Danyél 8:11 - Udél Dwata: Gna Kesfasad ne Lomi Kesfasad

¹¹ Balù Dwata, yóm gel malak yó kem sendaluen bè longit, sana katuen du. Yó nmoen, hetefloken yóm gel kedsù le ebè Dwata ket kdaw ne kóhen yóm gel ktaba le du bè yó bè Gónóen.

Danyél 8:11 Referans Kwoze

Danyél 12:11

Tódô lemwóten bè yóm kdaw kwen hemseng du yóm gel kedsù ye ebè Dwata, yóm kdaw kehdà le lem yóm kun Gónô Dwata yóm dwata kéng alì sidek bè yó, yó kegen ye alì mò du glayam botong lemibu lewu latu syóm folò (1,290) kdaw.

Danyél 8:25

Tey hulung smukat, yó se gónón gel gemmò bè dumu tau. Tey kehegetahen knóen. Ofo kul mon du yó kem tau ke deng menek kbenwu le, anì monem yó se kdawen alì gemlà kul. Angat nwiten sgida yóm Geta bè yóm kdéen tau hol geta, okóm bè yó hol gónón meglà. Ne yóm keglaen, là lemwóten bè kul kgis yó kem tau.

Deng Hegfan 17:14

Angat le gotu mit sfatay bè yóm Ngà Ubiha, okóm laen kô dù gmò le béléen. Ne yó kem tau mung bè yóm Ngà Ubiha, lu se yó kem tau tehe tnabahen, deng tehe néléken, tau là monol nawa le bè yóm klolò le du. Angat le matù, abay se yóm Ngà Ubiha, du se yóm hol gónó le mogot yó kem kdéen mogot, ne du se yóm Hol Geta bè yó kem kdéen tau hol geta.”

Isaya 37:23

Deng tngónem kô kóm kun kegeta yóm hennéem yó? Ou se yóm là nadatem du yó, yóm Dwata yó kem tau Israél, yóm Dwata laen dù belenen.

Hibru 2:10

Dwata se yóm tehe dmimun du yóm kentihen, ne tolo nkemen he ni kmoen ni. Tey hyu yóm tehe nmoen bè Jisas, nan na hlan bè yóm gónón hol glayam anì gfan yóm tey kguliten. Ni se lan Dwata mit tekuy kem ngaen etu bè longit. Yakà Jisas du yóm tukô gna tekuy ebè yóm klowil laen dù sónen.

Kun Snulat Luk 21:24

Angat wen se bélê le matay bè bak sudeng. Ne wen se bélê le kenfô le mò nit le ebè yó kem dumu benwu mayuk. Ne angat tódô genlà le Jirusalim yó kem tau là Ju le efet kól bè yóm kdaw keteflok Dwata kul.”

Danyél 8:12

Lemwót bè yóm sidek alì nmò yóm hanga yó, wen se bè yó kem dumu tau Dwata hnatayen. Kkólen bè yóm gel kedsù le ebè Dwata ket kdaw, gotu kóhen. Tódô gotu nmò yóm hanga yó yóm kun knóyô. Ndaen elaan yóm ktahuhen.

Danyél 7:25

Tey sidek udélen eta yóm Hol Geta ne ket kdawen tendo hmayam kul yó kem kun tau. Tô tenlesen yóm kul kdaw gel kehligal tmaba ebè Dwata dalang se yó kem hlau Dwata gel lolò le. Tódô na bayà Dwata lu béléen lem yóm tlu halay sóól.

Danyél 5:23

Deng mom natuem yóm Dwata nô bè longit lanem hangay yó kem tegayan tehe nô lem yóm kun Gónô Dwata. Deng ye mom minum tifas grép lemen yó kem genlalem ne yó kem yehenem ne yó kem libun tódô nmuhem yóm igò ye dmóyón yó kem dwata nmò ye lemwót bè blówón bukay ne bè tahu blówón ne lemwót bè tembaga futì ne lemwót bè bala tók ne lemwót bè koyu ne bè botu, kem dwata là mton ne là mungol ne laen dù tngón le. Okóm là dog nadatem ke Dwata igoen du mogot klowilem ne eles tngónen yóm gónóm e kól.

Isaya 37:29

Deng gefet béléu yóm alì kebutem do ne yóm alì keheklabakem. Ne ni wen nmou béléem. Hol lómón ke wen dulé kebengu bè ilungem ne nmou kakangem anì bud benklilu u mulék, hlanu u bè yóm lan tehe loloem bè yóm kógówem edini.”

2 Tisalunika 2:4

Nim tau ni, gotu natuen kdéen dwata kéng kkólen bè yó kem dumu gel hentahu kem tau, ne angat hegetahen knóen senta le. Balù yóm Gónô Dwata, tódô husek elemen, ne tódô myón bè yó, ne tódô monen du kun Dwata.

Danyél 8:24

Tey kemgis, okóm sundu hol kun tahu kegbek du. Angat tey wen genbaen ne kihu nóyô nmoen gbeken. Angat gotu genlaen yó kem wen kegbek le malak dalang se yó kem kun tau Dwata.

Danyél 9:25

Hol hnungolem yóm tulónu kóm ni anì hol getnefem. Lenwóten bè yóm kdaw ksulat le yóm udin bud ketlob le yóm benwu Jirusalim efet kól bè yóm kdaw ksut yóm sotu tau deng nélék Dwata mò kmamal yóm klamangen, yó kegenen fat folò syóm halay, ominen bud temnù fat latu tlu folò fat halay. Bud hdà le Jirusalim, wen kem lan bud nmò le bè yó ne tey mbegel yóm beng hdà le hilolen, okóm tey sbeweg kbenwu le lem ni kem halay ni.