Dwata 33:12 - Udél Dwata: Gna Kesfasad ne Lomi Kesfasad

¹² Yó udél Musis gbak ebè yó kem sfu Bindyamin, monen, “Yó kem sfu Bindyamin, lu se yó kem tau kenbong nawa Dwata, kem tau tendo kenlungen. Tendo bnenteyen lu ket kdaw ne tendo hlós nô lem blóng le.”

Dwata 33:12 Referans Kwoze

2 Tutul Israél 15:2

Yó nmoen, senlongen Asa yóm tau hol geta, bè yóm kkólen gu bè gida, hgelen udélen monen mò du, “Hnungolem ou, ne yu kem sendalù Juda ne Bindyamin. Tendo nô bélê ye Dwata ke henek ye béléen. Ke hnebel ye, angat henmóyóen yu. Okóm ke tebel ye, angat tebelen yu se kun.

Matyu 23:37

“Yu kem tau menwu bè syudad Jirusalim, sal gel hnatay ye yó kem tau tugod Dwata, ne hnatay sentudà ye botu yó kem tau hógów Dwata ebélê ye. Deng hilu duléku ne tô móyô sembung kuy, lómó tô kmou kuy, lómón yóm mlon gel kenleken elaan hafaken yó kem ngaen, okóm là kô ye dog móyô.

Kem Lingón 91:4

Yó kmoen kóm, lómón ke onuk, lenambungen uu laan hafaken, ne laen kô dù hemenem. Yóm là konol nawahen ebéléem, yó se mò ofinen kóm ne mò klungen kóm.

Isaya 37:35

Ou se mofin du yóm syudad ni, ou se mentey du. Yó gónóhu mò du yóm ni mò gónón là lana boluyu, yakà wen yóm tehe fasadu ke Dabid yóm tehe tóbóng lówóhu.”

Isaya 37:22

Yó monen mò du, “Yó udél Dwata ebè Sinakirib yóm tau hol geta bè Asirya, monen, Ó Sinakirib, tey kkuli le kóm yó kem tau bè Jirusalim ya tey kehnê le kóm.

2 Tutul Israél 11:1

Timbow gdek bè Jirusalim Rihubuam, botong lematu wolu folò libu kem sendalù alì mbegel bè Juda ne Bindyamin sentifunen mò gmida yó kem sendalù Israél anì bud gwahen yóm benwu Israél fi bwak.

1 Bok Kem Tau Hol Geta 12:21

Timbow kól bè Jirusalim Rihubuam, gotu sentifunen lu yó kem sendalù bè ból Juda ne bè ból Bindyamin. Lematu wolu folò libu kwen yó kem sendalù alì hulung sfatay nélék le mò na a gmida yó kem sendalù Israél anì bud mulék ebéléen yóm benwu tehe knamalen.

Dwata 12:10

Ke deng nifal ye yóm Él Jurdan, angat tódô blay Dwata kuy yóm tonok yó mò hlós gónó ye henek nô. Du he tendo kemlung kuy bè kdê yó kem hohon ye anì menek kbenwu ye.

Kem Lingón 132:14

Yó monen, “Ni se yóm benwu mò gónóhu nô kól bè laen dù sónen. Bè ni gónów nô, abay se ni se yóm benwu hol dou nóyô.

Dwata 4:37

Lemwót bè kbong nawahen yó kem fù ye, yó gónón mélék kuy mò kun tau. Ne mlan bè yóm tey kegbeken tódô du tehe mit kuy hewà gu bè Idyip.

Dwata 32:11

Toloken lu, lómón yóm banug gel toloken móyóng kem ngaen. Hdalang hóyóngen lu, ominen mból hafaken mò slegefen kul. Lómón yó se deng nmò Dwata, là kô bayaen kul btang yó kem tau Israél.

Dwata 33:11

Ó Dwata, hol tnóbóngem nim sfu Libay ni anì hol le mbegel. Hyu ke holi hligal du bè yó kem gel nmò le. Genlaem yó kem hohon le, béem bud hlowil lu.”

Kem Lingón 60:5

Hol lenwaem mi mlan bè yóm sigel kwananem, ne lenwaem yó kem kóm tau kenbong nawa.

1 Samwél 10:20

Tahu se, gotu htaba Samwél bè yó bè solu Dwata yóm sfolò lewu kem tbong Israél ne yóm kun tbong Bindyamin yóm nélék Dwata.Ominen mit du bè solu Dwata yóm kdéen ktol semfu gu bè Bindyamin ne lugod Matri yóm bud nélék Dwata. Ominen lemwót bè lugod Matri nélék Dwata Sol yóm ngà Kis. Tikóng tô hnebel le là ton le du.

2 Samwél 12:24

Omin Dabid mifa ke Batsiba yóm yehenen, ne sentungóen, ne bud wen ngaen béléen logi, yó boluy le du Selumun. Tey kbong nawa Dwata du yóm ngà yó,

2 Samwél 12:25

yó gónón bud hógów ke Natan yóm tugoden anì boluyen du Jididaya yóm ngà yó lemwót bè yóm kbong nawa Dwata du.