Danyél 2:21 - Udél Dwata: Gna Kesfasad ne Lomi Kesfasad

²¹ Sónen du gembek semtódô yóm kógów kdaw ne bulón. Sal lemwót béléen yóm kesetles le mogot benwu yó kem tau hol geta. Lemwót béléen yóm khulungen hedem yóm tau hulung hedem ne ketngón yóm tau temngón.

Danyél 2:21 Referans Kwoze

Danyél 4:17

Nim tulónu ni hol kukum lemwót bè yó kem hógów mit tulón, kul kehedeng du yó kem alì mólós. Yó muhen nim kukum ni anì tngón kdéen tau bè klamang benwu tek són yóm Dwata hol geta bè kdéen kmamal du yóm kdê benwu nogot tau ne ket benwu wen tau néléken mò hfogoten du anien ke tau lukoten ke kun kóyô.”

Danyél 7:25

Tey sidek udélen eta yóm Hol Geta ne ket kdawen tendo hmayam kul yó kem kun tau. Tô tenlesen yóm kul kdaw gel kehligal tmaba ebè Dwata dalang se yó kem hlau Dwata gel lolò le. Tódô na bayà Dwata lu béléen lem yóm tlu halay sóól.

Danyél 4:32

Wen tódô mlo kóm anì là budi nô lem blóng tau. Tódói nô lem bnes slomong bè yó kem ógóf lem bnes, mungi mótób bnes mkél bè safì. Hitu halayem he gembunù du yóm ni efet nam gtukul Dwata yóm hol geta bè kdéen kmamal du yóm kdê benwu nogot tau ne tles hfogoten benwu yó kem tau deng kun nélék.”

1 Bok Kem Tau Hol Geta 4:29

Wen tey khulung hedem ne ketngón blay Dwata ke Selumun, yóm ketngón là gbekem hmingón du.

Sulat Jim 1:5

Okóm ke wen bélê ye là dengen hol ket bè khulungen hedem, yake tódô mni bè Dwata dé anì wen khulung hedem blay Dwata du. Abay se yóm Dwata, hol lemwót bè nawahen tmóbóng yó kem tau gel mni béléen, ne là olon udì du yóm gel blayen.

Kun Snulat Luk 21:15

Ou he bemlay kuy yóm khulung ye hedem, ne yóm kestulón là gbek hohon ye malà du, ne là kô gehkéng le du snéen.

Sulat Jim 1:17

Hono hyu yóm kdê deng blayen tekuy, balù udì ke wen gónón sidek. Yó se kun kmò Dwata, yóm deng dmimun kdê yó kem lemayag ton tekuy bè longit. Gel megetles ne mili yóm olung yó kem lemayag bè longit yó, okóm ke Dwata kun, là kóen na a mili, sana kem kun kehyu.

1 Bok Kem Tau Hol Geta 3:28

Timbow gungol yóm kdê tau Israél yóm kkukum Selumun yó, botong wen klikò le du yóm kdê le, abay se dilô le lemwót bè Dwata yóm khulungen hedem anì tedeng kwiten du yóm kkukumen.

Kehewà 31:3

Deng suu béléen yóm dou Tulus anì wen khulungen ne wen ketngónen mò du balù kihu kay nmò tilob hmou du.

1 Kurin 1:30

Okóm deng sensotu Dwata tekuy bè Krays Jisas, ne bud benlayen tekuy ketngón snéen hlanen bè Krays. Ne lemwót bè Krays gónón tedeng kton Dwata tekuy, ne gónó tekuy baling kun tau laen dù belenen. Bud Krays se fen lemwà tekuy gu lem hatay.

Danyél 2:9

Ke là tulón ye du dou yóm knahu tek sotu kukumu kuy. Deng ssotu atul ye tmulón kéng béléu anì mkó ta ye yóm hatay ye. Okóm ke hol tulón ye do yóm knahu, anì bè yó gónóhu temngón du gbek ye bud tmulón du do snéen yóm hnigaden.”

1 Tutul Israél 22:12

Ne Dwata he hol bemlay kóm ketngón ne khulung temnef anì nimónem yó kem hlauhen kóm bè yóm igoem kmamal bè Israél.

1 Bok Kem Tau Hol Geta 10:24

Wen kem tau lemwót bè ket benwu mógów ebéléen na a hmungol du yóm tey kehulungen hedem deng blay Dwata du.

Deng Hegfan 19:16

Wen boluy snulat bè yóm nesen ne bè hahahen snéen, monen, “Yóm Hol Geta bè kdéen tau hol geta ne yóm hol gónó le mogot yó kem kdéen mogot.”

1 Tutul Israél 29:30

Deng gotu snulat le yóm kdê gendeng Dabid bè yóm klawihen mogot benwu, ne yóm kdê glanen, mung lemen yó kem tau Israél nogoten ne yó kem tólóng benwu hmilol.

Kehewà 31:6

Deng bud néléku Uhuliyab snéen mò dumuhen mò nmò yóm ngà Ahisamak tau lemwót bè ból Dan. Ne benlayu khulung snéen yó kem dumu tau wen kenhulung le anì gbek le mò du yóm kdê hmou kul.

Istér 1:13

Yó kun gel adat yóm tau hol geta yó, nahen na gel smólók bè yó kem tau temngón du yó kem udin bélê le ke tedu yóm hyu bang nmoen. Yó gónón htaba yó kem tau gel hmau du anì tngónen yóm nmoen.

Sulat Pol Ebè Yó Kem Tau Hemtahu Bè Rom 13:1

Hol tekuy gel nimón yóm gubérno, abay se Dwata gónón gu lemwót. Kdê yó kem gubérno, bè Dwata gónón lemwót yóm kul glal.

Danyél 1:17

Tey keblay Dwata kul ketngón nim fat kem logi lomi lemnok ni bè kdê yó kem hefnagì le kul. Bong ke Danyél kun, wen kenhulung blay Dwata du, duhen yóm khulung tmulón lan yóm hton Dwata bè tau ne lan kna.

Danyél 2:20

monen, “Bê tekuy abay lensón yóm kdóyón tekuy du yóm boluy Dwata, yakà són béléen gónón lemwót yóm khulung hedem ne yóm kfasang.

Danyél 2:23

Tey kdóyónu kóm, Dwata yóm Dwata yó kem tehe fuu, abay se deng benlayem o khulung hedem ne deng hekgisem o. Deng bnalaem yóm hni me béléem ne deng hegfanem bélê me yóm kna yóm tau hol geta.”

Danyél 10:1

Bè yóm getlu halay Sirus mogot yóm benwu Pérsya yóm tau hol geta smakuf yóm benwu Babilun, bud wen hton Dwata ke Danyél (yóm bnoluy le Béltisasar). Yó hnigad yóm hton béléen yó, hono gbak ebè yóm gida bong angat dohò sut bè benwu le elem hulin kdaw. Tódô tngón Danyél tennefen yóm hton Dwata béléen yó.

Danyél 4:14

Hgelen udélen, monen, “Nofok ye nim koyu ni, gotu nlós ye hangahen. Gotu kó ye dounen ne gotu bulét ye kem bunguhen. Gotu lo ye lu yó kem ógóf hgolung laanen ne hlikò ye lu yó kem onuk koyu smala tahen.

Danyél 4:22

Tum koyu tonem mteg tu, uu se hnigaden. Deng tey kbegelem ne tey kegetahem. Yóm kegetahem, lómón ke gesduk bè longit ne yóm kkamalem benwu deng gefet bè són tonok.