Dwata 27:7 - Udél Dwata: Gna Kesfasad ne Lomi Kesfasad

⁷ Ne bè yó snéen gónó ye demsù du yóm dsù gel ken ye bè yóm gel kestifun ye hligal lemwót bè yóm deng kessotu ye bè Dwata ne bè dumu tau. Bè yó bè solu Dwata yóm sana kuy Dwata hol gónó mogot, hol ye hligal mken.

Dwata 27:7 Referans Kwoze

Kul Nmò 10:36

Deng tngón ye yóm tulón hwit Dwata ebè yó kem tau Israél, duhen yóm Tulón Hyu mò lan tau mit sefyu ebéléen hlanen bè Jisas Krays, yóm hol gónó le mogot yóm kdéen tau.

Hbakuk 3:18

okóm sana yó ne kligalu ebè yóm sana Dwata hol gónó mogot, abay se du yóm hol Dwata yóm fen lemwà do.

Isaya 12:3

Yóm kul kligal yó kem tau deng lenwà Dwata, hol lómón kligal yóm tau alì sidek kleengen ke minum él tnaw.”

Dwata 12:7

Bè yó snéen bè solu yóm sana kuy Dwata hol gónó mogot, yóm Dwata tendo gel tmóbóng kuy, gónó ye hligal mken du yó kem hyu deng leniteg ye, mung kuy yó kem fes lówó ye.

Kulasi 1:20

Duhen yó, deng hlan Dwata bè Ngaen yóm kesefyuhen yóm kdéen deng tehe dlimunen. Mlan bè yóm deng tehe kgamà litô yóm Ngaen bè yóm tehe katayen bè kros, yó se yóm lan nmò Dwata anì gbek le bud mit sefyu béléen yóm kdéen nô talak tonok ne yóm kdéen nô bè longit.

Flipay 4:4

Hol ye tendo gel hligal dé lemwót bè yóm deng kessotu ye bè yóm gónó tekuy mogot. Bud nulitu bélê ye yóm monu yó koni, hol ye gel hligal dé.

Flipay 3:3

Bè ktahuhen, tekuy se yóm tau wen tahu ilóen, là kô lu du. Abay se tekuy se yó kem tau gel hloni bè Dwata hlanen bè Tulusen. Tekuy se yóm alì hligal lemwót bè yóm deng kessotu tekuy bè Krays Jisas. Là bud snalig tekuy du ne yó kem gel hlolò tau mò lan tekuy gewà gu lem hatay.

Sulat Pol Ebè Yó Kem Tau Hemtahu Bè Rom 5:10

Tey tehe kesfohon tekuy ke Dwata, okóm kun, niten tekuy sefyu hlanen bè yóm le katay yóm Ngaen. Duhen ni, bè yóm deng kesefyu tekuy ke Dwata, milud he bud któbóngen tekuy hlanen bè yóm deng bud kehlowilen ke Krays.

Sulat Pol Ebè Yó Kem Tau Hemtahu Bè Rom 5:1

Duhen ni, deng baling tedeng ne kton Dwata tekuy mlan bè yóm kehtahu tekuy. Deng tekuy sefyu ke Dwata mlan bè Jisas Krays yóm gónó tekuy mogot.

Isaya 61:10

Tey kligalen kun yóm Jirusalim lemwót bè yóm deng nmò Dwata béléen. Hol lómó kligalen lómón yóm libun myehen deng hen-get le. Yó henged nes hesek Dwata du yóm syudaden yó, yóm kegewaen bè yó kem hohonen ne yóm kegmoen bélê le.

Isaya 61:3

Yó kem tau alì wen kenangag le bè benwu Sayun, tles benlayu lu kligal ne kehyu nawa. Yó kem tau wen kenblat nawa le, tles blayu kul yóm sngal mò dmóyón ke Dwata. Hol lómón angat kmò le, lómón yó kem koyu kun hulu Dwata. Tódô kdê le gotu mò du yóm tedeng. Ne tey megdóyón Dwata bè yóm deng nmoen bélê le.

Nihimaya 8:10

Ne ni, mulék ye ebè gónô ye ne hol ye hligal ne mò ye ken. Benlay ye yó kem tau là kóyówen yóm kul. Nim kdaw ni, kdaw hetfing tekuy ebè Dwata. Yó gónóm mon, hol bê ye abay heblat nawa abay se yóm kligal lemwót bè Dwata, yó se hol gónón lemwót yóm kgis tekuy.”

Dwata 12:12

Ne bè yó bè solu Dwata hol ye hligal, mung kuy kem ngà ye ne yó kem tóbóng lówó ye ne yó kem sfu Libay menwu lem blóng ye. Hol bê ye abay hnuda lu yó kem sfu Libay, laen dù tonok le se kul.

Dwata 27:6

Abay se yóm botu sensodò ye mò gónó ye gel demsù ebè Dwata, là hyuhen ke deng wen lan bemtù du. Bè yó gónó ye demsù du ebè Dwata yó kem dsù hkekeb ye ebéléen.

Dwata 27:8

Bè yó kem botu deng bnukay ye, hol hentilob ye smulat du tahen yóm kdê hlau Dwata kuy.”