2 Kurin 3:1 - Udél Dwata: Gna Kesfasad ne Lomi Kesfasad

¹ Sundu yó gónóhu mon du tum monu tu koni ke udélu hton salù. Bè yóm gel kógów me ebélê ye, laen dù mu me du kum ke wen sulat nwit me mò gónó ye milô kum. Ne sotuhen, bè yóm kógów me ebè yó kem dumu benwu, là kô hsulat me kuy snéen mò nit me.

2 Kurin 3:1 Referans Kwoze

2 Kurin 12:11

Tey kudélu heklabak nim ou. Là kô gmou du he yóm yó ke deng wen tehe udél ye mfi do. Baluen ke laen dù muhu, là kóe na a glaan bélê le yó kem tau tódô lembù mógów elem blóng ye yó.

2 Kurin 10:12

Yó kem tau alì heklabak lem blóng ye bè yó, là kô gsenged me kul, là kô me gomong bélê le se kum. Tey le tau là hulung hedem se kul. Ofo kul mon du ke són lu temngón du yóm hyu, ne gsengel nawa le du yóm kul ktau bè yóm klolò le du yóm kul kehedem yó.

2 Kurin 5:12

Sundu yó du gónóhu mon du yóm udélu yó koni ke udél hton dóyón. Okóm yó gónóhu mon du anì wen gónó ye hligal bélê me, ne anì wen mò balà ye kul yó kem tau gel hemnê kum. Yó kem tau yó, són salù le yóm ton le ta, là kô dog na le henklol du yóm kmò knawa yóm tau.

Kul Nmò 18:27

Sotu kdaw bè yó, tulón Apulus yóm kóyóen mógów ebè prubinsya Akiya. Tahu se. Glok le hemwit du sulat yó kem tau hemtahu bè Ifisus anì hnódó le Apulus yó kem tau hemtahu bè Akiya sok kól ditu. Bè yóm kgefeten bè yó, tey wen gónón temgel yó kem tau deng hemtahu bè yó. Yó hol buten yóm kehtahu le, tódô lemwót bè yóm tey któbóng Dwata kul.

1 Kurin 16:3

Eles ye mélék tau mò gónóhu angat hemwit du ebè Jirusalim yó kem blay ye yó. Soke kól dyó, angat henwitu lu sulat he anì tngón kem tau bè Jirusalim yóm nógów le.

2 Kurin 12:19

Déke yó hendem ye, yó muhu mudél du nim udélu ni mò balau yó kem tey dê udél etahu. Là kô yó du. Kaem yó dé muhen mò gónóhu gemtóbóng kuy, yu kem dumuhu sogot nawa. Krays se nim fen hudél do ni. Bè yóm kudélu du, hol lómón ke nóe bè solu Dwata.

2 Kurin 10:8

Balù yóm deng tô kegedlug ktulónu du yóm kwen kwalis me lemwót bè yóm gónó tekuy mogot, laen kô gónóhu myak du se. Abay se nim kwalis me ni, yó muhen mò lan me hbegel kuy bè kehtahu ye. Là kô yó du muhen ke gónó me gembà kuy.

2 Kurin 2:17

Bélê me kum, là kô me mkél bè yó kem dumu tau tmolok Udél Dwata, són filak gel hnebel le. Tey dê se kem tau mò du yóm yó. Okóm lemwót bè yóm khógów Dwata kum, tey gulit kmò me du yóm hmoen kum, hol lómón ke nô me bè soluhen bè yóm gel ktolok me, yakà deng me tóbóng lówó Krays.

1 Kurin 10:33

Hol dnalang ye dé yóm dou nmò. Yó gel sen-galuhu ke gel hegnahu yó kem dumuhu tau, là kô hegnahu du yóm dou kóyô. Yó gónóhu mò du yóm yó anì wen lanu tmóbóng kul anì gewà le gu lem hatay se kul.

1 Kurin 4:15

Baluen ke sfolò libu tau gel tmóbóng kuy bè kehtahu ye, tek sotuhu yóm mà ye. Ou se yóm hol tanay tmulón du kuy yóm Tulón Hyu lemwót bè Dwata. Ne lemwót bè yóm deng kessotu ye bè Krays Jisas, yó gónó ye menmà béléu.

1 Kurin 3:10

Lemwót bè yóm kenhulung blay Dwata dou, gónóhen mbegel kehdau du yó kem heheken. Bede tólóng tau fen hemdeng du. Ket tau semtóbóng hemdà du yóm gónô yó, yake hol ten-gamahen yóm kmò kehdaen du.

Sulat Pol Ebè Yó Kem Tau Hemtahu Bè Rom 16:1

Yóm libun meted du nim sulat ni, boluyen Fibi, libun tekuy bè kehtahu tekuy bè Jisas. Du se sotu gel tmóbóng yó kem tau hemtahu bè syudad Sinkriya.

2 Kurin 10:18

Mom hyu dé yóm tau ke gónón mogot fen dmóyón du. Béen du fen dmóyón du yóm kun knô.