Dwata 32:30 - Udél Dwata: Gna Kesfasad ne Lomi Kesfasad

³⁰ Bè tek olo sotu hohon le, botong le lemibu hemlóy du. Bè tek lewu hohon le, botong le sfolò libu hemlóy kul. Yó gónó le mlóy abay se deng bayà Dwata lu yóm sana kul Dwata gónó mogot. Deng tódô lusen lu elem tdok yó kem hohon le yóm kul Dwata alì gembek.

Dwata 32:30 Referans Kwoze

Juswa 23:10

Baluen ke tek sotu bélê ye, gbeken hlóy lemibu hohonen abay se eles mung bélê ye sfatay Dwata yóm sana kut Dwata hol gónó mogot, lómón yóm deng fasaden tekuy.

Isaya 30:17

Anien ke tek sotu sendalù hohon kemtes kuy, botong lemibu bélê ye hemlóy du. Ke wen limu kemtes kuy, tódô kdê ye gotu mlóy. Balù yóm kuy sendalù laen kô dù tebel bélê le, gotu le mlóy. Són olo tagak són yóm hehek gónó le tehe tméwéng flag mdà te bulul.

Kem Lingón 31:8

Là kô blayem dou elem hólól yó kem hohonu, deng suem ou bè yóm gónón laen dù hemenu.

Kem Lingón 44:12

Mi kem kóm tau, lómón ke deng hbaluem mi glaan ne laen kô dù bud btes me.

Isaya 52:3

Yó udélen ebè yó kem tauhen yóm Dwata hol dandónen geta gónó mogot, monen, “Bè nim kbaling ye hesek ni, laen kô dù filak bli le kuy. Senged snéen bè yóm angat kegewà ye, là kô tógón nsok kuy filak.

2 Tutul Israél 24:24

Balù yóm là kwen le mundug yó kem sendalù Aram, okóm tnóbóng Dwata lu gemmò bè yó kem tey sendalù wen bè Juda, abay se deng tebel Dwata yó kem tau bè Juda, yóm Dwata yó kem tehe fù le. Duhen yó, gefet bè Juas yóm tau hol geta yóm tafak Dwata du.

Isaya 50:1

Yó udél Dwata, monen, “Bè kuy kehedem du, deng kenbéu yu yó kem dou tau, hol lómón yóm logi kenbéen tuha libunen? Ke lómón yó se yóm dou nmò, nô se yóm klatas deng fenmahu bè kbéu kuy yu kem dou tau? Laen duen. Kmò kehedem ye du, deng hbaluu yu kô anì nit le yu ebè benwu mayuk, hol lómón yóm tau hbaluen yó kem ngaen anì baling le hesek? Là kô yó du lewóten yóm kegef le kuy ebè benwu mayuk. Yó lewóten, duhen yóm salà ye. Yó gónóhu hdó kuy lemwót bè yóm là kimón ye yóm hlauhu.

Kmukum 2:14

Yó se gónón alì sidek kebuten kul yóm sana kul Dwata yó kem tau Israél. Yó nmoen bélê le, lusen eta le yó kem tau gel muluk mò muku yóm kdê nfun le. Blayen lu elem tdok yó kem hohon le hmilol kul ne là kô wen gmò le.

Matyu 18:25

Okóm yóm tau ni koni, laen kô gónón ma mò bud bayaden du yóm tey utóngen yó. Yó tódô tô nmò yóm tau hol geta béléen, tódô tô hbaluen mò klifen, mung du yehenen ne kem ngaen, kkólen bè yó kem kimuhen mò mayad du yóm nutóngen.

Dwata 32:4

Yóm Dwata gónó tekuy mogot, hol lómón ke du yóm léhék gónó tekuy heklung. Kdê yó kem gel nmoen tódô ket du ne hono tedeng. Là kóen monol nawahen yóm kuy Dwata ne laen kô dù kéngen. Sal gel nmoen yóm tedeng ne là kóen mtukul knihuhen.

1 Samwél 2:2

Laen dù semnged du yóm kun kólós Dwata. Laen dù dumu Dwata, són uu. Laen dù dumu gónó heklung mkél bè yóm kut Dwata.

1 Bok Kem Tau Hol Geta 14:16

Angat tódô bayà Dwata lu yó kem tau Israél lemwót bè yóm salà deng nmò Jirubuam, ne yóm deng kwiten kul mò salà yóm kdéen tau Israél.”

2 Bok Kem Tau Hol Geta 7:5

Tahu se, bè yóm móyón kkifuhen, mógów le etu bè kamfù kem sendalù Aram yóm fat kem tau gemnóm des mifù yó koni. Okóm bè yóm kkól le ditu, laen kô dù tau ton le bè yó.