Danyél 7:1 - Udél Dwata: Gna Kesfasad ne Lomi Kesfasad

¹ Bè yóm tanay halay kogot Bélsasar yóm benwu Babilun, wen kna Danyél ne wen hton béléen bè yóm igoen hlilil bè gónón tungô. Gotu snulaten yóm knahen yó ne ni se yóm tonen.

Danyél 7:1 Referans Kwoze

Amus 3:7

Okóm yóm Dwata hol dandónen geta, là kô wen tagad nmoen lem blóng ye ke là nan ne eles hegfan du bè yó kem tugoden, duhen yó kem tóbóng lówóhen yóm angat nmoen.

Juwél 2:28

Yó bud udél Dwata, monen, “Kogolen bè yó, gotu suu bè kdéen tau yóm dou Tulus. Yó kem ngà ye logi ne kem ngà ye libun, angat le baling tugodu. Yó kem tuha bélê ye, angat wen heknahu kul. Yó kem logi lomi lemnok, angat wen htonu bélê le.

Danyél 5:1

Timbow deng hilu halayen miwes bè yó, lemwót Bélsasar mò ken bong bè yó kem lemibu tau genlalen, ominen mung minum tifas grép bélê le.

Danyél 4:5

Okóm sotu kifu kemnahe ne tey sidek klikou. Yóm igou hlilil bè yóm gónóhu tungô wen hton béléu gónóhu alì likò.

Danyél 1:17

Tey keblay Dwata kul ketngón nim fat kem logi lomi lemnok ni bè kdê yó kem hefnagì le kul. Bong ke Danyél kun, wen kenhulung blay Dwata du, duhen yóm khulung tmulón lan yóm hton Dwata bè tau ne lan kna.

Jirimaya 23:28

Bayaem ne yóm gel tulón yó kem tugod gel kemna yó. Okóm yó kem tau htugodu yóm dou udél, hol le tódô hteneb tmulón du sen yóm udélu. Tey wen gónón stólóng yóm lami halay bè yóm bunguhen.

Deng Hegfan 1:19

Yó ne,” monen, “gotu snulatem ni kem tonem ni. Wen se sut ni kmoen ni, wen se sut elem hulin kdaw, gotu snulatem lu.

Hbakuk 2:2

Ominen malà do Dwata, monen, “Snulatem bè botu kufil yóm htonu kóm ni, bede hbongem ksulatem du ne htatawem anì mahil kesfalahen du yóm tau mlóy mit tulón anì tulónen bè kihu tau.

Danyél 7:15

Ou se Danyél yóm mudél ni. Tey sbeweg kegnómu du bè yó kem deng tonu, botonge likò bè yóm deng hton Dwata do.

Danyél 7:13

Bè yóm kifu yó, bud wen tonu lómón ke ngà tau kmoen mung bè lobun gu bè longit. Mógów ebè yóm Tuha Laen Dù Buten, bede wen mit du ebè soluhen.

Danyél 2:1

Bè yóm gewu halay Nibukadnisar mogot yóm benwu Babilun, wen kem knahen ne tey sbeweg kegnómen du, botong là kóen gtungô.

Lista 12:6

Ne yó mon Dwata mò kul, “Ni mò hnungol ye. Ke wen yó kem tugodu nô lem blóng ye, tódô wen yóm gel htonu kul ne gele stulón kul mlan bè kna le.

Tekang Kbuten 46:2

Timbow kifu bè yó, mudél ebè Jakub Dwata, monen, “Ó Jakub, Jakub.” Mon Jakub se, “Hó. Ni ou.”

Deng Hegfan 10:4

Bè yóm kungolu du yóm mon le, tô snulatu, okóm tódô gungolu se yóm bud mudél ebéléu gu bè longit, monen, “Bê. Béem dog snulat ne tu kem mon le tu koni. Hol bunihem.”

2 Kurin 12:1

Ni mò sfu yóm tô kudélu heklabak, balù yóm klaen dù hol muhen. Tulónu kuy yóm deng tódô hegfanen béléu yóm gónó tekuy mogot.

Sulat Pol Ebè Yó Kem Tau Hemtahu Bè Rom 15:4

Ket yóm udél deng tehe hsulat Dwata, sal gel wen hdalangen tekuy lemen. Lemwót bè yóm udél Dwata gónón là mili nawa tekuy baluen ke wen mgel sut bélê tekuy. Ne bè yó gónón lemwót yóm kegduf nawa tekuy igò tekuy mangat du yóm hendón nefet nawa tekuy.

Danyél 8:1

Bè yóm deng getluhen halay myón Bélsasar, bud wen hton Dwata do, ou se Danyél hol mton du. Ni se deng gewuhen dulék kwen htonen do.

Danyél 7:7

Kogolen bè yó, ominu bud mton yóm hton Dwata béléu, bud hesut yóm gfat ógóf lóbô hol ógóf gónó likò, botonge kenkel mton du ne tey sidek kekgisen. Yóm nihihen hono bala tók lembang. Ya tey sidek kséken du yóm kenfóen ne yóm dù tebel gotu ndaen elem tonok. Tey stólóng bè yó kem dumu gna ógóf lóbô ne botong sfolò hangahen.

Danyél 5:30

Ne bè yóm kifu yó, lemwót Bélsasar yóm tau mogot yóm benwu Babilun hnatay le.

Danyél 5:22

Uu se Bélsasar, yóm ngaen. Là kói dog heglaan bè Dwata igoem deng hónô temngón du nim ni.

Isikél 1:1

Bè yóm deng tlu folò ne halayu wen hton Dwata do. Htonen do bè yóm glimuhen kdaw bè yóm gfaten bulón bè yóm halay yó bè yóm knóu lem blóng yó kem dumuhu negef lemwót bè Juda nô bè kilil Él Kibar bè Babilun. Bè yóm kdaw yó tódô tonu hnas longit ne hton Dwata do yóm kun kmò.

Jirimaya 36:4

Tahu se, htaba Jirimaya Baruk yóm ngà Niraya logi. Gotu tulónen ke Baruk yóm deng htugod Dwata du lemwót bè kbuten ne gotu snulat Baruk bè yóm klatas lenulun yóm kdéen.

Isaya 30:8

Wen hsulat Dwata do bè bok yóm gel nmò yó kem tauhen anì wen mdengen gónóhen nô yóm tey ksidek nmò le.

Isaya 8:1

Yó udél Dwata ebéléu, monen, “Mahi yóm mò gónóm smulat, bede yóm bong. Yó kmò ksulatem du hebangem, monem, ‘Mebetik ma, metlasik megef.’

Job 4:13

Yó kmoen, wen tonu bè yóm sotu kifu yóm igò le tungô yó kem dumu tau.

Tekang Kbuten 15:1

Kogolen bè yó, tódô hegfan bè Abram Dwata, ne gungol Abram yóm udél Dwata ebéléen, monen, “Ó Abram, hol béi abay hlikò. Tendo kenlungu uu anì laen dù tau hemsidek kóm ne angat wen tey ofol blayu kóm.”

Jirimaya 36:32

Tahu se, bud wen klatas lenulun nwa Jirimaya ne hsulaten ke Baruk yóm tau fen gel smulat béléen yóm udél Dwata, bud tulónen du. Gotu bud snulat Baruk yóm udél Dwata deng nô bè yóm gna sulat lenulun ntem Jihuyakim ne wen he kem dumu udél Dwata bud hsulat Jirimaya mò tnuen.

Danyél 2:26

Yó mon yóm tau hol geta mò ke Danyél (yóm bnoluy le Béltisasar), “Tahu kô nim monen ni? Gbekem tmulón du do yóm knahu ne yóm hnigaden?”

Danyél 4:13

Bè yóm igou temngel du yóm koyu yó, tódô tonu se htuntun gu tta bè longit yóm sotu hógów mit tulón, yóm alì mólós.