1 Timuti 4:3 - Udél Dwata: Gna Kesfasad ne Lomi Kesfasad

³ Yó gel tolok le, là hyuhen kun ke myehen yóm tau, ne sotuhen, alì dê hlii le bè ken. Okóm yó gónó Dwata tehe dmimun kul ni kem ken ni mò lowil kem tau, mò lewót gónó le gel dmóyón ke Dwata yó kem tau deng hemtahu béléen, yó kem tau deng temngón du yóm ktahuhen.

1 Timuti 4:3 Referans Kwoze

1 Timuti 4:4

Kdê yó kem deng tehe dlimun Dwata, hono hyu, ne bê te abay mom kenbê. Yake hol henmóyô te, mung du yóm gel keslamat te béléen.

Hibru 13:4

Ke sok deng syehen yóm tau, hol nadat tekuy sen yóm kul kesyehen yó, bê abay kneyek lu. Ne ke deng wen yehen tekuy, hol bê tekuy abay ndà. Tnafak Dwata yóm tau smamuk ne yóm tau ndaen yehenen.

Sulat Pol Ebè Yó Kem Tau Hemtahu Bè Rom 14:6

Yóm tau ke gel wen kdaw htólóngen bè yó kem dumu kdaw, yó se mò gónón hegfan yóm kadaten ke Dwata se kun. Ne senged se yóm tau laen dù hniihen bè ken, yó se mò kun gónó hegfan yóm kadaten ke Dwata se kun, abay se sal gel dóyónen Dwata bè yóm gel kenen. Ne senged se kun yóm tau tolo wen hniihen, yó se yóm kun gónó hegfan du yóm kun kadat ke Dwata, ne gónón dmóyón du.

Kulasi 2:16

Duhen yó, hol bê ye abay hnungol ke dê hlii le kuy bè ken ne bè ninum, ne ke dê hlolò le kuy bè yó kem dumu kdaw, ne bè ksut yóm lomi bulón, ne bè yóm Kdaw Kehegnô.

1 Kurin 8:8

Okóm là kô bè ken du gónó kuy gloni bè Dwata. Laen dù gónón stólóng kton Dwata tekuy ke ken tekuy yóm ken yó duhen ke là.

Tekang Kbuten 9:3

Ne gbek ye mken kul lenwóten bè yóm kdaw ni mò tnù yó kem hulu gel ken ye. Gotu blayu kuy yóm kdéen mò ken ye.

Kulasi 3:17

Duhen yó, bè ket nmò ye duhen ket benkó ye, hol na ye na hlan bè boluy yóm gónó tekuy mogot Jisas. Bud béléen snéen gónó ye hlan du yóm kdóyón ye ke Dwata yóm Mà tekuy.

1 Kurin 7:28

Okóm ke móyô myehen se yóm logi, là salaen du. Senged se yóm libun ke móyô myehen, tô nan sidek du? Okóm bè yó kem tau deng myehen, tey dê gónón mgel klowil le, ne kóyóu ke là gnóm ye du yóm kgelen yó.

Sulat Pol Ebè Yó Kem Tau Hemtahu Bè Rom 14:3

Yóm tau laen dù bud hniihen bè kkenen, béen mom henwog sen yóm tau tolo wen hniihen. Senged bè yóm tau són lemnaw utónen, béen tô tendok yóm tau laen dù bud hniihen. Yakà deng henmóyô Dwata du yóm tau yó.

Hibru 13:9

Bê ye abay gmung bè yó kem tolok sekban, kô niten yu hetlas bè yóm tahu lan. Laen kô dumu hembegel du yóm kehtahu tekuy, tek són yóm kun tóbóng Dwata. Là kóen lemwót bè yóm dê hlii le tekuy bè ken. Yó kem tau lemolò du yóm yó, balù udì ke wen tóbóngen kul bè yóm kehtahu le.

1 Timuti 2:4

Abay se yó se kun kóyô ke kdéen tau gotu gewà, ne gotu tngón le yóm ktahuhen.

1 Kurin 6:13

Ne wen se gel mon du, monen, “Yó se mu yóm blutut tau mò gónón e tódô ken. Ne yó mu yóm ken mò sù lem blutut.” Ya mo ktahuhen du yóm monen yó, okóm angat nmò Dwata sónen yóm blutut ne yóm ken. Yóm lówó tekuy, là yó du muhen ke gónó tekuy mò samuk. Okóm yó dé muhen mò fen mò nmò bè yóm gónó tekuy mogot. Ne du se fen hol semgyok du yóm lówó tekuy.

Sulat Pol Ebè Yó Kem Tau Hemtahu Bè Rom 14:17

Bè yóm kogot Dwata tau, là mlanen bè yóm gel ken ne ninum tekuy. Okóm mlan bè ktedeng nawa, ne kenek nawa, ne yóm kligal blayen tekuy yóm Tulus Dwata.

Matyu 15:36

Ne nwahen yóm hitu botù mambang ne yóm udì utón él, ne nan mni bè Dwata. Tikóng deng knihen, ominen kembéng du, ne hsagiden yó kem gel lemolò du.

Matyu 14:19

Tahu se. Omin Jisas gotu hyón yó kem tau bè yóm gónón ukol bnes. Ne nwahen yóm limu botù mambang ne lewu tedek utón él, ne temngel ebè longit, mni bè Dwata. Ominen kembéng yóm mambang, ne oguhen yó kem gel lemolò du anì sagid le ebè yó kem tau.

Kul Nmò 27:35

Timbow deng kudél Pol, nwahen yóm mambang ne nan mni bè Dwata bè yó lem blóng le. Deng kekbéngen du, ominen mken.

Kun Snulat Jan 6:23

Ne wen kem dumu ówóng lemwót gu bè Tibiryas dmuung moni bè yóm gónó Jisas mni bè Dwata ne hemken yó kem tau.

Kun Snulat Luk 24:30

Bè yóm kkól le bè gónô, omin le gotu seyón mken. Ne nwa Jisas yóm mambang, ne mni bè Dwata, ne ominen kembéng du, ne sket benlayen lu.

1 Samwél 9:13

Ke deng ye kól bè yóm bak tikeb, angat ton ye gu laanen là deng lemwót eta yóm bulul udì nan e mken bè yó. Là kô le tagad mken yó kem tau deng tinok le ke là dengen kól bè yó se kun na a mni bélê le bè Dwata bè yóm dsù le. Heslò ye anì gafit ye.”

Matyu 15:11

Là kóen lemwót bè yó kem kihu sungit yóm tau mit du là mólós bè Dwata. Okóm yó mit du là mólós, duhen yóm sidek kebkó gel btang bè sumóngen.”

1 Timuti 5:14

Yó gónóm mon, hyu nawahu bè yóm libun bolu ke hanà tukô nawahen ke tódô bud myehen anì wen ngaen, ne anì sen-gifaen yó kem fes lówóhen. Anì yó, laen dù bang gónó le dmelem kut yó kem hmohon kut.