Amus 1:9 - Udél Dwata: Gna Kesfasad ne Lomi Kesfasad

⁹ Yó bud udél Dwata, monen, “Deng tendo sensulit le mò sidek yó kem tau bè Tayal, là gbeku du ke là tnafaku kul. Deng mom genbà le yóm deng kesbilà le bè yó kem tau Israél. Mom hensulék hbalù le lu mò hesek etu bè Idom yóm kdê tau Israél tódô henek nô bè yó kem kul benwu lemnek.

Amus 1:9 Referans Kwoze

2 Samwél 5:11

Lemwót Hiram yóm tau hol geta bè Tayal, wen kem tau hógówen ebè Dabid, mit le kem koyu sidar mò nmò le kfal, mung kul yó kem tau hulung hemdà gónô, ne kem tau hulung semsodò botu anì hdà le bè Dabid gónô bong.

Matyu 11:21

Yó monen mò kul, “Angat tey tafak ye, yu kem tau bè Kurasin. Ne tey tafak ye se kuy, yu kem tau bè Bitsayda. Ke deng tehe ton yó kem tau là Ju le bè Tayal ne bè Sidon ni kem hentaw ton deng nmou lem blóng ye ni, ngem kà tódô le lemsek nes sakù, ne bnulus le kohù lówó le mò ilô yóm deng kehegsel le, ne yóm deng kkogol le yó kem sidek tehe gel nmò le.

Amus 1:11

Yó bud udél Dwata, monen, “Deng tendo sensulit le mò sidek yó kem tau bè Idom, là gbeku du ke là tnafaku kul. Deng mom ktes tnibó le yó kem kul dumu Israél, balù udì ke wen kodu le kul. Là kô olò nonol le du yóm kebut le kul, tódô henlós le efet laen dù sónen.

Amus 1:6

Yó bud udél Dwata, monen, “Deng tendo sensulit le mò sidek yó kem tau bè syudad Gasa, là gbeku du ke là tnafaku kul. Deng mom sulék hegef le lu mayuk yó kem dou tau tódô henek nô bè yó kem kul benwu lemnek, hbalù le lu mò hesek ebè yó kem tau Idom.

Matyu 11:22

Tódô tulónu kuy ktahuhen, sok kól yóm kdaw angat kkukum Dwata tau, botong kéng he yóm ktafaken yó kem tau là Ju le bè Tayal ne bè Sidon yóm angat ktafaken kuy.

Kun Snulat Luk 10:13

Bud mon Jisas, “Nawaw nim yu, kem tau bè Kurasin, nawaw yu snéen kem tau bè Bitsayda. Ke deng tehe ton yó kem tau là Ju le bè Tayal ne bè Sidon ni kem hentaw ton deng nmou lem blóng ye ni, là kô gbek le du ke là lemsek le nes sakù, ne bnulus le kohù lówó le mò ilô yóm deng kehegsel le, ne yóm deng kkogol le yó kem sidek gel nmò le.

Kun Snulat Luk 10:14

Sok kól yóm kdaw angat kkukum Dwata tau, gulé he ktafaken kuy senta yóm ktafaken yó kem tau bè Tayal ne bè Sidon.

Kem Lingón 83:7

ne kem tau Gibalayt, ne kem tau Amunayt, ne kem tau Amalikayt, ne kem tau lemwót bè Flistya ne Tayal.

Ubadaya 1:11

Yó buten yóm keglà ye yó abay se bè yóm kdaw kwen alì gónó le glayam yó kem dumu ye setwoli tau Israél, deng mom tódô bayà ye lu, deng ye mom mdà hlayuk, là kô dog tnóbóng ye kul. Bè yóm kdaw ksut le bélê le yó kem tólóng benwu mundug kul, gotu nuku le yó kem kendengen bè Jirusalim, omin le yó mólól du yóm syudad Jirusalim mlan bè yóm atù nmò le. Yó nmò ye se kuy, lómón ke yu sotu hohon yó kem tau Israél.