1 Kurin 2:6 - Udél Dwata: Gna Kesfasad ne Lomi Kesfasad

⁶ Bè yó kem tau deng mbegel kehtahu le, wen dou ketngón toloku kul. Bede là mkélen bè yóm kul ketngón yó kem tau te tonok, ne là mkélen bè yóm kul ketngón yó kem tau wen kfasang le mogot benwu. Yóm kul kfasang yó, deng sana nbuten monol.

1 Kurin 2:6 Referans Kwoze

Hibru 5:14

Okóm ke deng nimónen Dwata yóm tau, lómón ke deng gbeken mken yóm ken mgel. Abay se deng tendo gel dnalangen se kun milô du yóm hyu ne yóm sidek.

Sulat Jim 3:15

Abay se yóm ketngón yó, là kóen lemwót bè Dwata, tódô lemwót bè knawa tau te tonok. Là kóen lemwót bè Tulus Dwata, tódô lemwót bè Seitan.

2 Kurin 4:4

Là hentahu le du abay se nseng Seitan kehedem le. Du se kul dwata yó kem tau là hemtahuhen. Yó gónó Seitan mseng kehedem le anì là dilô le du yóm tey layag hmilol kul, yóm layag lemwót bè yóm Tulón Hyu gbak ebè yóm tey klinggel Krays. Bè Krays se hol gónó tekuy dmilô du yóm kun kmò Dwata.

1 Pitér 5:10

Okóm ke deng legen udì yóm keglayam ye, tey któbóng Dwata kuy. Du se hol hbegel kuy ne tendo ten-gelen yu efet là buden sliwo yóm kehtahu ye. Yó gónón tehe tmaba kuy anì gbót ye bè yóm tey kegetahen ditu bè longit hlanen bè yóm deng kessotu ye bè Krays. Ne yóm kegetahen yó, laen kô dù nan e són.

1 Kurin 2:8

Nim ketngón Dwata ni, là kô glileb le du kul yó kem tau mogot benwu nim kmoen ni. Ke deng glileb le, là kô htutuk le du bè kros yóm gónó tekuy mogot tehe lemwót gu bè longit.

1 Kurin 1:28

Néléken yó kem tau gel hen-gnok le lem nim benwu ni, ne gel kenhisik le, ne gel henwog le mò gónón lemsón yóm alì bong muhen bè yó kem tau te tonok, mò gónó Dwata hegfan yóm klaen dù muhen yóm kul gel hendem yó kem tau te tonok.

Kulasi 4:12

Tey gel kólóm Ipafras kuy snéen kun sotu tau lemwót dyó bélê ye, yóm sotu tóbóng lówó Krays Jisas. Tey gel knihen bélê ye bè Dwata anì hol hbegelen yóm kehtahu ye, ne anì hol gtukul ye yóm kun kóyô bélê ye Dwata ne anì hol gulit klolò ye du.

Ifisus 2:2

Bè yóm kdaw yó, tódô lolò ye yóm sidek kul gel nmò yó kem tau là hemtahuhen bè Dwata. Tódô nimón ye Seitan, yóm gónó le kmulu yóm kdéen mtulus gu talak kmawang. Bud du se yóm gel malak yó kem tau là mimón ke Dwata.

Matyu 5:48

Yó gónóm mon, hol ye hgulit, lómón kgulit yóm Mà tekuy bè longit.”

2 Kurin 1:12

Sotu gónó me gel hligal, abay se tódô tngón me laen kô dù belenen yóm kmò me ebè kem dumu me tau, hol néen yóm gel kmò me ebélê ye. Laen kô bang buni me bélê ye se, ne tódô tngón Dwata snéen yóm kgotu nawa me ebélê ye. Bè yóm kmò me du nim nmò me ni, là kô tódô salig me du yóm kum ketngón, sal gel snalig me yóm kfasang Dwata tmóbóng kum.

Kem Lingón 33:10

Yóm dê atul yó kem tau mogot benwu talak tonok, gbek henseng Dwata. Hensengen sok là hyuhen anì là gfuhen.

Job 1:1

Tehe yu ekni bè yóm benwu Us, wen sotu tau menwu bè yó boluyen Job. Nim tau ni, laen dù gónó le gemsanil du yó kem dumu tau. Tey tau gulit knawahen, mung du yóm klikoen ke Dwata ne tendo gel hetsik bè yóm sidek.

Sulat Jim 3:2

Kdê tekuy, sal gel wen gónó tekuy gemsalà. Okóm yóm tau laen dù salà sumóngen, deng tahu gulit ne yóm tau yó, deng hulung mit ktauhen.

2 Kurin 13:11

Duhen yó, kem dumuhu setwoli, hol ye gel hgulit. Hol hnungol ye ni kem hlauhu kuy ni. Hol sensotu ye kut nawa ye. Bê ye bud hesgólól kehedem ye. Ke ni se nmò ye, beyen bélê ye Dwata. Du se gónón lemwót yóm kesbong nawa ne yóm kenek nawa.

1 Kurin 14:20

Bè ni kem tulónu kuy ni koni, kem dumuhu setwoli, bê ye abay heskél yóm kuy kehedem bè knawa ngà. Yó dé dnalang ye bélê le yóm là khulung le matul mò du yóm sidek. Okóm bè yóm kmò kehedem ye du nim toloku kuy ni, yake kehedem tau tmuha dé kehedem ye du.

1 Kurin 2:13

Duhen yó, bè yóm gel ktolok me du kuy nim ni, là kô hlan me du bè yóm khulungen mudél tau te tonok. Okóm hlan me bè yóm khulung mudél deng dnalang me bè Tulus Dwata. Ne yóm ktahuhen lemwót béléen, yó se gel tolok me bè yó kem tau gónóhen nô yóm Tulus Dwata.

1 Kurin 2:1

Ó kem dumuhu setwoli, bè yóm tehe kwitu du ebélê ye, yóm tahu tulón lemwót bè Dwata, yóm tulón tehe gbuni bè yó kem tau gnan, là kô hlanu du bè yóm dou khulung mudél, duhen ke bè yóm tehe alì knagiu.

Kun Snulat Luk 16:8

Tikóng tngón yóm tau fun kendengen yóm kmò kehlanen du yóm atulen yóm tau là gulit yó koni, botong monen, ‘Tey hulung hemlan yóm klowilen elem haya yóm tau là gulit yó.’ ” Bud mon Jisas, “Yó kem tau són ktes le klowil le te tonok, tey le hulung eles temgama du yóm klowil le elem haya. Yake bud lómón se yó yóm kul eles ketgama du yóm klowil laen dù sónen yó kem tau deng nô lem layag.

Matyu 19:21

Bud bnalà Jisas se, monen, “Ke móyói hol gulit, tu ne muléki nam e hbalù kdê nô béléem, ne blayem bè tu kem élél yóm blihen. Ke yó nmoem, angat wen tey kendengenem bè longit. Ne lemwót yó dum kóm, loloem ou.”

Matyu 13:22

Bong yóm bnék gdek elem yóm angat gónón mfól kluon, hol lómón ke yó kem tau hmungol du yóm Udél Dwata, okóm dê bnukù nawa le bè klowil le, ne gfét nawa le bè kebel le kendengen le. Yó gónón limes yóm kehtahu le, ne laen kô dù bunguhen.

Isaya 40:23

Gotu heglaanen yó kem tau mfasang mogot benwu, tódô hlanahen boluy le.

Kem Lingón 37:37

Okóm hol hennagiem yóm tau hyu kmoen, yóm tau tedeng kmoen, yóm tau menek kehedemen. Tey wen semfu gu béléen.

Kem Lingón 146:4

Ke matay le, bud le baling kfung se kul, ne kdê yó kem tehe natul le, gotu gesón.

1 Kurin 3:1

Bè hol ktahuhen, kem dumuhu setwoli, bè yóm tehe ktoloku lem blóng ye, là hsengedu du bè yóm gel ktoloku yó kem tau deng galak bè yóm Tulus Dwata. Yóm ktoloku bélê ye, hol lómón ke toloku yóm tau là deng le hol hemtahu. Hol lómón ke hanà ye ngà bè yóm kehtahu ye.

1 Kurin 12:8

Wen se yóm tau tmolok benlay Tulus Dwata ketngón. Bud tólóng se tau tmolok benlayen khulung gmileb du yóm ktahuhen.

2 Kurin 4:3

Bè nim Tulón Hyu gel nit me ni, són olo gónón là mtukul, tek són bè yó kem tau tolo golu elem hatay.

Kulasi 1:28

Duhen ni, laen dù dumu tulón me bè kdéen tau, són Krays. Gel hlan me bè khulung hedem yóm kehetgama me kul, ne yóm ktolok me kul. Yó gónó me mò du anì hol le gulit yóm ket kul na sotu bè yóm kdaw kwit me kul bè solu Dwata yó kem tau deng ssotu bè Krays.

Hibru 6:1

Duhen yó, yake hlós tekuy dé bè yóm tolok gónó tekuy baling gulit. Laen dù mu tekuy bud semsulit du yóm hol tanay dnalang tekuy bè yóm tehe kbut tekuy hemtahu. Bê tekuy abay bud sensulit yóm tehe ktagak tekuy yóm dê lolò laen dù muhen bè yóm deng kehtahu tekuy bè Dwata.