1 Pitér 2:6 - Udél Dwata: Gna Kesfasad ne Lomi Kesfasad

⁶ Yakà wen yóm monen bè Sulat Dwata, yóm monen, “Wen botu alì mebtes deng tehe eles néléku. Yó se yóm botu alì bong muhen bè yóm gónô hdau bè Sayun. Deng suu bè yó ne. Ke wen tau hemtahu béléen, là kô wen gónón gsel béléen.”

1 Pitér 2:6 Referans Kwoze

Isaya 28:16

Ne ni se udél yóm Dwata hol dandónen geta gónó tekuy mogot, monen, “Wen yó kem botu alì mbegel mò gónón myón yóm beng deng suu bè Sayun mò hol hembegel du yóm Gónô angat hdau bè yó. Wen sotu botu suu bè yó mò hdengen ne wen snulatu du yóm monen, ‘Yóm tau mbegel kehtahuhen, hanayen nawahen.’

1 Pitér 2:4

Hol ye hloni ebéléen dé. Du se yóm bemlay du kuy yóm klowil laen dù sónen. Hol lómón ke du yóm botu deng kenbê yó kem tau gel hemdà gónô, ofo kul ke botu laen dù muhen. Igoen du he yóm botu bong muhen deng nélék Dwata.

Ifisus 2:20

Bè yóm deng kehtahu ye, lómón ke deng ye baling ngom bè yóm gónô hdà Dwata. Yó heheken yóm gónô yó, duhen yó kem aposol ne yó kem tehe tugoden. Bede yó hol tud blóngónen, duhen Krays Jisas.

Sikaraya 10:4

Bè Juda se gónón tembong yó kem tau mogot benwu, ne yó kem dumu tau gel malak, dalang se yó kem kmandér bè yó kem sendalù, kem tau mò malak yó kem dou tau.

Mark 12:10

Omin Jisas bud mon du mò kul, “Deng hónô senfala ye se yóm tehe monen bè Sulat Dwata, yóm monen, ‘Wen botu deng senkbê yó kem tau hemdà gónô, ofo kul ke laen dù muhen. Anì monem, yó se yóm hol tahu botu mò hembegel yóm gónô hdà le.

Sulat Pol Ebè Yó Kem Tau Hemtahu Bè Rom 10:11

Sotu monen bè Sulat Dwata, yó monen, “Balù kihu tau hemtahu béléen, laen kô gónó le gsel du.”Yóm Udél Dwata yó, laen kô dù tau ke là gomongen lemen, abay se laen kô gónó le stólóng yó kem Ju bè yó kem tau là Ju le. Tek sotu se yóm gónóhen mogot yóm kdéen tau, duhen Jisas Krays. Kihu tau tmaba béléen, sal sket gel tnóbóngen lu.

Isaya 50:7

Okóm yóm kehnê le dou, là kô gehsideken do, abay se gel tnóbóngen ou yóm Dwata hol dandónen geta gónóhu mogot. Tódô henbalahu yóm nmò le béléu. Tngónu là kô wen gónóhu myak,

Isaya 42:1

Yó udél Dwata, monen, “Ni sii yóm tau dou tóbóng lówó, yóm tau tendo ten-gelu. Du se néléku ne tey hyu nawahu ebéléen. Deng suu béléen yóm dou Tulus. Ne du mit yóm kukum tedeng bè ket benwu.

2 Timuti 3:16

Kdê yó kem Udél Dwata deng tehe hsulaten, tey wen muhen bè yóm gel ktolok yóm ktahuhen, ne bè yóm gel kbólów yóm tolok sekban, ne bè yóm gel kestódô yó kem tau deng gesyat, ne yóm kehlau yó kem tau bè yóm kmò kwit le ktau le.

Kun Snulat Jan 7:38

Lómón yóm monen bè Sulat Dwata, ‘Yó se tau hemtahu ebéléu, hol lómón ke wen tbul él gu béléen, yóm él hlowil tau.’ ”

Isaya 54:4

Hol béi abay bud hlikò, laen kô dù gónóm myak. Ne laen kô dù tau hemyak kóm. Tódô klifótem yóm tehe là kgulitem bè yóm hanà tolo klomihem tau. Ne bud klifótem snéen yóm alì sidek keblat nawahem bè yóm klibunem bolu.

Kun Snulat Luk 23:35

Tey dê tau mdà bè yó, yóm na a gbót temngel du. Yó nmò yó kem tuha gónó le galak yó kem Ju, senflowon le Jisas, mon le, “Deng gel lenowilen yó kem dumu tau, yake lenowilen yóm kun knô ke du se yóm Misaya, yóm deng nélék Dwata.”

Matyu 12:18

“Ni se yóm tau tóbóng lówóhu, yóm deng néléku. Tey bong nawahu du, ne tey kligalu béléen. Angat tódô suu béléen yóm dou Tulus, ne angat heglalagen bè yóm kdéen tau yóm ktedeng kogotu kukum.

Isaya 41:11

Angat le mulék myak yó kem tau gel kmutó nawa kuy lemwót bè yóm klaen dù gmò le bélê ye. Yó kem tau mit sfatay bélê ye, angat le matay.

Kem Lingón 89:19

Ó Dwata, wen tehe hegfanem ekni bè yó kem tau tóbóng lówóhem alì teneb. Yó tehe monem mò kul, “Deng tnóbóngu yóm sotu sendalù alì tótól bè kwiten sfatay. Deng néléku lem blóng yó kem dumuhen mò henbalingu tau hol geta mogot benwu,

Kem Lingón 40:14

Yó kem tau hligal lemwót bè yó kem gfau, hol hensengem lu, hol henyakem lu.

2 Pitér 3:16

Hol lómón ni se yóm gel tulónen bè yó kem dumu sulaten lemwót bè yóm hol kgesón benwu. Wen se bè yó kem snulaten malù mgel temngón du yóm hol lanen. Yóm gel mgel du yó, fen gel sekban kehlan le du yó kem tau là hulung le hedem, kem tau là mbegelen yóm kehtahu le. Bud ni se gel nmò le bè yó kem dumu hsulat Dwata snéen. Yóm alì kesekban le yó, yó se mit kul elem tafak laen dù sónen.

2 Pitér 1:20

Ni se yóm bong muhen mò nit nawa ye. Laen kô dù tau ke gbeken hemlan du yóm tehe gel tulón yó kem gna tugod Dwata ekni ke són du.

Ifisus 1:4

Gu laan Dwata là deng dmimun du he yóm benwu, deng kem gegna ne yóm kéléken tekuy mò kun tau, hlanen bè yóm deng kessotu tekuy bè Krays. Yó gónón mélék tekuy anì henbalingen tekuy kem tau mólós, kem tau laen dù belenen bè ktonen tekuy.

Kul Nmò 1:16

Mdà Pitér lem blóng le, ne monen mò kul, “Ó kem dumuhu setwoli, wen udél tehe eles htugod Dwata ke Dabid ekni, hlanen bè yóm Tulusen. Yóm udél Dwata yó, deng dohò eta Judas ne, yóm tau fen malak yó kem tau kemfô ke Jisas.

Tekang Kbuten 49:24

Okóm yóm kun boho Jusif, eles tendo btul. Tendo kemgis gu lem abalen abay se monem lemwót bè kegbek yóm kun Dwata yóm maen Jakub, yóm eles tendo gel semgyok yó kem tau Israél, lelen gel mofin kul.

Isaya 46:13

Igoen deng moni yóm kehegmou kuy, móyónen htó ne laen kô bud gónón ganggà. Angat lenwau Jirusalim ne hegetahu yó kem tau Israél bè yó.” Là gomongen bè nili yóm tsaptér 47. Yó tulónen bè ni yóm eles ktulón Isaya du yóm angat kegbà Babilun, yóm benwu alì tótól bè ksidek gel nmò le. Tulón Dwata bè yó kem tauhen yóm kéléken yóm benwu Babilun mò tmafak kul, okóm alì gedlug yóm kmò kem tau Babilun kul. Balù udì ke wen kodu le yó kem tau Israél. Okóm yó mon Dwata ebè yó kem tauhen, “Yóm alì gfà ye, bud huléku eta yó kem tau Babilun ne là kô le gewà du. Balù sotu bè yó kem gel snalig le ke tô gembek lemwà kul, balù yó kem wè le, ne yó kem tau wen gónó le ma, ne yó kem tau gónó le hmungol hlau duhen ke yó kem tau hulung temngel kógów blotik, là kô na le e gbek du lemwà kul.”

Kun Snulat Luk 20:17

Ne tódô tenngel Jisas lu, ne monen mò kul, “Tedu kmò keglileb ye du kuy yóm tehe mon Dwata bè sulaten, yóm monen, ‘Wen botu deng senkbê yó kem tau hemdà gónô, ofo kul ke laen dù muhen. Anì monem, tek sónen yó se botu alì bong muhen mò hbegel yóm gónô hdà le.’

1 Pitér 2:8

Ne wen sotu monen bè Sulat Dwata, yó monen, “Yó se yóm botu angat geslob yó kem tau, ne hlós le tlokob du.” Tahu se yóm yó. Tlokob le du lemwót bè yóm là kimón le du yóm Udél Dwata. Tu se tehe eles olu Dwata ebè yó kem tau là mimón le.