1 Kurin 13:1 - Udél Dwata: Gna Kesfasad ne Lomi Kesfasad

¹ Baluen ke hulunge mudél yóm kul udél yó kem dumu tau te tonok, ne baluen ke hulunge mudél yóm kul udél yó kem hógów Dwata gu bè longit, tedu se bang gónóhen e kól yóm kenhulungu yó ke là bong nawahu kem dumuhu? Hol lómón yóm uni blówón duhen ke uni blanting laen kô dù mdengen bnoluyen.

1 Kurin 13:1 Referans Kwoze

1 Timuti 1:5

Yó hol muhen nim hlolou kóm ni anì wen yóm kesbong le nawa lemwót bè yóm klaen dù belenen yóm nawa le, ne yóm klaen dù blóng le ebè Dwata, ne hol tahu duhen yóm kehtahu le.

1 Pitér 4:8

Yó bong muhen bè kdéen, hol ye sbong nawa. Ke sbong nawa ye botong gbek ye tódô hmifót du yóm dê gemsalà bélê ye.

Glasya 5:22

Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesbong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm kehyu kmò, ne yóm kteneb nawa,

1 Kurin 13:8

Yóm kesbong nawa, laen kô dù mtukul sónen. Okóm angat wen sónen yóm khulung tmugod ke Dwata. Senged snéen yóm khulung mudél ebè Dwata bè tólóng udél, angat wen sónen se yó. Ne yóm alì ketngón tau, bud wen sónen snéen yó.

Glasya 5:6

Ke deng me ssotu bè Krays Jisas, laen kô muhen bélê me kum yóm htulì. Senged se ke wen, duhen ke là. Yó dé bong muhen bè Dwata, ke deng hol gfan bè yóm kesbong me nawa yóm kehtahu me.

1 Kurin 8:1

Bong bè yóm deng snólók ye bè yóm ken deng dsù bè dwata kéng, ni se balau du. Tahu se yóm mon le, “Kdê tekuy se temngón du nim snólók le ni.” Ke lómón yó se kmoen, hol ten-gama ye, kô niten yu heklabak yóm ketngón ye yó. Okóm gel mlan bè yóm kbong nawa tekuy kem dumu tekuy hemtahu gónó tekuy temgel kul bè kehtahu le.

2 Pitér 2:18

Tey le hulung mudél, okóm laen dù lemen. Gel hegbóy le yó kem tau hanà lomi kmogol du yó kem knóyô lówó. Yóm kehegbóy le kul, hlan le bè yó kem sidek knóyô lówó le.

Sulat Pol Ebè Yó Kem Tau Hemtahu Bè Rom 14:15

Okóm ke senbewegem kehedem kem dumuhem lemwót bè yóm gel kenem, yó gónón gfan yóm là kbong nawahem du. Hol béem abay nmò gónón lana kehtahu kem dumuhem ke mlan bè kkenem, igò Krays deng matay béléen se kun yóm dumum yó.

Matyu 25:45

Ne yó monen mò kul yóm Tau Hol Geta yó, ‘Tódô tulónu kuy ktahuhen, yóm là dog któbóng ye yó kem tau alì gdanà, lómón se yó ne yóm là dog któbóng ye dou.’

1 Kurin 12:8

Wen se yóm tau tmolok benlay Tulus Dwata ketngón. Bud tólóng se tau tmolok benlayen khulung gmileb du yóm ktahuhen.

1 Kurin 12:16

Senged se ke mon yóm klingu, “Là kóe gomong bè lówó dou, abay se là ou du yóm mata.” Olon beyen mon du yóm yó, là kô gbeken tódô htólóng.

2 Kurin 12:4

Ne bè yóm knóen ditu, wen tey gungolen, bede là bud gbeken tmulón du bè udél tau, là kô gbek tau bud tmulón du.

Kem Lingón 150:5

Hol dóyón tekuy Dwata mlan bè yó kem alì muni gel sendofì te.

Mark 16:17

Yó kem tau hemtahu béléu,” mon Jisas, “angat wen ktued blay Dwata kul anì wen hentaw ton nmò le. Angat gbek le hdó busaw bè yó kem tau lengel mata hlan le bè dou boluy. Ne angat gbek le tódô mudél yóm udél là deng kul dnalang du.

1 Kurin 12:10

Ne wen se yóm tau benlay Tulus Dwata kfasang mò yó kem hentaw ton. Ne wen se tau benlayen khulung tmugod yóm Udél Dwata. Bud wen se benlayen khulung milô yóm lemwót bè Tulus Dwata duhen ke là. Ne wen se benlayen khulung tódô mudél ebè Dwata bè tólóng udél baluen ke là tngónen du lanen. Ne wen se tau benlayen khulung bud tmugod du lanen yóm udél yó.

1 Kurin 14:2

Yóm tau tódô hulung mudél ebè Dwata bè yóm tólóng udél là deng kun tngón du, són bè Dwata gónón e mudél, là ebè dumu tau du, abay se là kô wen dumu tau temngón du yóm udélen. Tódô hudél yóm Tulus Dwata, bede gbuni yóm lanen.

1 Kurin 14:4

Yóm tau tódô mudél ebè Dwata bè yóm tólóng udél, kaem olon yóm kun knô tnóbóngen. Okóm yóm tau gel tmugod yóm udél Dwata, gotu tnóbóngen yó kem dumuhen hemtahu.

1 Kurin 14:5

Hyu nawahu se ke gotu ye hulung mudél ebè Dwata bè yóm tólóng udél. Okóm milud he kehyuhen ke kdê ye gotu hulung tmugod yóm udél Dwata. Tey bong muhen kun yóm tau hulung tmugod yóm udél Dwata senta yóm tau tódô hulung mudél ebè Dwata bè yóm tólóng udél. Song gónón hyu ke wen fen hulung bud tmugod du bè kem dumun tau hemtahu yóm lanen yóm udélen anì wen gónón tmóbóng kul.

Deng Hegfan 14:2

Ne wen udél gungolu gu bè longit, hol lómón ke lungkul yóm tey hikong, duhen ke uni yóm lugung bong. Hol lómón ke sguyun yóm tey dê heglung.