Dwata 5:9 - Udél Dwata: Gna Kesfasad ne Lomi Kesfasad

⁹ Bê ye abay mtud bukol bè yóm dwata lenbù duhen ke tmaba ebéléen abay se ou yóm sana kuy Dwata hol gónó mogot. Tey sidek kélés nawahu du ke wen dumu dwata gónó ye e tmaba. Tnafaku yó kem tau kembê dou, gomong megtafak snéen yóm tanay lugod le efet kól bè gfaten.Okóm bè yó kem tau kembong nawa do ne mimón yó kem dou hlau hegfanu bélê le yóm kbong nawahu kul efet kól bè hilu libu bud lugod le.

Dwata 5:9 Referans Kwoze

Kehewà 34:7

Là kô kóhu du yóm kbong nawahu tau efet kól bè yó kem hilu bud lugod le. Yó kmò kehegfanu du bélê le yóm nawahu yó, gel hnifótu yó kem sidek gel nmò le ne yóm là kimón le do. Okóm yóm tau ke là kóhen du yó kem sidek gel nmoen là gbeku du ke là tnafaku du, gomong megtafak yó kem ngà le ne témê le lenwóten bè tanay lugod le efet kól bè gfat lugod le.”

Lista 14:18

‘Ou se yóm Dwata hol gónó mogot. Là kóe mahil lembut ne sal gel hegfanu yóm tey kbong nawahu tau. Ne gotu hnifótu yó kem salà le ne yóm alì katù le do. Okóm là kô gbeku là tmafak kul bè yó kem salà le. Lemwót bè salà yó kem tuha le, là kô gbeku du ke là se tnafaku yó kem ngà le ne témê le efet kól bè getluhen ne bè gfat yóm lugod le.’ Yó se, Dwata, yóm tehe udélem ebélê me.

Kehewà 34:14

Béen abay wen bélê ye tmaba ebè yó kem kul dwata abay se tey sidek kélés nawahu du ke wen dwata lennged gónó ye tmaba.

Jirimaya 32:18

Tey bong nawahem tau ne tey hyu kmoem ebélê le yó kem hilu libuhen kwen le, okóm gel tnafakem yó kem ngà le lemwót bè salà yó kem tuha le. Uu se yóm Dwata hol geta alì mfasang, yóm Dwata laen dù là gbeken du.

Dwata 4:16

anì là gemsalà ye bè Dwata ke lan ye mò yó kem dwata lennged balù kihu kayen, logi duhen ke libun,

Dwata 4:24

abay se yóm sana kuy Dwata hol gónó mogot, tey sidek kélés nawahen du ke tólóng dwata tnaba ye. Yóm kebuten hol lómón ke dilóf ofi, tódô himoten kdéen.

Dwata 6:15

Ke tmaba ye ebè yó kem dumu dwata kéng, lenbuten yu Dwata. Ne yóm kebuten kuy yó hol lómón ke mken ebélê ye yóm tey ofi, gotu sulék genlaen yu. Abay se yóm Dwata tendo gel nô bélê ye, du se yóm sana kuy Dwata hol gónó mogot ne tey sidek kélés nawahen du ke wen dumu dwata lennged tnaba ye.

Dwata 7:10

Okóm là kô gbeken du ke là géhél tnafaken kul yó kem tau kmutó nawa du.