Dwata 12:2 - Udél Dwata: Gna Kesfasad ne Lomi Kesfasad

² Bè yóm tonok nwa ye, gotu genbà ye lu yó kem gónó le gel tmaba ebè yóm kul dwata kéng yó kem tau bè yó, yóm deng hdà le ta tfusù yó kem bulul geta ne ta yó kem bulul lemnek ne laan yóm kdê koyu lembang.

Dwata 12:2 Referans Kwoze

Dwata 7:5

Yó gónóm mon, gotu genbà ye lu yó kem kul gónó demsù, lenusok ye yó kem hehek botu deng hetfing le ebè yóm kul dwata lennged. Nofok ye yó kem hehek deng hdà le ilô yóm dwata libun le boluyen Asira ne gotu dnutung ntem ye lu yó kem dwata lenbù deng nmò le.

Husiya 4:13

Deng le mom demsù ebè yó kem dwata kéng gu ta yó kem bulul. Mneged le eta yó kem bulul lemnek na le e mtem insinsu laan yó kem koyu alì lemimbà hangahen abay se tilob gónó hgolung laan le. Yó se gónó le baling libun hdóyón Baal yó kem ngà ye libun ne gónó le baling smamuk yó kem towu ye libun.

2 Bok Kem Tau Hol Geta 23:13

Bud gholu Jusaya snéen yóm gónó le gel tmaba ebè dwata kéng fi dmata kdaw Jirusalim ne fi leged yóm bulul boluyen Bulul Hono Sidek. Bè yóm bulul yó, gónó Selumun bè Israél tehe hemdà yóm gónô tmaba ebè yó kem dwata kéng alì kenbê, duhen Astarti yóm dwata libun yó kem tau Sidon ne Kimus yóm dwata kem tau Muab ne Molék yóm dwata yó kem tau Amunayt, hono dwata kéng alì kenbê.

Kmukum 2:2

Ne yó deng kuy fasad do, béen wen senfasad ye bè yó kem tau menwu bè ni. Deng tehe dóku kuy hol genbà ye yó kem gónó le gel demsù ebè yó kem kul dwata lennged. Okóm là kô nimón ye du yóm deng hmou kuy yó.

Lista 22:41

Timbow hlafus bè yó, nwit Balak Balaam eta yóm bulul boluyen Bamut Baal ne bè yó gónó Balaam seblà mton kul yó kem dumu tau Israél.

Kehewà 23:24

Hol bê ye abay mtud bukol bè kul dwata lennged ne hol bê ye abay gbót tmaba ebélê le ne hol bê ye abay lolò yóm kul gel hlolò bè yóm ktaba le ebélê le. Yó hmou kuy, gotu genbà ye yó kem dwata kéng gel nmò le ne gotu hnugón ye yó kem hehek botu gónó le gel tmaba ebélê le.

1 Bok Kem Tau Hol Geta 3:2

Bè yóm kdaw yó, tolo dê he gónó le gel demsù yó kem tau Israél, abay se là deng hdà le du yóm Gónô Dwata, yóm gónô mit du yóm kun boluy Dwata.

2 Bok Kem Tau Hol Geta 11:18

Omin le gotu mógów ebè gónô Baal yóm kdéen tau ne gotu genbà le. Bud genbà le snéen yó kem gónó demsù ebéléen, ne yóm lenngeden gotu lenusok le. Ne hnatay le Matan yóm tau gel blóng ebè Baal bè yó bè solu yó kem gónó gel demsù ebè Baal. Omin Jihuyada hemsù kem tau mentey bè yóm Gónô Dwata.

Isaya 36:7

Ominen bud mudél yóm tau genlal lemwót bè Asirya yó, monen, “Tô snalig ye Dwata kô, yóm kuy gónó mogot? Igò Hisikaya se deng hegbà du yóm kdê gónó ye tehe demsù ebéléen. Deng tulónen kuy kem tau nô bè Juda ne bè Jirusalim, olon sotu gónó ye gel demsù kun ne olon sotu yóm gónó ye gel tmaba ebè Dwata.

Jirimaya 2:20

Yó bud mon yóm Dwata hol dandónen geta, “Ó kem tau Israél, deng tey legen ne yóm kekbê ye dou. Là kô nimón ye dou ne là se kô ye tmaba ebéléu. Tódô ket ta yó kem bulul geta ne ket laan yó kem koyu lembang gónó ye gel tmaba ebè yó kem dwata kéng. Lómó kmò ye dou lómón ke tau mdà yehen.

Jirimaya 3:13

Són olo nmò ye, hol henmóyô ye yóm deng kegsalà ye. Hen-gsel ye yóm deng kkogol ye dou, yóm sana kuy Dwata hol gónó mogot ne yóm deng kdà ye do lan ye gel tmaba ebè yó kem dwata lenbù nmò ye laan yó kem koyu lembang. Hen-gsel ye yóm là bud klolò ye do.’ Ou se yóm sana kuy Dwata hol gónó mogot nim mudél ni.”

Kem Lingón 78:58

Deng hefebut le Dwata mlan bè yóm kehdà le yó kem gónó demsù ebè yó kem dwata kéng. Tey khélés le nawahen bè yóm ktaba le ebè yó kem dwata lennged nmò le.