1 Timuti 1:4 - Udél Dwata: Gna Kesfasad ne Lomi Kesfasad

⁴ Hol tulónem kul bê le abay bud tulón yó kem tutul lenbù nmò yó kem tau gnan, ne yó kem tey dê boluy yó kem tehe fù le gónó le gu semfu. Yóm nmò le yó, olo mom dalil gónó le skaf mon. Là kô hetngónen du kut yóm kun kóyô bélê tekuy Dwata. Són bè kehtahu te gónó te temngón du yóm yó.

1 Timuti 1:4 Referans Kwoze

Taytus 3:9

Béi gel mung du kóm yóm skuya mon laen kô dù gónón e mefet, ne yóm kestutul le du yóm tehe fù le gónó le gu semfu. Béi mung lemen yóm sbot mon, ne yóm gel kesgés le bè yóm kun hlau Musis. Laen ofolem du myó, ne laen dù muhen.

Taytus 1:14

ne anì là bud glolò le du yó kem tutul gel lenbù nmò yó kem Ju, duhen ke yó kem hlau gel nmò yó kem tau deng knogol le yóm ktahuhen.

1 Timuti 4:7

Béi mung du kóm yó kem tutul lenbù nmò tau gnan, tutul là lemwóten bè Dwata, tutul laen kô gónón e mefet. Tódô hol dnalangem hgulit bè yóm kloloem ke Dwata.

2 Timuti 4:4

Là kô hnungol le du yóm ktahuhen, mom knogol le. Mom tu alì henklingu le yó kem tulón lenbù nmò yó kem tau gnan.

2 Pitér 1:16

Yóm gel tulón me kuy lemwót bè yóm tey kfasang yóm gónó tekuy mogot Jisas Krays ne yóm angat bud kesfuléken edini, là kô lenbù tutul du. Kaem deng hyu ton me se kum yóm tey kehegeta Dwata du.

1 Timuti 6:20

Hol tenngelem yóm deng gsigang tahem, Timuti. Béi mung du kóm yóm stulón mfà laen dù gónón e kól, ne yóm skaf mon là kô wen bang gutahem du. Ofo kul mon du yó kem tau mò du ke tahu ketngón, okóm là.

Hibru 13:9

Bê ye abay gmung bè yó kem tolok sekban, kô niten yu hetlas bè yóm tahu lan. Laen kô dumu hembegel du yóm kehtahu tekuy, tek són yóm kun tóbóng Dwata. Là kóen lemwót bè yóm dê hlii le tekuy bè ken. Yó kem tau lemolò du yóm yó, balù udì ke wen tóbóngen kul bè yóm kehtahu le.

2 Timuti 2:14

Nim ni koni, bud gel hegtulónem bè nawa yó kem tau bè yó, ne hol hetgamahem kul, ne Dwata fen mungol du. Bê le abay skuya mon bè kmò klan yó kem udél. Yakem wen se muhen, olo mom gónón lana kehtahu yó kem tau hmungol kul.

2 Timuti 2:22

Holi hlayuk bè yóm dô tngónem gónóm gemsalà, yakà hanai lomi lemnok. Hol sen-galuhem yóm nawa btol, ne yóm ketnù yóm kehtahuhem bè Dwata, ne yóm kbong nawam kem dumuhem. Hol nmoem yóm gónón menek nawahem bè kem dumum tau, yakà ni du kul kmò yó kem tau gel htóbóng bè yóm gónó tekuy mogot, yó kem tau laen dù belenen yóm kehedem le.

1 Timuti 6:11

Okóm kóm, Timuti, uu se tau Dwata, holi hlayuk du kóm ni kem ni. Hol sen-galuhem yóm nawa btol, yóm nawa gulit, nawa hulung hbala, nawa ganag. Hol naluhem ketnù yóm kehtahuhem bè Dwata ne yóm kbong nawahem kem dumuhem.

1 Timuti 3:16

Laen kô dù tau gembek hemkéng du yóm tey kehyuhen yóm deng hegfan Dwata bélê tekuy, yóm deng hentahu tekuy. Tehe tódô hbaling tau yóm Ngà Dwata, ne yóm Tulus Dwata fen hdilô du bè kem tau. Gotu ton yó kem hógów Dwata nô bè longit. Ne sentbong yó kem tau bè klamangen benwu, ne wen se bè yó kem hmungol du hemtahu du. Ne ominen haway etta bè longit.

Taytus 1:1

Ou Pol gónón lemwót nim sulat ni, sotu tau tóbóng lówó Dwata, ne yóm fen gel hógów Jisas Krays. Deng néléken ou mò hógówen anì metnù kehtahu yó kem tau deng kun nélék Dwata, ne anì tngón le ktahuhen yóm deng hentahu tekuy.

2 Kurin 1:12

Sotu gónó me gel hligal, abay se tódô tngón me laen kô dù belenen yóm kmò me ebè kem dumu me tau, hol néen yóm gel kmò me ebélê ye. Laen kô bang buni me bélê ye se, ne tódô tngón Dwata snéen yóm kgotu nawa me ebélê ye. Bè yóm kmò me du nim nmò me ni, là kô tódô salig me du yóm kum ketngón, sal gel snalig me yóm kfasang Dwata tmóbóng kum.

Ifisus 3:2

Déke deng gungol ye ne yóm deng ksigang Dwata du tahu nim nmò ni mò gónóhen tmóbóng kuy.

2 Timuti 2:23

Okóm béi abay mung du kóm yó kem skuya mon, yakem wen se muhen. Yó olo nefeten, són mit sgés bè kem dumu.