1 Kurin 13:5 - Udél Dwata: Gna Kesfasad ne Lomi Kesfasad

⁵ Laen kô dù nmò tekuy mò gónó le myak kem dumu tekuy, ne là kô duil tekuy du yóm knóyô tekuy, ne là mahil tekuy meklit. Mlan bè yóm kesbong tekuy nawa, là kô snolò tekuy du ke wen mò sidek bélê tekuy.

1 Kurin 13:5 Referans Kwoze

1 Kurin 10:24

Là kóen hyu ke són ktes tekuy, són yóm hyu bélê tekuy. Okóm yó dé yóm hyu, ke hol ktes tekuy yóm gónón hyu bè kem dumu tekuy.

Sulat Jim 1:19

Ni mò hendem ye, kem dumuhu sogot nawa. Yake hol ye hulung hmungol, yóm ket kuy na sotu. Bê ye tódô fà mudél, ne bê ye gel mahil lembut.

Flipay 2:21

Tódô kdê yó kem dumu tau, sal gel hegna le yóm kul knóyô nmò, fen hfuli le yóm kun nmò Jisas Krays.

Flipay 4:8

Ni mò sónu du bélê ye, kem dumuhu setwoli. Yake hol sù ye lem hendem ye dé yóm hyu, ne yóm knóón bang dóyón. Tey hyu ke són gel hendem ye yóm tahu ne yóm tedeng ne yóm mólós, ne yóm minggel ne yóm knóón nadat.

Glasya 5:13

Bélê ye kuy, kem dumuhu setwoli, deng tnaba Dwata yu ebéléen anì là bud ye ghesek du ne yó kem hlau Musis. Okóm baluen ke là bud ye ghesek du, hol bê ye abay tódô nmung yóm sidek knóyô lówó ye. Yó dé tles nmò ye, tnóbóng ye kem dumu ye lemwót bè kesbong ye nawa.

1 Kurin 12:25

Ne duhen yó, yóm kdéen nô bè lówó tau, laen kô dù mtukul bong muhen bélê le. Ni se kmò Dwata du anì stóbóng le baluen ke là senged le.

2 Kurin 5:19

Yó gel tulón me, duhen yóm deng kehlan Dwata du bè Krays yóm lan nmoen ebè kdéen tau mò lan le mit sefyu ebéléen. Là bud snolò Dwata du bélê le ne yó kem tehe salà le. Ne bélê me kum, deng sigangen ta me nim tulón ni mò gónó le temngón du yóm lan le mit sefyu ebéléen.

1 Kurin 10:33

Hol dnalang ye dé yóm dou nmò. Yó gel sen-galuhu ke gel hegnahu yó kem dumuhu tau, là kô hegnahu du yóm dou kóyô. Yó gónóhu mò du yóm yó anì wen lanu tmóbóng kul anì gewà le gu lem hatay se kul.

1 Kurin 11:18

Bè hol tanayen, deng gungolu bè yóm gel ksimba ye, tey gel kesgólól nawa ye kun. Ne wen se gel hentahuhu du yóm gungolu yó.

Matyu 5:22

Okóm ni dou tulón kuy, yóm tau ke lenbuten kem dumuhen, angat nwit le bè kukum. Yóm tau ke monen bè yóm dumuhen, ‘Laen dù muhem tau kóm,’ angat nwit le ebè yóm tau gel hemdeng knukum yóm tau yó. Ne yóm tau ke monen bè yóm dumun, ‘Nungeli. Laen dù muhem tau,’ deng golu elem lanaw ofi ne yóm tau mudél yó.

Kun Snulat Luk 7:39

Timbow ton yóm Farisi mit ke Jisas nim nmoen ni, yó hendemen, “Ke tahu tau tugod Dwata nim Jisas ni, hol là galu ke là tngónen du nim libun mogot du ni, ne yóm sidek gel nmoen.”

Mark 3:5

Bè yóm ketngel Jisas ebélê le, tey kebuten kul. Okóm nô bè yó se klayuk nawahen kul, abay se dilóen bélê le yóm tey kgel kulu le ne yóm klaen dù keskodu bélê le. Ominen bud haking ebè yóm tau kimoy sigelen, monen mò du, “Ó Wè, bentolem sigelem.” Ne tahu se, bentolen, ne hol lómón ke laen dù tehe desen.

2 Tisalunika 3:7

Deng hónô tngón ye se yóm tehe gel kmò me, yó se mò lolò ye. Là kô me hduk yóm tehe knô me lem blóng ye.

1 Kurin 7:36

Bè yó kem tau deng slinti, okóm deng eles natul le yóm là tagad kesyehen le, ni udélu ebélê le. Ke lemwót bè yóm knóyô lówó yóm logi, ke yó hendemen là buden hyu yóm kmò kekdolen ebè yóm libun deng lenintihen, abay se là bud gafasen du nawahen, ne móyô kendel myehen du, yake tódô le syehen ne. Là kóen sidek ke yó nmò le.

Matyu 9:4

Tódô tngón Jisas yóm nô lem hendem le, yó gónón mon du mò kul, “Moen de ke sidek kmò kehedem ye ebéléu?

2 Timuti 2:10

Kem kunen ne, kihu kem kmò le dou, syan ke gtóbóngu yó kem tau deng nélék Dwata anì gewà le gu lem hatay se kul lan le hemtahu bè Krays Jisas, ne anì guta le yóm klowil laen dù sónen.

Kem Udél Hlalak Tehe Selumun 14:17

Yóm tau sunget tey mahil kmoen ungel ne yóm tau hulung matul mò du yóm sidek knutó nawa kem dumun.

Lista 16:15

Tey sidek kebut Musis bè yóm kungolen du yóm mon le yó, botong monen mò ke Dwata, “Ó Dwata, hol béem abay henmóyô ke wen blay le kóm ni kem tau ni. Balù sotu bélê le ke deng wen sidek nmou bélê le. Ne balù sotu kudà asnu le ke deng tódô nwahu bélê le.”

Lista 12:3

Blaem nim Musis, tey tau hulung heglaan laen kô gemsenged du bè kdéen tau talak tonok yóm khulungen heglaan.

2 Timuti 4:16

Bè yóm tanay kbalau yó kem tau kmukum dou, balù sotu ke wen mfi do, deng mom gotu sentagak le ou. Deng hnihu bè Dwata anì là snoloen du bélê le.

Lista 32:6

Yó balà Musis kul, monen, “Yó kô kóyô ye ke tô ye tebel bè ni igò le mung bè gida yó kem dumu ye?