

Kenbong nawa ye yóm sana kuy Dwata hol gónó mogot. Hol nimón ye ne hol ye hteneb béléen dalang se yó kem angat semfu gu bélê ye anì tahà klowil ye ta yóm tonok tehe fasaden yó kem tehe fù ye le Abraham ne Isak ne Jakub.”

Juswa 4:24

Yó gónó Dwata mò du nim ni anì tódô kdéen tau talak tonok gotu temngón du yóm tey kfasangen ne anì wen hol klikò ye du se kuy yóm kuy Dwata hol gónó mogot laen dù tul sónen.”

1 Bok Kem Tau Hol Geta 8:40

anì yó wen klikò le kóm yó kem tauhem ne lolò le u bè yóm igò le mowil ta yóm tonok deng tehe blayem yó kem tehe fù me.

Kem Udél Hlalak Tehe Selumun 9:11

Yakà yóm khulung hedem du htahà ktauhem ne wen he suden yóm klowilem.

Jirimaya 32:39

Ne laen kô dù tul sónen yóm keblayu kul yóm kessotu nawa le anì sónmoen wen klikò le dou mò kul kehyu dalang se yó kem angat lugod le.