1 Pitér 1:10 - Udél Dwata: Gna Kesfasad ne Lomi Kesfasad

¹⁰ Nim kmò kegewà tekuy ni, ya tey kehnagì le du yó kem tehe tugod Dwata ekni. Tehe eles gel tulón le snéen nim tóbóng tódô blay Dwata tekuy ni.

1 Pitér 1:10 Referans Kwoze

Matyu 13:17

Tódô tulónu kuy ktahuhen, tey dê kem tehe tugod Dwata ekni dalang se yó kem dumu tau Dwata, gel tô hendeen le mton du yóm kuy deng ton nim kmoen ni, okóm là kô ton le du. Tô hendeen hnungol le se kul yóm kuy deng gungol ni, okóm là kô gungol le du.”

Kun Snulat Luk 10:24

Tódô tulónu kuy ktahuhen,” monen, “tey dê bè yó kem tehe tugod Dwata ekni ne yó kem tehe tau hol geta gel tô hemdeen mton du ni kem kuy ton ni, okóm là kô ton le du. Tô hendeen hnungol le se kul yóm kuy deng gungol ni, okóm là gungol le du.”

Kul Nmò 7:52

Tulón ye do kun,” mon Stéfén, “ke wen sotu tehe tugod Dwata là deng tehe hensidek kem tehe fù tekuy du ekni. Sal tehe gel hnatay le yó kem tau hógów Dwata, yó kem tau tehe gel tmulón yóm angat ksut yóm tau tedeng hógów Dwata. Ne deng sut se yóm hógów Dwata yó, duhen tu sem le eted ye elem tdok yó kem tau mogot kukum. Yu se yóm fen le hbonok du.

Kun Snulat Jan 5:39

Tey gel kehnagì ye du yóm Sulat Dwata. Ofo kuy ke bè yóm alì kehnagì ye du gónó ye gmuta yóm klowil laen dù sónen. Igoen sem ou yóm tulónen yó.

Danyél 2:44

Bè yóm igò le tolo mogot benwu yó kem tau hol geta monu yó koni, yó nmò yóm Dwata nô bè longit, hetfingen yóm kun kogot tau ne laen dù gembek sembeweg du yóm kun kogot efet kól bè sónen ne laen se dù tau tles mogot du. Okóm yóm tau mogot yóm benwu yó, angat tódô gotu msulék genlaen yóm kul nogot, nmoen són le. Okóm yóm kun nogot, laen kô dù nan e són.

Hibru 11:13

Ni kem tau monu ni koni, là kô dog ton le du yóm fasad Dwata kul, deng le gotu matay gu laanen. Okóm bè yóm tehe tolo klowil le, hol lómón ke deng ton le, ne tey kligal le du snéen, balù yóm tolo klimahen bélê le. Yó gel mon le, “Tau me milo se kum. Olo kem kum hlun gónó nô nim benwu ni.”

Kul Nmò 10:43

Yóm Jisas ni,” mon Pitér, “du se gónón e gbak yóm tehe gel tulón yó kem tehe tugod Dwata ekni. Yó gel mon le, nô kihu tau hemtahu béléen, gbek Dwata hmifót salà le hlanen bè yóm tey kfasang yóm boluy Jisas.”

Sikaraya 6:12

Tulónem du udél yóm Dwata laen dù là gbeken du, yó monen, ‘Ngem, yóm sotu tau bnoluy Hanga. Tey angat ktubeden, du mò bud hemdà du yóm dou Gónô.Tahu se, du se angat hemdà du yóm kun Gónô Dwata ne tey kadat le du lómón kadat le yóm tau hol geta ne nogoten yó kem tauhen lemwót bè yóm gónón myón kmamal. Ne lenwóten bè yóm gónón myón kmamal, bud du se mò blóng le ebè Dwata ne tey tilob kessogot yóm lewu nmoen yó.

Kun Snulat Jan 7:52

Yó balà le ke Nikudimus yó kem dumun Farisi, mon le, “Tauhi lemwót bè Galili kô kóm? Hennagiem dé yóm Sulat Dwata, nénégem ke wen tugod Dwata lemwót bè Galili.”

Kun Snulat Luk 24:44

Omin Jisas yó bud mon du mò kul, “Yóm deng katayu lem blóng ye, ne yóm bud klowilu, ni se yóm tehe deng gel tulónu kuy bè yóm hanà tolo knóu lem blóng ye. Nan na gotu dohò etahu he kdê yó kem tehe deng snulat Musis, dalang se yóm kul tehe gel snulat yó kem dumu gna tugod Dwata kkólen bè yóm tehe snulat le bè yóm bok Lingón.”

Matyu 26:24

Yóm Ngà Tau nan na matay he,” mon Jisas, “lómón yóm deng tehe eles tulónen bè Sulat Dwata. Bede tey angat kegtafaken yóm tau bemlay sumóng. Mom tumù ne ke béen dog tehe tau.”

Kem Udél Hlalak Tehe Selumun 2:4

Hol hen-gelem mebel du yóm khulung hedem lómón yóm gel kebelem tembaga futì ne dumu kimu mebtes gebnos.

Tekang Kbuten 49:10

Yóm tuged gel nogot yóm tau hol geta mò ilô yóm kfasangen mogot tau, là kóen lana bè kun ból Juda efet kól yóm sotu sfuhen hol mfun du mogot yóm klamangen. Bè yóm kkólen, gotu nimón yó kem tau bè klamangen benwu.

1 Pitér 1:11

Bè yóm kehnagì le du, hnebel le ke kilón yóm angat kmò Dwata du, ne yóm mò angat kmoen du. Hol ni sem kmoen ni yóm tehe hetngónen kul yóm Tulus Krays nô bélê le. Eles hetngónen kul yóm keglayam yóm Krays, ne yóm kehegeta Dwata du bè kogolen.

Kul Nmò 17:11

Tey le móyô dmalang yó kem tau bè yó bè Beriya senta yó kem tau bè Tisalunika. Tey tilob khungol le du yóm tulón Pol, ne gel hennagì le yóm Udél Dwata ket kdaw anì ton le ke tahu yóm gel tulón Pol kul.

Hagay 2:7

Angat genbau kdéen dumu benwu. Ne yóm kdê kendengen le, gotu nit le ebè ni mò heklóón yóm dou Gónô. Angat tódô hnok kendengen lem yóm dou Gónô.

Hibru 11:40

Yó duón gónó le là gmuta du, abay se wen yóm tey hyu atul Dwata mò gónó tekuy gotu gomong. Là kô na le e kendel guta du yóm fasad Dwata yó ke là deng tekuy gotu gomong gulit bélê le.

Danyél 9:3

Yó gónóhu tódô smolu ebè yóm sana kum Dwata hol gónó mogot hkoduhe béléen, balù udì ke mkene bè yóm kehkoduhu yó lelu mnes sakù, tódóe myón lem kohù bè yóm klangagu.

Kul Nmò 28:23

Tahu se, na le na bnuteng yóm bud kesbung le ebè Pol. Timbow hto yóm buteng le yó, ya tey kwen le bud sbung ebè yóm gónô gónó Pol nô. Tódô sendaw le nô bè yó lemwót hlafus kól kifu. Gotu tulón Pol kul yóm kmò kogot Dwata tau. Ne gel wen nwahen lemwót bè yóm hlau Musis, ne wen se gel nwahen bè udél yó kem gna tugod Dwata ekni mò gónón heglileb du bélê le yóm tulónen gbak ebè Jisas.

1 Pitér 1:13

Duhen yó, hol sù ye bè nawa ye sen yóm kimón ye ke Dwata. Bê ye hningay. Hol ken-gel ye nawa yóm hyu angat blay Dwata kuy bè yóm kdaw kesfulék Jisas Krays edini.