1 Pitér 1:5 - Udél Dwata: Gna Kesfasad ne Lomi Kesfasad

⁵ Hono kuy se funen yóm hyu yó. Ne lemwót bè yóm kehtahu ye, tódô senflós Dwata mofin kuy mlan bè yóm tey kegbeken. Yó gónón mofin kuy, abay se deng eles wen ne yóm klowil laen du sónen angat blayen tekuy, yóm hegfanen bélê tekuy bè yóm hol són kdaw.

1 Pitér 1:5 Referans Kwoze

Flipay 1:6

Ne tódô eles tngónu yóm hyu deng nbut Dwata bélê ye, là kô tebelen du efet bè yóm kehdengen du bè yóm kdaw bud kkól Krays Jisas edini.

Ifisus 2:8

Yakà lemwóten bè kun tóbóng Dwata yóm gónó tekuy gewà gu lem hatay lan tekuy hemtahu bè Krays. Là kóen lemwót bè nmò tekuy gónó tekuy gewà, kaem tódô lemwót bè yóm kun tóbóng Dwata. Laen kô bang gónó tekuy hegmón du nim ni.

Job 19:25

Okóm béléu do, deng eles tngónu du wen nô bè longit angat mfi do ne bè hol sónen angat mdà dini talak tonok yóm mfi do yó.

1 Pitér 1:13

Duhen yó, hol sù ye bè nawa ye sen yóm kimón ye ke Dwata. Bê ye hningay. Hol ken-gel ye nawa yóm hyu angat blay Dwata kuy bè yóm kdaw kesfulék Jisas Krays edini.

Sulat Jud 1:1

Ou se Jud gónón lemwót nim sulat ni. Ou se yóm sotu tau mò tóbóng lówó Jisas Krays, ne ou se yóm twoli Jim. Smulate ebélê ye yu kem tau deng tehe tnaba Dwata. Tey kbong nawahen kuy Dwata, yóm Mà tekuy bè longit, ne tey gel kofinen kuy Jisas Krays.

Hibru 9:28

Senged snéen yóm Krays. Tek suléken matay bè yóm tehe kedsuen klowilen mò hkó salà yó kem tey tau wen. Angat bud semfulék edini, bede là kóen na a bud hkó salà. Okóm yó nógówen, senfuléken yó kem kdéen tau hemtahu deng hemdón mangat du.

2 Timuti 3:15

Hentulónem nawa yóm deng dnalangem bè Sulat Dwata lemwót bè yóm hanà kudiem. Yó se gónóm temngón du yóm kehewà Krays Jisas kóm gu lem hatay mlan bè yóm kehtahuhem béléen.

Glasya 2:20

Yó gónóm mon, là kô ou du ne nim mowil ni, kaem Krays, yóm nô béléu. Són yóm kehtahuhu tendo gentud nawahu abay se tey kbong nawan dou, gloken fen hamà béléu yóm kun klowil.

Kun Snulat Jan 17:15

Là hnihu du béléem, Mà, ke kóhem lu lem benwu. Okóm yó hol hnihu béléem anì kenlungem lu bè Seitan.

Taytus 2:13

Ni se hol nmò tekuy yóm igò tekuy semsangat du yóm kdaw hendón nefet nawa te, duhen yóm kdaw kesfuléken edini Jisas Krays, yóm Dwata tekuy, yóm deng lemwà tekuy gu lem hatay. Angat hol gfan bè yóm kdaw yó yóm alì kegetahen.

Ifisus 3:17

Ne sotu hnihu anì hol tendo nô bélê ye Krays lemwót bè yóm ksalig ye béléen. Bud hnihu snéen anì hol mbegel kdolilen yóm ketngón ye du yóm tey kbong nawa Dwata,

Sulat Pol Ebè Yó Kem Tau Hemtahu Bè Rom 11:20

Tahu se yóm mon ye yó. Yó gónó Dwata mtok kul abay se lemwót bè là kehtahu le. Ne yó gónó ye tles tmowok bè yó se kuy, lan ye hemtahu. Okóm bê ye nit hegmón, eles ye temgama se kuy.

Kun Snulat Jan 12:48

Yóm tau kembê do, ne là se kô henmóyóen du yóm toloku, angat wen fen tmuled du. Yó tmuled du bè yóm hol són kdaw, duhen yóm udélu là henmóyóen du yó.

Kun Snulat Jan 5:24

Tódô tulónu kuy ktahuhen,” mon Jisas, “yó se hmungol yóm dou udél, ne hemtahu bè yóm hógów do, deng wen ne kun klowil laen dù sónen. Là angaten megtuled, okóm deng gewà gu lem hatay, ne deng gutahen ne yóm klowil laen dù sónen.

Isaya 45:17

Okóm yó kem tau Israél deng lenwà Dwata lu kul. Yóm kegmò le bè yó kem hohon le laen kô dù tul sónen. Laen kô bang gónó le bud myak bè kem dumu le tau.’ ”

Kem Lingón 37:28

Yakà tey hyu nawa Dwata du yóm tedeng. Là kô bayaen kul yó kem tau teneb béléen ne laen dù sónen yóm tendo kofinen kul. Okóm yóm kul lugod yó kem tau gel mò sidek, angat hdó le lu ta yóm tonok yó.

1 Samwél 2:9

Gel kenlungen yó kem tau mimón du, okóm yó kem tau mò sidek són le lem gónón kmifu. Laen dù gendeng tau ke mlan bè kun kgis.

Sulat Jud 1:24

Yó ne kóó. Hol dóyón tekuy dé Dwata. Tek són du yóm gembek tmóbóng tekuy anì là bud tekuy btang. Tek són du gembek mkó du bélê tekuy yó kem salà tekuy anì laen dù sidek tonen bélê tekuy bè yóm kdaw kwiten tekuy bè soluhen. Ngem he tey kligal tekuy bè yóm angat knô tekuy béléen yó.

1 Jan 3:2

Ó kem weu dou dumu sogot nawa, deng tekuy baling ngà Dwata ne ni, okóm là deng getnef tekuy du he yóm angat mò kmò tekuy. Okóm deng eles tngón tekuy ne bè yóm kesfulék Krays, gotu tekuy mkél du lemwót bè yóm hol ktatawen bè yóm kton tekuy du.

Hibru 6:12

Là kô me móyô du ke baling ye mduk, okóm yó kóyô me bélê ye ke hol dnalang ye yóm kul kmò yó kem tau hemtahu bè Dwata, ne yóm khanay le nawa le efet guta le yóm deng tehe fasad Dwata kul.

Jirimaya 32:40

Angat wen senfasad me yóm fasad laen dù tul sónen. Fasadu kul yóm tendo keblayu kul yóm hyu. Suu bè nawa le yóm tendo klikò le dou ne là kô bud tebel le do.

2 Kurin 1:24

Là kô nubug me kuy bè yóm kuy kehtahu. Kaem deng sana tngón me deng mbegel ne kehtahu ye. Okóm yó dé kóyô me ke wen lan me tmóbóng kuy anì hol temnù yóm kligal ye.

Kun Snulat Jan 4:14

Okóm yóm tau minum yóm él dou blay, là kóen na a bud meeng. Yóm él blayu yó, baling sfut él mò gónó gmuta yóm klowil laen dù sónen.”

Isaya 54:17

Okóm laen kô dù ngom sfatay gembek hemsidek kuy. Sal gel wen balaem kul yó kem tau dmuón kuy hkawang. Sal gel nfihu yó kem dou tau tóbóng lówó ne sal gel hegmou lu bè hohon le.” Ni se udél yóm Dwata hol gónó mogot.

Kem Udél Hlalak Tehe Selumun 2:8

Gel kenlungen yóm kul lan yó kem tau tedeng kmò le ebè kem dumu le ne gel sen-gyoken yóm kul lan yó kem tau hteneb béléen.

Jirimaya 23:4

Angat wen kem tau snaligu mò malak kul. Laen kô dù bud knikò le ne yó kem dou tau ne laen se dù lana bélê le balù sotu,” mon Dwata.

Sulat Pol Ebè Yó Kem Tau Hemtahu Bè Rom 8:18

Ke hendem tekuy yóm tey kehyuhen yóm angat hegfan Dwata bélê tekuy hulin kdaw, tek élél yóm keglayam tekuy nim kmoen ni.

1 Kurin 1:21

Bè kun khulung hedem Dwata, là kô hlanen du bè kul ketngón kem tau tonok yóm kesetngón le ebéléen. Okóm yó gónón hlan du yóm kehewaen kul gu lem hatay, tódô lemwót bè yóm kehtahu le du yóm tulón nwit me, yóm gel mon le tulón laen dù muhen.

Flipay 4:7

Ke ni se gel nmò ye, gnóm ye yóm kenek nawa lemwót bè Dwata. Yóm kenek nawa yó, là gbek tekuy hmingón du yóm mò kmoen. Ke deng gnóm ye, là kóen bud sbeweg ne kehedem ye, baling menek kegnóm ye du lemwót bè yóm deng kessotu ye bè Krays Jisas.

1 Pitér 4:13

Yake hligal ye dé ke wen gónó ye glayam, abay se deng ye gbót ne bè yóm tehe keglayam Krays. Ke gbek ye hembala du, bong kehligal ye bè yóm kdaw kehegfan Dwata du bè kdéen tau yóm tey kegeta Krays.

1 Pitér 5:1

Ne ni wen udélu ebélê ye, yu kem tuha gónó le gel galak yó kem tau hemtahu. Ou se sotu dumu ye tuha gel malak snéen. Lelen yó he deng tonu se dou yóm tehe keglayam Krays bélê tekuy, ne gomonge snéen dou bè yóm kdaw angat kegfan yóm kegetahen. Ni se yóm hlauhu kuy.

2 Pitér 1:3

Lemwót bè yóm alì kfasang Dwata gónón tódô ket du yóm któbóngen tekuy anì gulit tekuy bè yóm klolò tekuy du. Ne mlan bè yóm deng ketngón tekuy ke Jisas Krays, gónó tekuy gomong béléen bè yóm tey kegetahen ne yóm tey kehyuhen.