Dwata 31:3 - Udél Dwata: Gna Kesfasad ne Lomi Kesfasad

³ Dwata he fen tukô gna kuy yóm sana kuy Dwata hol gónó mogot ne gotu genlaen yó kem tau menwu ta yóm tonok blayen kuy anì gfun ye yóm tonok le. Yó mò bud tles malak kuy duhen Juswa, hol lómón yóm deng mon Dwata.

Dwata 31:3 Referans Kwoze

Dwata 9:3

Okóm ni deng tódô ton mata ye, fen tukô gna kuy yóm sana kuy Dwata hol gónó mogot. Hol lómón kmoen ke dmilóf ofi, gotu himoten kdéen. Laen kô dù gmò le. Duhen yó bè yóm kógów ye, mahil bélê ye mlo kul ne kendel gemlà kul lómón yóm deng fasad Dwata kuy.

Juswa 4:14

Yó nmò Dwata bè yó kem tau Israél bè yóm kdaw yó, hdilóen bélê le Juswa mò fen malak kul. Bè yóm klawi Juswa mowil tey kadat le du hol lómón yóm tehe kadat le ke Musis.

Juswa 1:2

“Deng matay Musis, yóm tóbóng lówóhu. Yó gónóm mon, uu se tles mit kul yóm kdéen tau Israél na ye e nifal yóm Él Jurdan, mógów ye etu bè yóm tonok blayu kuy.

Dwata 31:23

Omin Dwata bud mudél ebè Juswa yóm ngà Nun, monen mò du, “Eles hfólem nawam ne elesi htigel. Uu se mò fen bud tles malak kul yó kem tau Israél ebè yóm tonok fasadu kul ne ou se tendo nô béléem.”

Hibru 4:8

Yóm lomi benwu monen gónó le hlós henek nô yó, sundu benwu Kanan du. Ke deng duhen yó yóm benwu gónó Juswa e malak kul, sana là mon Dwata du ne ekni wen benwu gónó le angat hlós henek nô.

Kul Nmò 7:45

Bè yóm gónô tehe hmò Dwata kul yó, hlós tendo gel nwit yó kem lugod le. Bè yóm katay Musis, Juswa tles bud malak yó kem tehe fù tekuy ebè yóm benwu tehe blay Dwata kul. Eles tukô gna kul se Dwata, ne gotu hdóhen yó kem tau menwu ta yóm benwu gónón e malak kul yó. Bè yóm klawi le nô bè yóm benwu yó, eles tendo gel mdà lem blóng le se yóm Gónô Dwata yó efet kól bè yóm kun kdaw Dabid.

Juswa 3:7

Yó udél Dwata ebè Juswa, monen, “Yóm nmou bélê ye kemdaw ni, mò gónó le madat kóm yó kem tau Israél mò tau malak kul. Ne bè yó gónó le dmilô du yóm knóu béléem lómón yóm tehe knóu bè Musis.

Dwata 34:9

Yó tles Musis duhen Juswa yóm ngà Nun. Tey tau hulung hedem abay se deng tehe nnok Musis ta kuluhen bè yóm kéléken du mò tlesen. Tey kimón le ke Juswa yó kem tau Israél ne lolò le yóm kdê hlau Dwata hlanen bè Musis.

Dwata 31:14

Omin Dwata bud mon du mò ke Musis, “Ó Musis, là buden té ne klowilem. Tnabahem Juswa ne nwitem elem yóm Gónô gónóhu nô lem blóng ye anì tulónu du yó kem mò hlolou du.” Tahu se, lemwót Musis lewu le Juswa elem Gónô Dwata

Tekang Kbuten 48:21

Omin Jakub mon du mò ke Jusif, “Tódô tonem se yóm móyón katayu lem blóng ye, okóm tendo eles nô bélê ye Dwata ne angat niten yu semfulék ebè tum tonok tehe fù ye.

Dwata 31:4

Angat gotu genlà Dwata yó kem tau menwu bè yó lómón yóm tehe keglaen kul le Sihun ne Ug yó kem tau hol geta bè yó kem tau Amurayt, gotu genbaen yó kem benwu le.

Dwata 7:1

Yó bud mon Musis, “Ke deng nwiten yu yóm sana kuy Dwata hol gónó mogot ebè yóm tonok hfunen kuy mò gónó ye henek nô, tey angat dê but tau lohen gu tahen, yó kem tau Hitayt ne yó kem tau Girgasayt ne yó kem tau Amurayt ne yó kem tau Kanan ne yó kem tau Pirisayt ne yó kem tau Hibayt ne yó kem tau Jibusayt. Nim hitu kem but tau lohen gu tahen ni, hono kem but tau alì wen ne tey le gembek senta ye.