Dwata 32:21 - Udél Dwata: Gna Kesfasad ne Lomi Kesfasad

²¹ Deng hélés le nawahu bè yó kem dwata kéng gel tnaba le. Hebut le ou bè yó kem dwata lennged laen mu. Bè nim nmò le ni, gónóhu hélés nawa le mlan bè któbóngu yó kem tólóng but tau. Hebutu lu bè któbóngu yó kem tau là hulung le hedem.

Dwata 32:21 Referans Kwoze

Sulat Pol Ebè Yó Kem Tau Hemtahu Bè Rom 10:19

Bud wen snólóku. Là deng glileb le du kô kem tau Israél yóm tehe gel tulón le kul yó? Kaem deng glileb le ne. Ngem yóm udél Dwata tehe tulón Musis ekni gbak ebélê le, monen, “Angat le mófô yó kem dou tau Israél, sok tnóbóngu yó kem dumu tau. Angat wen gónó le lembut do yó kem dou tau sok knoduhu yó kem tau tehe là temngón dou.”

Sulat Pol Ebè Yó Kem Tau Hemtahu Bè Rom 9:25

Nim ni koni, deng tehe hsulat Dwata bè yóm sotu tehe tugoden boluyen Husiya, yó monen, “Angat le baling dou tau yó kem tehe là dou tau du. Angat le baling dou tau kenbong nawa yó kem tau tehe là wen nawahu ebélê le.”

Juna 2:8

Yó kem tau hemtahu bè yó kem dwata lennged laen dù muhen, deng knogol le uu ne.

Kem Lingón 78:58

Deng hefebut le Dwata mlan bè yóm kehdà le yó kem gónó demsù ebè yó kem dwata kéng. Tey khélés le nawahen bè yóm ktaba le ebè yó kem dwata lennged nmò le.

Dwata 32:16

Yóm ktaba le bè yó kem tólóng dwata gónón sidek kélés nawa Dwata. Lemwót bè yóm ksidek nmò le, yó gónón alì lembut kul.

Husiya 1:10

Okóm angat kól yóm kdawen bè yó kem tau Israél yó, angat tey kwen le lómón helek bè kilil mohin, là gbekem msó kul. Ominen bè yóm benwu tehe gónó Dwata mon du mò kul, ‘Là do tau du,’ bud bè yó se angat gónó Dwata mon du mò kul, ‘Yu se hol kun ngà yóm Dwata laen tul katayen.’

Jirimaya 14:22

Laen kô dù bè yó kem dwata kéng ke gbeken hkulón. Balù longit, là kô gbeken du hkulón ete tonok. Són uu, Dwata, ken-gel nawa me yóm hol kum gónó mogot. Tek són uu gembek mò du ni kem hni me béléem ni. Nangat me yóm któbóngem kum.

Kem Lingón 31:6

Tey keklitu kul yó kem tau tmaba ebè yó kem dwata lennged laen dù muhen. Okóm béléu dou, són uu, Dwata, yóm dou snalig.

1 Kurin 10:22

Ke yó se tô nmò tekuy, deng hélés tekuy ne nawa yóm gónó tekuy mogot. Ofo tekuy mon du kô ke là gbeken tmafak tekuy?

Kul Nmò 11:15

Tikóng nbutu mudél ebélê le, tódô sut bélê le se yóm Tulus Dwata, lómón se yóm tehe tanay kmò ksuten bélê tekuy.

Jirimaya 8:19

Hol hnungolem dé yóm kik yó kem tauhu, botong gefet bè klamang yóm benwu me. Yó mon le, “Deng tahu tebel Dwata kô Jirusalim? Là buden nô bè yó ne kô, igoen du yóm hol geta bélê le?” Yó balà Dwata kul, monen, “Moen de ke alì hebut le ou yó kem tauhu bè yóm gel ktaba le ebè yó kem dwata kéng, dwata laen dù muhen?”

Jirimaya 10:8

Yóm kdê le gel tmaba bè yó kem dwata lennged le hono nungel, tau laen dù tngón le. Tedu se dnalang le bè yó kem dwata koyu le?

1 Samwél 12:21

Bê ye abay bud semfulék tmaba ebè yó kem dwata kéng laen dù muhen. Là gbek le tmóbóng kuy ne là gbek le lemwà kuy abay se tahu laen dù mu le.

Kul Nmò 14:15

tódô hendlà hgel le udél le, mon le, “Ó kem tau, moen de ke ni tô nmò ye? Olo me tau lómón kuy. Nim nógów me edini ni, na me e tulón kuy yóm Tulón Hyu anì gkogol ye ni kem dwata kéng laen dù genbek le, ne beklil ye ebè yóm Dwata mowil, yóm tehe dmimun longit ne tonok ne mohin ne kdéen ton.

Dwata 32:17

Gel le demsù ebè yó kem tulus seitan, là kô ebè Dwata du, kem dwata là deng hnikót tngón kem fù le du, dwata là deng hnikót nimón kem tau Israél du.

2 Bok Kem Tau Hol Geta 17:15

Mom kenbê le yóm hlolò Dwata kul, dalang se yóm deng tehe senfasad le Dwata yó kem tehe fù le, ne yó kem eles hetgamahen kul. Deng mom lolò le yó kem dwata lennged laen dù mu le, ne baling le tau laen dù mu se kul. Mom lolò le yóm kul gel nmò yó kem benwu hmilol kul igò Dwata deng mon du mò kul hol bê le abay lolò lu.

Jirimaya 7:18

Lemwót yó kem ngà le, fen le ma koyu ne fen le hembong ofi yó kem mà le ne fen le mò mambang yó kem yê le mò blay le ebè yóm sotu dwata bnoluy le Libun Boi bè Longit. Bud wen se dumu ninum blay le ebè yó kem dumu dwata mò gónó le hebut do.

1 Bok Kem Tau Hol Geta 14:9

Okóm kóm deng tey gedlug yó kem sidek deng gel nmoem senta yó kem dumu tau gna mowil béléem. Deng tey dê dwata kéng nmoem, ne deng hefebutem o mlan bè yóm ketwélem yó kem ngà safì tudu nmoem bè tahu blówón.

2 Bok Kem Tau Hol Geta 17:11

Ne bè yó gónó le mtem insinsu ebélê le, lómón yóm kul gel nmò yó kem tau deng tehe hdó Dwata ta yóm tonok tehe blayen yó kem tau Israél. Tey alì kmò le sidek yó kem tau Israél, yó gónó Dwata alì lembut kul.

2 Bok Kem Tau Hol Geta 22:17

Lemwót bè yóm deng ktebel le do yó kem tauhu, ne deng le tmaba ebè yó kem tólóng dwata lennged, kem dwata nmò tdok le, yó se gónóhu alì lembut kul. Lenbutu nim benwu ni, ne là kóen teflok yóm kebutu du.’

Isaya 65:3

Sónmò le hefebut dou yó kem tau yó, laen kô yak le. Wen gónó le gel demsù ebè yó kem dwata kéng lem blóng yó kem hulu hmilol kul gónô ne gel le mtem insinsu bélê le bè yó.

Jirimaya 2:11

Deng wen bélê le kô temles du yó kem kul dwata balù yóm là ktahu le? Okóm yó kem dou tau deng mom tenles le ou, yóm kul Dwata hol gónón lemwót yóm kadat le kul yó kem dumu tau. Tles le dou yó kem dwata lennged laen dù muhen.

Jirimaya 18:15

Okóm yó kem dou tau, deng klifót le ou. Gel le mtem insinsu mò hboo le bè yó kem dwata kéng laen dù muhen. Deng mom senyat le yóm lan hyu tehe hlolò Dwata kul, mom yó lolò le yóm lan hono hitok.