1 Pitér 3:3 - Udél Dwata: Gna Kesfasad ne Lomi Kesfasad

³ Bè yóm gel kehtilob ye, béen olo són bè yó kem gel hegfan ye ta, lómón yóm gel kmò ye yóm wek ye, ne yó kem ngom gel leket ye, ne yó kem nes gel lesek ye.

1 Pitér 3:3 Referans Kwoze

Sulat Pol Ebè Yó Kem Tau Hemtahu Bè Rom 12:2

Bê ye abay lolò kul kmò yó kem tau là hemtahu le lem nim benwu ni. Hesfili ye ke Dwata yóm kehedem ye anì gtukul ye ke tedu yóm kun kóyô bélê ye, ne ke tedu yóm hyu ne yóm tedeng ne yóm mò gónón hligal.

Isaya 61:10

Tey kligalen kun yóm Jirusalim lemwót bè yóm deng nmò Dwata béléen. Hol lómó kligalen lómón yóm libun myehen deng hen-get le. Yó henged nes hesek Dwata du yóm syudaden yó, yóm kegewaen bè yó kem hohonen ne yóm kegmoen bélê le.

Jirimaya 2:32

Yóm ngà libun, gbeken kô kmifót du yóm ngom blówónen? Ne yóm libun myehen, gbeken kô kmifót du yóm nes mò leseken? Hol mou kun ne ke tô klifót le. Okóm yó kem dou tau deng kem hilu halayen ne yóm keklifót le dou.

Isaya 52:1

Ó Jirusalim, hekgisi. Angati bud mulék geta. Uu se yóm hol kun syudad Dwata, bud hen-gulékem knóem anì bud mulék yóm keheklóónem. Là kô le bud husek ebè bak tikebem yó kem tau là hemtahu le bè Dwata.

Kehewà 33:4

Timbow gungol yó kem tau nim udél Dwata ni ya tey sidek kegnóm le du. Là bud leket le du yó kem ngom blówón le.

Tekang Kbuten 24:53

Ominen gotu bemlay du ke Ribika yó kem nes libun nwiten ne yó kem ngom libun nmò le gu bè tahu blówón ne gu bè blówón bukay. Ne bud wen se kem kimu mebtes blayen yóm logi Ribika ne bè yéen.

Tekang Kbuten 24:47

Ominu smólók du, monu, ‘Tau du de maem?’ Yó balaen dou, monen, ‘Yó boluy mau, Bituél yóm ngà Nahor lewu le Milka.’ Bè yóm kungolu du yóm monen yó, yó gónóhu bemlay du yóm tising gel sù bè ilung, ne wen lewu blusù mung du.

Tekang Kbuten 24:22

Timbow deng gotu khinum Ribika yó kem kamél, lemwót yóm tóbóng lówó Abraham wen tising tahu blówón gel sù bè ilung nakaten, mung du yóm lewu blusù tahu blówón ne blayen ke Ribika.

Kem Lingón 45:9

Nô béléem bè yó, yó kem ngà libun yó kem tau hol geta, kem libun alì nadat. Bè kwananem gónón mdà yóm libun boi, yóm klóónen hono tahu blówón lemwót bè benwu Ufir.

Kehewà 32:2

Mon Aron se mò kul, monen, “Lenkas ye yó kem blówón tdé yehen ye ne kem ngà ye logi ne kem ngà ye libun ne nwit ye edini béléu.”

Istér 5:1

Timbow deng tlu butengen bè yó omin Istér lemsek yóm nes libun boi, mógów ebè gónô bong bè Sérksis. Tikóng kól ditu, tódô htengen mdà bè lewà yóm bak dól yóm dfél yóm tau hol geta. Ne nô lemen yóm tau hol geta myón bè yóm bangkù gónón myón kmamal bede smolu ebè bak dól.

Kehewà 3:22

Gu laan le là deng lemwót he yó nmò yó kem libun Israél na le mógów ebè yó kem libun Idyip kul dumu sebét, duhen ke bè yó kem libun Idyip mauy bè yó kem dumu le sebét yó na le e mni bélê le nes ne ngom libun nmò le bè tahu blówón ne blówón bukay. Yó kem hni le yó, angat gotu leket le bè yó kem ngà le logi ne bè yó kem ngà le libun. Yó gónóm mon, tey wen nwit yó kem dou tau lemwót bè kul kendengen yó kem tau Idyip.”

1 Pitér 3:2

Abay se ton le yóm klaen dù belenen yóm kuy kmò ne yóm tey kadat ye kul.