Danyél 8:14 - Udél Dwata: Gna Kesfasad ne Lomi Kesfasad

¹⁴ Bnalà yóm sotu, monen, “Yó kegenen, ke deng lewu libu tlu latu dulék le angat msó du yóm udas tehe gel kedsù le, sotu hlafus, sotu kimel. Ominen yó he mulék bè sana kehyuhen yóm Gónô Dwata.”

Danyél 8:14 Referans Kwoze

Danyél 12:7

Ominen lemwót yóm tau mnes bukay mdà te kmawang fi ta yóm él yó koni, hdaen eta bè longit yóm lewu sigelen ne gungolu yóm udélen smafà bè yóm Dwata laen dù tul katayen, monen, “Yó kegenen, tlu halay bud sóól. Ke deng gesón yóm alì keglayam yó kem kun tau Dwata deng gotu dohò eta le ne ni kem ni.”

Danyél 7:25

Tey sidek udélen eta yóm Hol Geta ne ket kdawen tendo hmayam kul yó kem kun tau. Tô tenlesen yóm kul kdaw gel kehligal tmaba ebè Dwata dalang se yó kem hlau Dwata gel lolò le. Tódô na bayà Dwata lu béléen lem yóm tlu halay sóól.

Danyél 12:11

Tódô lemwóten bè yóm kdaw kwen hemseng du yóm gel kedsù ye ebè Dwata, yóm kdaw kehdà le lem yóm kun Gónô Dwata yóm dwata kéng alì sidek bè yó, yó kegen ye alì mò du glayam botong lemibu lewu latu syóm folò (1,290) kdaw.

Isaya 45:25

Tek són ou angat lemwà yó kem semfu gu bè tehe Jakub ne tey kdóyón le do.”

Deng Hegfan 12:14

Okóm wen hafak blay Dwata du yóm libun yó, lómón hafak yóm banug bong anì tódô móyóng etu bè yóm benwu laen dù tau menwu du, ne bè yó gónón wen tendo semgyok du efet tlu halay sóól. Laen kô dù bud gmoen béléen bè yó yóm swaga.

Danyél 8:26

Tey tahu se yóm kdê hton Dwata kóm yó bè yóm kkó le yóm udas gel kedsù le hlafus ne kimel. Okóm béem tagad tulón he ni kem ni, abay se tolo mima he ksuten elem hulin kdaw.

Isaya 1:27

Lemwót bè yóm tey ktedeng nawa Dwata, yó gónón angat lemwà yóm syudad Jirusalim bè yó kem hohonen ne gomong lenwaen yóm kdéen tau deng hegsel nô lemen.

Deng Hegfan 13:5

Nim ógóf lóbô ni koni, tódô kem hlun bayà Dwata du yóm alì kehegmónen ne yóm alì kehnéen ke Dwata. Ne na tódô bayà Dwata du snéen yóm kwalisen mogot benwu tlu halay bud sóól.Tey sidek kbaken ebè Dwata, homongen du boluyen ne yóm benwuhen. Dalang se yóm kdê nô bè longit, tey kehnéen kul.

Deng Hegfan 11:15

Ominen mféw yóm ghitu yó kem hógów Dwata, sen-gengu se mungol yóm tey udél gu bè longit, mon le, “Deng hto ne yóm kul kdaw mogot klamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.”

Glasya 3:8

Deng tehe eles tulón Dwata bè Sulaten ekni yóm angat ktedeng ktonen kul yó kem tau là Ju le lemwót bè yóm kehtahu le béléen. Deng tehe tulón Dwata ke Abraham se yóm Tulón Hyu yó, yó monen, “Hlanu béléem yóm angat któbóngu yóm kdéen tau bè klamangen benwu.”Ne tahu se, hentahu Abraham yóm tulón Dwata du yó, ne tey któbóng Dwata du lemwót bè yóm kehtahuhen. Dalang se nim kmoen ni, yóm kdéen tau hemtahu, tey któbóng Dwata kul lómón se yóm tehe któbóngen ke Abraham.

Tekang Kbuten 1:5

Yó boluyen du yóm layag, “kdaw,” ne yóm kkifuhen, “kifu.” Timbow deng kmoen du yóm yó, ominen kifu ne bud mwas, tu se yóm hol tanay kdaw.

Danyél 12:12

Tey hligal kun yóm tau ke hol hfuhen imaken mangat efet lemibu tlu latu tlu folò lewu (1,332) kdaw.